"პრეზიდენტ ერდოღანის ლიდერობა სამაგალითოა თითოეული ჩვენგანისთვის" - პრემიერი თურქეთში ჩავიდა
კობახიძე ერდოღანს შეხვდა
საქართველოს პრემიერმინისტრი ირაკლი კობახიძე თურქეთში ოფიციალური ვიზიტით იმყოფება. თურქეთის პრეზიდენტთან ერთად გამართულ ბრიფინგზე მან განაცხადა, რომ რეჯეფ თაიფ ერდოღანის ლიდერობა სამაგალითოა.
“ძვირფასო პრემიერმინისტრო, მე ძალიან გამახარა იმ ფაქტმა, რომ თქვენი მოსაზრებები გამაცანით საქართველოში მიმდინარე მოვლენების შესახებ, თურქეთში მიგვაჩნია რომ, ეს მოვლენები ქართველი ხალხის საუკეთესო ინტერესებით გადაწყდება.” – განაცხადა თურქეთის პრეზიდენტმა.
ირაკლი კობახიძის განცხადება
“ჩემთვის განსაკუთრებული პატივია ვსტუმრობდე ბატონ პრეზიდენტ ერდოღანს, რომელიც არსი არა მხოლოდ პრეზიდენტი, არამედ რესპუბლიკის ნამდვილი ლიდერია, რომელიც მტკიცედ იცავს თურქი ხალხის ეროვნულ ინტერესებს. თქვენი ლიდერობა სამაგალითოა თითოეული ჩვენგანისთვის
თქვენო აღმატებულებავ, მსურს მადლობა გადაგიხადოთ გამორჩეული მასპინძლობისთვის. დღეს, როგორც პირისპირ, ისე გაფართოებული შემადგენლობით შეხვედრისას, განვიხილეთ საქართველოსა და თურქეთს შორის ორმხრივი და მრავალმხრივი ურთიერთობების აქტიური დღის წესრიგი, გავცალეთ მოსაზრებები მნიშვნელოვან რეგიონულ საკითხებზე, დავსახეთ სამომავლო თანამშრომლობის პერსპექტივები.
ჩვენ გვქონდა საუბარი უმაღლესი და მაღალი დონის შეხვედრების დინამიკის შენარჩუნებაზე. პირადად ვთხოვე პრეზიდენტ ერდოღანს საქართველოში ჩამობრძანება. იმედი მაქვს, რომ ეს ოფიციალური ვიზიტი საქართველოში მალე შედგება.” – თქვა კობახიძემ.
რეჯეფ თაიფ ერდოღანი ხელისუფლებაში 2003 წელს, პრემიერმინისტრის რანგში მოვიდა, 2014 წელს კი ის ქვეყნის პირველი პრეზიდენტი გახდა.
ადამიანის უფლებადამცველი საერთაშორისო ორგანიზაციები ერდოღანს ავტორიტარ ლიდერად მიიჩნევენ, რომელიც პოლიტიკურ ოპონენტებსა და კრიტიკოსებს დევნის, ასევე ზეწოლას ახდენს დამოუკიდებელ მედიაზე. მათივე განმარტებით, თურქეთში მოსახლეობის ყოველდღიური ყოფა მზარდმა ინფლაციამ გააუარესა.
2016 წელს თურქეთში სახელმწიფო გადატრიალების მცდელობა ჩაახშეს, რა დროსაც სტამბოლისა და ანკარას ქუჩებში 256 ადამიანი დაიღუპა. შედეგად ხელისუფლებამ ათასობით სამხედრო მოსამსახურე, მოსამართლე, მასწავლებელი და სახელმწიფო მოხელე დააკავა, რომლებიც ერდოღანის თქმით, დევნილობაში მყოფი მისი ოპონენტის, ფეტჰულა გიულენის შთაგონებით მოქმედებდნენ.
