მწერლების, მთარგმნელებისა და გამომცემლების წერილი: მხარს ვუჭერთ კინოს პროფესიონალებს

კინოს მხარდამჭერი წერილი

ქართველი მწერლები, მთარგმნელები და გამომცემლები განცხადებას ავრცელებენ და კინოცენტრის თანამშრომლებს მხარდაჭერას უცხადებენ. მათი თქმით, კინოცენტრის პროფესიონალ თანამშრომლებს სასჯელაღსრულების ოფიცრებითა და საეჭვო გამოცდილების, პოლიტიკურად ანგაჟირებული ხალხით ანაცვლებენ.

11 ივნისს კინოცენტრის დირექტორის მოადგილემ ნინო კუხალაშვილმა განაცხადა, რომ კულტურის სამინისტრომ მისი შტატი გააუქმა და 12 ივლისიდან გათავისუფლებულია თანამდებობიდან. როგორც კუხალაშვილმა აღნიშნა,  წულუკიანმა რეორგანიზაცია დაიწყო, კინოცენტრის დებულებაში ცვლილებები შეიტანა, ხოლო დირექტორის მოვალეობის შემსრულებლად კობა ხუბუნაია დანიშნა, რომელიც ამავე დროს კულტურის სამინისტროს ეკონომიკური დეპარტამენტის უფროსიცაა.

კობა ხუბუნაია 2021 წელს დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს უფროსის მოადგილე იყო, მანამდე კი იუსტიციის სამინისტროს მმართველობის სფეროში შემავალ აღსრულების ეროვნულ ბიუროში საფინანსო საკითხებში ეკონომიკური სამსახურის მრჩეველი.

მოგვიანებით ცნობილი გახდა, რომ კინოცენტრის კინოწარმოების დეპარტამენტის დირექტორის მოადგილედ სახელისუფლებო პროპაგანდისტული არხის, POSTV-ის ჟურნალისტი, ბაჩო ოდიშარია დანიშნეს, რომელმაც რეორგანიზაციის შესახებ დააანონსა.

“ბოლო რამდენიმე წელია ქართული კულტურის სადამსჯელო ოპერაცია მიმდინარეობს:

გვახსოვს წიგნის ცენტრის დახურვა.

გვახსოვს ეროვნული მუზეუმის თანამშრომლების დაუსაბუთებელი და უსამართლო გათავისუფლება და მეცნიერების საეჭვო გამოცდილების მქონე ხალხით ჩანაცვლება. მათთვის საცავებზე წვდომის შეზღუდვა.

გვახსოვს სამინისტროსთვის მიუღებელი ლიტერატურული პერიოდიკისთვის დაფინანსების შემცირება და საბოლოოდ შეჩერება.

გვახსოვს თეატრების ხელმძღვანელების გათავისუფლება და ხელისუფლების ერთგული ჩინოვნიკებით ჩანაცვლება.

გვახსოვს ლიტერატურული კონკურსი „ლიტერა“, რომლის კონტროლიც სამინისტრომ სცადა და კოვზი ნაცარში ჩაუვარდა.

გვახსოვს გელათის გადარეცხილი და ასევე მიტოვებული ფრესკები.

და სხვა მრავალი.

სანაპიროს ქუჩაზე მდგარი კულტურის სამინისტროს შენობა იქცა ციხედ, სადაც ხმა აღარც შედის და აღარც გამოდის.

კულტურის სამინისტროს ბიუჯეტი მინისტრმა პირად ქონებად ჩათვალა და თავისი შეხედულებისამებრ ანაწილებს.

ახლა საქართველოს ეროვნული კინოცენტრის ჯერია. კინოცენტრი ერთ-ერთი წარმატებული ინსტიტუციაა, რომელიც ქართულ კინოინდუსტრიაში მნიშვნელოვან როლს ასრულებდა.

კინოცენტრიდან გაათავისუფლეს და ახლაც ათავისუფლებენ პროფესიონალებს, რომლებიც წლების განმავლობაში ამ წარმატებისთვის მუშაობდნენ. მათ ანაცვლებენ სასჯელაღსრულების ოფიცრებით და საეჭვო გამოცდილების, პოლიტიკურად ანგაჟირებული ხალხით.

ქართველი მწერლები, მთარგმნელები და გამომცემლები სრულად ვუჭერთ მხარს კინოს პროფესიონალებს დამოუკიდებელი კინოცენტრის შენარჩუნებისთვის ბრძოლაში.

მოგიწოდებთ ყველას სოლიდარობისკენ – გუშინ მუზეუმი გაქრა, დღეს კინოცენტრი ქრება, ხვალ კი შეიძლება თქვენთანაც მოვიდნენ.” – ნათქვამია განცხადებაში.

● წულუკიანთან სასამართლოში დავა მუზეუმიდან გათავისუფლებულმა კიდევ ერთმა თანამშრომელმა მოიგო
● ქართულმა კინოაკადემიამ ფილმი, რომელიც ივანიშვილის ხეებს ეხება, ჩვენებებიდან მოხსნა
● “სიკვდილი ხალხის მტრებს, სამშობლოს გამყიდველებს” – პროტესტი წულუკიანის წინააღმდეგ

ეს პირველი შემთხვევა არ არის, როცა საქართველოში ხელოვანები ცენზურისა და პოლიტიკური ჩარევის შესახებ ჩივიან.

საქართველოში კულტურის მინისტრის წინააღმდეგ პროტესტმა პერმანენტული სახე მას შემდეგ მიიღო, რაც ამ პოსტზე ყოფილი იუსტიციის მინისტრი, თეა წულუკიანი დაინიშნა.

იანვარში კულტურის სამინისტროსთან საპროტესტო აქცია გაიმართა სლოგანით – “დიდება პარტიას კულტურის მტრების გამოვლენისთვის.”

პროტესტის მიზეზი გახდა კულტურის სამინისტროს მიერ ბოლო პერიოდში მიღებული რამდენიმე სკანდალური გადაწყვეტილება – ხელოვნების მუზეუმის ძველი შენობის დემონტაჟის გადაწყვეტილება, ან მუზეუმიდან განსხვავებული აზრის მქონე თანამშრომლების გათავისუფლება, ასევე სკანდალი, რომელიც ლიტერატურის მუზეუმის მიერ გამოცემულ წიგნს უკავშირდება.

კულტურის მინისტრის, თეა წულუკიანის გადაწყვეტილებებში საზოგადოების ნაწილი ხედავს პოლიტიკურ რეპრესიებს, ასევე ცენზურისა და განსხვავებული აზრის დევნის მცდელობას.

კიდევ ერთი საკამათო გადაწყვეტილება უკავშირდება თეა წულუკიანის დანიშნულ კინოცენტრის ახალ დირექტორს, კარლო სიხარულიძეს, რომელმაც ერთ-ერთი კონკურსის დამტკიცებული ჟიური თვითნებურად ჩაანაცვლა და ძველი წევრების ნაცვლად, “ქართული ოცნების” მიმართ ლოიალურად განწყობილი ადამიანები დანიშნა, მათ შორის რეჟისორი გოგა ხაინდრავა და პროსახელისუფლებო სატელევიზიო არხის, POSTV-ის წამყვანი ბაჩო ოდიშარია.