კელი დეგნანი: ვაშინგტონში დაბნეულობაა, მკაფიოდ რატომ არ ემიჯნება ოცნება აშშ-სადმი ცრუ ბრალდებებს

კელი დეგნანი ქართულ ოცნებას

საქართველოში ამერიკის ელჩის, კელი დეგნანის თქმით, ვაშინგტონში დაბნეულობაა, თუ რატომ არ ემიჯნება მთავრობა უფრო მკვეთრად და მკაფიოდ იმ ცრუ ბრალდებებს, რომელიც ისმის აშშ-ს მისამართით საქართველოს ომში ჩართვასთან დაკავშირებით [იგულისხმება “ქართული ოცნებიდან” გასული ე.წ. ოთხეული]. დეგნანის განმარტებით, ბოლო კვირებში მან მიიღო კითხვები ვაშინგტონის მაღალი თანამდებობის პირებისგან, რომლებიც სვამენ კითხვებს იმ პოლიტიკოსების მოტივების შესახებ, რომლებიც განაგრძობენ რუსულ დეზინფორმაციაზე დაფუძნებული შეთქმულების თეორიებისა და სიცრუის გამეორებას.

“თუ მმართველი პარტია არ ეთანხმება აღნიშნულ აშკარად ცრუ ბრალდებებს საქართველოს სტრატეგიული პარტნიორის, შეერთებული შტატების წინააღმდეგ, მაშინ არსებობს მოლოდინი რომ ამას ისინი მკვეთრად და მკაფიოდ გაემიჯნებოდნენ.” – აცხადებს დეგნანი.

ელჩმა ასევე ხაზგასმით აღნიშნა, რომ აშშ-ის ინტერესებში არ შედის ომის საქართველოში გავრცელება. მისი თქმით, შეერთებულმა შტატებმა თავიდანვე ნათლად უთხრა საქართველოს ხელისუფლებას, რომ “კარგად გვესმოდა ის განსაკუთრებული ვითარება, რომელშიც საქართველო იმყოფებოდა რუსეთის სამხრეთ ფლანგზე თავისი ტერიტორიის 20%-ის ოკუპაციის პირობებში.”

“ჩვენ კარგად გვესმის, რა რთულ მდგომარეობაში აღმოჩნდა საქართველო და ვაფასებთ იმ ნაბიჯებს, რაც საქართველომ გადადგა უკრაინის მხარდაჭერის გამოსახატად და იმის გასაკეთებლად, რაც შეძლო.” – აღნიშნა დეგნანმა.

მისივე თქმით, “ნამდვილად დასაფასებელია, რომ დაახლოებით 1 კვირის წინ პრემიერმინისტრმა თავისი პოზიცია გამოხატა ამის შესახებ.” დეგნანი ხაზს უსვამს, რომ ეს დადებითად მიანიშნებდა, რომ უმაღლეს დონეზე მაინც ხდება იმის გაცნობიერება, თუ რამდენად საზიანოა ამ სახის პრორუსული დეზინფორმაცია:

“ამგვარი კონსპირაციული თეორიების გამეორება მხოლოდ დაბნეულობას თესავს, აღრმავებს პოლარიზაციას და კითხვებს აჩენს ქართველებსა და ამერიკელებში, თუ რა მოტივი დგას ამ მიმდინარე თავდასხმების უკან.”

კელი დეგნანმა ტელეკომპანია “იმედის” ეთერში განაცხადა, რომ მისი აზრით, ქართველმა პოლიტიკოსებმა, მაშინ როცა სასწორზე ევროკავშირის კანდიდატის სტატუსი დევს, გვერდით უნდა გადადონ განსხვავებები, დასხდნენ მოლაპარაკებების მაგიდასთან და ერთად იმუშაონ ქვეყნის ევროპული მომავლის გეგმაზე.

ამერიკის ელჩი ამბობს, რომ მან 6 თვის განმავლობაში ორჯერ ნახა, როგორ საუბრობდნენ სხვადასხვა პოლიტიკური პარტიების წარმომადგენლები ქვეყნისთვის საჭირო რეფორმებსა და წითელ ხაზებზე. ამიტომ დარწმუნებულია, რომ ამის გაკეთება ახლაც შეუძლიათ.

“მიმაჩნია, რომ პოლარიზაციის შესამცირებლად, ალბათ უფრო კონსტრუქციული იქნება მეტი მსგავსი შეხვედრა და ნაკლები კამათი კამერების წინ. გაცილებით ადვილია ერთმანეთის მოსმენა, ერთმანეთის პოზიციების და წითელი ხაზების გაგება, როცა კამერის წინ არ ხარ. ვფიქრობ, პარტიებს რეალურად აქვთ ამის გაკეთების შესაძლებლობა.“ – განაცხადა კელი დეგნანმა.

● როგორ იმოქმედებს ღარიბაშვილის განცხადებები დასავლეთზე. ექსპერტების შეფასებები
● აბა ომი გინდათ?! – ვინ და რატომ აძლიერებს საქართველოში ომის ბუნებრივ შიშს? ექსპერტების შეფასებები
● როგორია სამყარო, რომელსაც პუტინი აშენებს

უკრაინაში რუსეთის შეჭრის შემდეგ, საქართველოს ხელისუფლება მუდმივად იმეორებს, რომ “გარკვეულ ძალებს” [იგულისხმება უკრაინა და დასავლეთი] საქართველოში “მეორე ფრონტის გახსნა და ქვეყნის ომში ჩათრევა უნდათ.”

საპარლამენტო უმრავლესობის ოთხმა წევრმა, იმისთვის რომ “სიმართლე თავისუფლად ეთქვათ”, მმართველი პარტია და საპარლამენტო თანამდებობები ფორმალურად  28 ივნისს დატოვეს და მოგვიანებით მოძრაობა “ხალხის ძალა” დააფუძნეს.

 ზემოხსენებულ დეპუტატებს მიაჩნიათ, რომ ე.წ. კულისებიდან პოლიტიკური ფაქტებისა და მოვლენების შესახებ მეტი ინფორმაცია უნდა ვრცელდებოდეს და ამის “გახმოვანებისთვის მათ თავისუფალი საპარლამენტო მანდატი სჭირდებათ”, რადგან გუნდის შიგნით შესაძლოა, უხერხულობები შეექმნათ.

“ქართული ოცნებიდან” წასულმა დეპუტატებმა პირველი განცხადებაც მალევე გამოაქვეყნეს, რომელსაც ხელისუფლების ოპონენტებმა უკვე უწოდეს ანტიდასავლური შეთქმულების თეორია. ყოფილი დეპუტატების თქმით, საქართველოს კანდიდატის სტატუსს არც 6 თვის თავზე არავინ მიანიჭებს, “თუ მანამდე ომში არ ჩაერთო ან რუსეთს სანქციები არ დაუწესა.”

წერილი გამოაქვეყნა თავად ბიძინა ივანიშვილმაც. მან დაადასტურა, რომ საქართველოში ამერიკის შეერთებული შტატების ელჩს, კელი დეგნანს შეხვდა. როგორც ივანიშვილი განმარტავს, შეხვედრა ელჩის თხოვნით, 21 მარტს შედგა და ის „დაახლოებით სამ საათს გაგრძელდა“. თუმცა, ივანიშვილს არ დაუკონკრეტებია, თუ რაზე ისაუბრა ამერიკის ელჩთან.

ივანიშვილთან შეხვედრა დაადასტურა კელი დეგნანმაც. ელჩმა განმარტა, რომ მათ შორის არასოდეს ყოფილა საუბარი საქართველოს ომში ჩართვაზე. როგორც დეგნანი ამბობს, მათი შეხვედრები ყოველთვის ეხებოდა აშშ-საქართველოს სტრატეგიული პარტნიორობას და აშშ-ის ძალისხმევას საქართველოს ეკონომიკის, უსაფრთხოებისა და დემოკრატიის განვითარების მხარდაჭერას.