კარასინის თქმით, რუსეთი ყველაფერს აკეთებს, რომ ჩინეთმა და ინდოეთმა ოსეთი და აფხაზეთი აღიარონ

კარასინი სამხრეთ ოსეთის და აფხაზეთის აღიარებაზე

რუსეთის ფედერაციის საბჭოს საერთაშორისო საქმეთა კომიტეტის ხელმძღვანელმა, გრიგორი კარასინმა განაცხადა, რომ რუსეთის ფედერაცია აკეთებს ყველაფერს, რათა ჩინეთმა, ინდოეთმა და სხვა ქვეყნებმა საქართველოს ოკუპირებული ტერიტორიების დამოუკიდებლობა აღიარონ.

გასულ წლებში გრიგორი კარასინი, როგორც საგარეო საქმეთა მინისტრის მოადგილე, ჩართული იყო საუბრების ფორმატში, რომელშიც რუსეთთან ურთიერთობის საკითხებში საქართველოს პრემიერმინისტრის სპეციალურ წარმომადგენელთან, ზურაბ აბაშიძესთან მართავდა დიალოგს.

რუსი მაღალჩინოსანი ცხინვალის რეგიონში რუსეთის მიერ ოკუპირებული ტერიტორიების დამოუკიდებლობის გამოცხადების მე-15 იუბილეს ღონისძიებასთან დაკავშირებით ჩავიდა. კარასინის განმარტებით, ოკუპირებული ტერიტორიების აღიარებაზე, საპირისპირო ზეწოლას ახდენს ამერიკის შეერთებული შტატები.

“ეს საკითხი მარტივი არაა, რადგან არსებობს სხვა ქვეყანაც, ვგულისხმობ კოლექტიურ დასავლეთს, აშშ-ს, რომელიც ზეწოლას სხვა მიმართულებით ახორციელებს. მაგრამ მე, ბუნებით ოპტიმისტი ვარ, აბსოლუტურად მჯერა, რომ ადრე თუ გვიან ეს აღიარება იქნება”. – თქვა კარასინმა.

გამოხმაურება

კარასინის განცხადებას გამოეხმაურა “ქართული ოცნების” თავმჯდომარე ირაკლი კობახიძე. მისი თქმით, ასეთ განცხადებებს “არ უღმავდება.” კობახიძე ფიქრობს, რომ მთავარი არა ეს განცხადება, არამედ საქართველოს ხელისუფლების მიერ წარმოებული “წარმატებული არაღიარების” პოლიტიკაა.

“ასეთი განცხადებები ჩვენ მოგვისმენია, ჩვენთვის მთავარია, რომ საქართველო მთელი ამ წლების განმავლობაში წარმატებით ახორციელებს არაღიარების პოლიტიკას და სწორედ ჩვენი ხელისუფლების არაღიარების პოლიტიკის შედეგია ის, რომ არცერთი ერთეულით არ გაზრდილა იმ ქვეყნების რაოდენობა მთელი ამ წლების განმავლობაში, რომლებსაც აღიარებული აქვთ ე.წ დამოუკიდებლობა.

განცხადებების მიუხედავად, გავაგრძელებთ წარმატებული არაღიარების პოლიტიკის წარმოებას. ასეთი განცხადებები მოგვისმენია ჩვენ, მაგრამ ჩვენი პოლიტიკა არაღიარების კუთხით ყველაფრის მიუხედავად იყო წარმატებული. ეს იმათი საქმეა, მე არ ვუღრმავდები მათ განცხადებებს. მე ვუღრმავდები იმას, თუ როგორია ჩვენი არაღიარების პოლიტიკა და ეს პოლიტიკა არის ძალიან წარმატებული.” – აღნიშნა კობახიძემ.

● ვინ არის დამნაშავე: მედვედევი თუ აფხაზეთის ხელისუფლება? მოსაზრება
● სამხრეთ ოსეთი რუსეთის შემადგენლობაში: ისევ აქტუალურია ეს თემა?
● ცხინვალი რუსეთისკენ მიისწრაფვის, მაგრამ მას იქ არ ელიან. რატომ და რას უნდა ველოდოთ?

ოკუპირებული ტერიტორიების შესახებ საუბარები რუსეთის ფედერაციის მაღალჩინოსნების მიერ ბოლო დღეებში განსაკუთრებით გახშირდა.

26 აგვისტოს, რუსეთის ფედერაციის უშიშროების საბჭოს თავმჯდომარის მოადგილემ და ყოფილმა პრეზიდენტმა, დმიტრი მედვედევმა სამთავრობო-პროპაგანდისტული მედიის, TASS-ის მიერ გამოქვეყნებულ ინტერვიუში იმედი გამოთქვა, რომ საქართველოს მთავრობას ეყოფა პრაგმატიზმი, აღიაროს სამხრეთ ოსეთი და აფხაზეთი. მისივე თქმით, საქართველოსა და რუსეთს შორის ურთიერთობები მალე გაუმჯობესდება.

23 აგვისტოს კი დმიტრი მედვედევმა გამოაქვეყნა სტატია, რომელშიც საქართველოს ოკუპირებული ტერიტორიების რუსეთთან შეერთებით იმუქრება და ამბობს, რომ აფხაზეთსა და სამხრეთ ოსეთში რუსეთთან შეერთების იდეა ძველებურად პოპულარულია.

მისივე მტკიცებით, საქართველო მრავალი წლის განმავლობაში “ახდენდა ოსი ერის შეუფარავ გენოციდს”, ხოლო 2008 წლის მოვლენებში მედვედევი ქართულ მხარეს ადანაშაულებს აგრესიაში და ამბობს, რომ ამ “აგრესიის” მიზანი “დაუმორჩილებელი სამხრეთ ოსეთის მტრულ სახელმწიფოს საზღვრებში დაბრუნება” იყო.

აფხაზეთის უშიშროების საბჭოს მდივანმა სერგეი შამბამ მედვედევის საპასუხოდ განაცხადა, რომ “აფხაზეთში არ არსებობს პოლიტიკური ძალა, რომელიც რუსეთთან შეერთებას ითხოვს.”

აღსანიშნავია ისიც, რომ 2022 წლის პირველ ივნისს ცნობილი გახდა, რომ რუსეთთან შეერთების შესახებ რეფერენდუმი, რომელიც ე.წ. სამხრეთ ოსეთის უკვე ყოფილმა პრეზიდენტმა ანატოლი ბიბილოვმა 17 ივლისისთვის ჩანიშნა, აღარ ჩატარდება.