კრემლმა თბილად მიიღო აფხაზეთის ე.წ. პრეზიდენტობის კანდიდატი, მაგრამ სოხუმმა ეს უკანონოდ მიიჩნია

გუნბას ვიზიტი მოსკოვში

აფხაზეთის საპრეზიდენტო არჩევნების წინ, ხელისუფლების კანდიდატი ბადრა გუნბა მოსკოვში იმყოფებოდა, სადაც შეხვედრები გამართა მაღალი თანამდებობის პირებთან და რუსეთის მთავრობის წარმომადგენლებთან. რუსული მედიის ინფორმაციით, ამ შეხვედრების შედეგად, მოსკოვმა აფხაზეთის წინააღმდეგ დაწესებული ყველა სანქცია გააუქმა.

გუნბა აქამდე აფხაზეთის ე.წ. ვიცე-პრეზიდენტის პოსტს იკავებდა, თუმცა უკვე დატოვა თანამდებობა. შესაბამისად, მას ამგვარი მოლაპარაკებების წარმოების ოფიციალური უფლება არ აქვს. თუმცა, ეს, როგორც ჩანს, მოსკოვისთვის პრობლემას არ წარმოადგენს, მაშინ როცა თავად აფხაზეთში მისი ვიზიტი კრიტიკულად აღიქვეს.

ბადრა გუნბა გადაყენებული ყოფილი ე.წ. პრეზიდენტის, ასლან ბჟანიას ფაქტობრივ მემკვიდრედ მიიჩნევა. ის ასევე კრემლის აშკარა ფავორიტადაც ითვლება. გავრცელებული ცნობებით, მისი შეხვედრები რუს ოფიციალურ პირებთან იმდენად წარმატებული აღმოჩნდა, რომ მოსკოვმა აფხაზეთისთვის ფინანსური დახმარების აღდგენა და შეუფერხებელი ელექტროენერგიის მიწოდება აღუთქვა. ეს კი ნიშნავს, რომ რუსეთი აღარ “დასჯის“ აფხაზეთს იმის გამო, რომ სოხუმმა რუსულ-აფხაზური საინვესტიციო შეთანხმების რატიფიცირებაზე უარი განაცხადა.

• არჩევნები აფხაზეთში: მმართველი პარტიის კანდიდატი და ოპოზიციის ლიდერი კრემლის ერთგულებაში ეჯიბრებიან ერთმანეთს
• აფხაზი პოლიტიკოსები, რომლებსაც რუსეთის მოქალაქეობა ჩამოართვეს, თვლიან, რომ ისინი პატრიოტიზმის გამო დაზარალდნენ

აფხაზეთის ცენტრალურმა საარჩევნო კომისიამ ამ საკითხზე კომენტარისგან თავი შეიკავა.

სამაგიეროდ, ოპოზიცია დარწმუნებულია, რომ ბადრა გუნბას მიერ მსგავსი შეხვედრების გამართვა არაკანონიერია.

ოპოზიციურმა ომის ვეტერანების ორგანიზაცია “არუაამ“ განაცხადა, რომ გუნბას “არ აქვს არანაირი ოფიციალური მანდატი, რომ აფხაზეთის რესპუბლიკის ხალხის სახელით ისაუბროს და მოლაპარაკებები აწარმოოს რუსეთის მხარესთან“.

ოპოზიციური საპრეზიდენტო კანდიდატის, ადგურ არძინბას საარჩევნო შტაბმა გუნბას ქმედებები “ღია წინასაარჩევნო პიარად“ შეაფასა, რომელიც, მათი თქმით, მიზნად ისახავს ამომრჩევლების შეცდომაში შეყვანას.

“ბადრა გუნბა ცდილობს შექმნას შთაბეჭდილება, რომ რუსეთის ფედერაციასთან ურთიერთობებში “ოფიციალური“ როლი აქვს, თუმცა არ გააჩნია ამისთვის შესაბამისი სახელმწიფოებრივი მანდატი“, – ნათქვამია არძინბას შტაბის განცხადებაში.

ამ პოზიციას იზიარებს აფხაზეთის პრეზიდენტის მოვალეობის შემსრულებელი ვალერი ბგანბაც. მან დაადასტურა, რომ გუნბამ თანამდებობა უკვე ოფიციალურად დატოვა და “არ აქვს უფლება, შეასრულოს ვიცე-პრეზიდენტის ფუნქციები“.

ვალერი ბგანბა პუტინს სთხოვს, დაიცვას "რესპუბლიკა" რუსული მედიის თავდასხმებისგან

ვალერი ბგანბას თქმით, რუსული მედია ერევა აფხაზეთის საარჩევნო პროცესებში, საპრეზიდენტო კანდიდატებს “პრორუსებად” და “ანტირუსებად” ყოფს.

ახალგაზრდული მოძრაობის “ҲАРАҲПИЦУНДА“-ს ერთ-ერთმა ლიდერმა, ალექსანდრა ბარგანჯიამ საკუთარ ბლოგში აღნიშნა, რომ ბადრა გუნბა და ყოფილი პრეზიდენტის, ასლან ბჟანიას მთელი გუნდი, ძალაუფლების შენარჩუნების მიზნით, იყენებენ მანიპულაციებს, შეთქმულებებს და ცდილობენ, წარმოაჩინონ თავი “კარგ ადამიანებად“.

ბარგანჯია იმედგაცრუებულია, რომ მოსკოვი ნამდვილად ხედავს ბადრა გუნბას აფხაზეთის მომავალი პრეზიდენტის რანგში და დებს მასზე ფსონს. მისი აზრით, გუნბა და მისი ჯგუფი უბრალოდ რუსეთს ახალ დაპირებებს აძლევენ და “ვაჭრობენ ხალხით“, რათა მიიღონ მხარდაჭერა.

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო