კომენტარი: ლავროვის განცხადების მოწონება ნიშნავს იმას, რომ ოცნება, შესაძლოა, კონფლიქტების რუსული პერსპექტივიდან აღქმას განიხილავდეს
კომენტარი ლავროვის განცხადებაზე
“ეკონომიკური პოლიტიკის კვლევის ცენტრის“ მკვლევარმა გიგი გიგიაძემ “ინტერპრესნიუსთან” განაცხადა, რომ სერგეი ლავროვის განცხადება ზუსტად იმ პოლიტიკის გაგრძელებაა, რაც წლებია რუსეთს საქართველოს მიმართ აქვს, რომ “ვითომ” საქართველოს ტერიტორიაზე სამი სახელმწიფოა. მისივე თქმით, ლავროვის მიერ გაკეთებული განცხადების მოწონება იმას ნიშნავს, რომ „ქართული ოცნება“ შესაძლებელია ამ კონფლიქტების რუსული პერსპექტივიდან აღქმას განიხილავდეს.
გიგიაძის შეფასებით, ხელისუფლების მაღალი თანამდებობის პირები მხრიდან ლავროვის განცხადების პოზიტიურად შეფასებით და სხვა მსგავსი გზავნილების გაკეთებით “თანმიმდევრულად იმ ხაზის შემოპარება ხდება”, რაც ქვეყნის ეროვნულ ინტერესებს არ ემსახურება და “პირდაპირ რუსეთის ინტერესებზე” ასხამს წყალს.
რუსეთის საგარეო საქმეთა მინისტრის, სერგეი ლავროვის თქმით, მოსკოვი მზად არის, მხარეების დაინტერესების შემთხვევაში საქართველო “მეზობლებთან” – “აფხაზეთისა და სამხრეთ ოსეთის ქვეყნებთან” შეარიგოს.
“ჩვენი ხელისუფლება პოზიტიურად აფასებს”, – ასე ეხმაურება თბილისის მერი კახა კალაძე რუსეთის საგარეო საქმეთა მინისტრის განცხადებას.
კალაძე მოელის, რომ რუსეთი ქმედით ნაბიჯებს გადადგამს. მისივე თქმით, ის, რომ რუსეთი მიესალმება და ხელს შეუწყობს, რათა მოხდეს შერიგება, ეს “რა თქმა უნდა”, პოზიტიურია.
“თუმცა, მე ვიტყოდი, რომ ამ განცხადებებთან ერთად კარგი იქნებოდა უკვე ქმედითი ნაბიჯების გადადგმა.” – თქვა კალაძემ.
გიგი გიგიაძე: “უპირველეს ყოვლისა, სერგეი ლავროვის განცხადება “ქართული ოცნებისთვის“ სამაშველო რგოლი იყო. რუსეთი და “ქართული ოცნება“ შეთანხმებულად მოქმედებს. სერგეი ლავროვის განცხადებაში იყო პასუხი “ქართული ოცნების მცდელობაზე, რომ თითქოსდა, რაღაცა ფორმით საქართველოში ეთნიკური პრობლემების დარეგულირებას აპირებს.
ლავროვმა ძალიან კონკრეტულად აღნიშნა, რომ საუბარია საქართველოს “მეზობელ სახელმწიფოებზე“. ეს პირდაპირ მიანიშნებს, თუ როგორია რუსეთის დამოკიდებულება – რუსეთი საქართველოს ტერიტორიაზე ხედავს არა ერთ ქვეყანას, არამედ სამ ქვეყანას და გაუგებარია, როგორ შეიძლება ასეთი განცხადება საქართველოში რომელიმე ადამიანისათვის, ამ ქვეყნის პატრიოტისთვის მისაღები ყოფილიყო ან რა კუთხით შეიძლება ის მისაღები და მოსაწონი იყოს?!
ჩვენ ვსაუბრობთ იმაზე, რომ საქართველოს ოკუპირებულ ტერიტორიებზე – აფხაზეთსა და ე.წ. სამხრეთ ოსეთში რუსეთი საქართველოს სუვერენიტეტის და ტერიტორიული მთლიანობის დარღვევას განაგრძობს. შესაბამისად, ერთადერთი გზა იმისა, რომ ამ რეგიონებთან საუბარი დაიწყოს რუსეთის ფაქტორის გამორიცხვაა.
რუსეთი არასდროს იქნება დაინტერესებული საქართველოს ტერიტორიული მთლიანობის აღდგენით და საქართველოს სუვერენიტეტის შენარჩუნებით. რუსეთის ის ძალა არ არის, რომელიც რაღაცა ფორმით ეთნიკური პრობლემების გადაჭრას შეუწყობს ხელს.
ლავროვის განცხადება ზუსტად იმ პოლიტიკის გაგრძელებაა, რაც წლებია რუსეთს საქართველოს მიმართ აქვს, რომ ვითომ საქართველოს ტერიტორიაზე არის სამი სახელმწიფო. ეს საქართველოსთვის და ნებისმიერი პატრიოტისთვის კატეგორიულად მიუღებელია, რადგან ეს დასტურია იმისა, რომ რუსეთი საქართველოს ტერიტორიულ მთლიანობას და სუვერენიტეტს ეწინააღმდეგება.
ჩემთვის სრულიად წარმოუდგენელია, როგორ შეიძლება სერგეი ლავროვის განცხადების მოწონება – ერთადერთი, რომ ეს დადებით კონტექსტში დაინახო, არის “ქართული ოცნების“ მცდელობა, მაქსიმალურად გამოამჟღავნოს საკუთარი თავი, როგორც ცალსახად პრორუსული ნარატივის მხარდამჭერი პოლიტიკური ძალა.”
