მიხეილ სააკაშვილი: მე ეჭვი არ მეპარება, რომ კალაშოვი საქართველოს არჩევნებისთვის გაათავისუფლეს

კალაშოვი და სააკაშვილი

საქართველოს მესამე პრეზიდენტი მიხეილ სააკაშვილი ე.წ. კანონიერი ქურდის, ზაქარია (შაქრო) კალაშოვის საპატიმროდან ვადამდე გათავისუფლებას ეხმაურება და ამბობს, რომ მისი გათავისუფლება საქართველოში მოახლოებულ არჩევნებს უკავშირდება. სააკაშვილი არ გამორიცხავს, რომ კალაშოვს რუსეთის მხრიდან “ციხეში მისი საკითხის საბოლოო “მოგვარების” დავალებაც” ჰქონდეს მიღებული.

“რუსეთში ვადის ამოწურვამდე 4 წლით ადრე, ციხიდან ყველაზე ავტორიტეტული კანონიერი ქურდი შაქრო კალაშოვი გამოუშვეს. მე ეჭვი არ მეპარება, რომ ის საქართველოს არჩევნებისთვის გაათავისუფლეს.

როდესაც იუსტიციის მინისტრად დავინიშნე, კალაშოვმა დუდუ დადიანის მეშვეობით 30 ათას დოლარიანი საათი გამომიგზავნა, რომელიც რა თქმა უნდა არ მივიღე, პირიქით რჩევა დავაბარე, რომ საქართველო დაეტოვებინა, თუმცა არ შეშინებია, რადგან შინაგან საქმეთა მინისტრი კახა თარგამაძე იყო, ხოლო შევარდნაძის უშიშროების მინისტრი ვახტანგ ქუთათელაძე.

ჩემი გაპრეზიდენტების შემდეგ, კალაშოვი საქართველოში ჩამოსვლას ვეღარ ბედავდა. მას წყნეთში უზარმაზარი სასახლე ჩამოართვეს.

ჩვენი გადაცემული მასალების საფუძველზე ესპანეთმა დააკავა და მისი გადმოცემის პროცედურა დავიწყეთ. მან კი, ჩემი ინფორმაციით 70 მლნ დოლარი გადაუხადა რუსეთის საგამოძიებო კომიტეტს და რუსებმა საქმე “ჩააწყვეს”, რის შემდეგაც საქართველოს მოქალაქე შაქრო რუსეთს გადასცეს, სადაც ის მალევე გაუშვეს.

თუმცა რამდენიმე წლის შემდეგ, მათ იქაც მოუწიათ მისი დაპატიმრება, 10 წლის მისჯა და მას 6 წელიწადზე ნაკლები გამოუვიდა.

2007 წელს კალაშოვის მასწავლებელი ქურდი უსოიანი, ერევანში ჩამოფრინდა და FBI-ს ინფორმაციით საქართველოში არეულობას იქიდან ხელს უწყობდა.

რუსები ახლაც თვლიან, რომ არჩევნებზე შეუძლიათ დიდი სიურპრიზები მიიღონ და კალაშოვს ქართული კრიმინალური სამყაროს მართვას დაავალებენ. არ გამოვრიცხავ, რომ ერთ-ერთი დავალება ციხეში ჩემი საკითხის საბოლოო “მოგვარება” იყოს.” – წერს სააკაშვილი.

● მიხეილ სააკაშვილი: პუტინმა, ნავალნის სახით, მოიშორა ნომერ პირველი მტერი – მეორე მის ხელშია და მე ვარ
● “სააკაშვილი დაღმავალი ფიგურაა ქართულ პოლიტიკაში”. რას ფიქრობენ ექსპერტები “ნაციონალური მოძრაობის” დაშლაზე
● ახალი კრიმინალური ომი – ანტალიაში საქართველოში დაბადებული “კანონიერი ქურდი” მოკლეს

კრასნოდარის სამხარეო სასამართლომ ზაქარია (შაქრო) კალაშოვის საპატიმროდან ვადამდე გათავისუფლების შუამდგომლობა 13 მარტს დააკმაყოფილა. 

ზაქარია კალაშოვი 2016 წელს დამნაშავედ ცნეს მოსკოვში მდებარე რესტორნის, Elements-ის მფლობელისთვის 8 მილიონი რუბლის გამოძალვაში. ამავე საქმეზე კალაშოვთან ერთად დააკავეს ანდრეი კოჩუიკოვი, მეტსახელად “იტალიელი”, რომელსაც 8 წელი და 10 თვე მიესაჯა.

2015 წლის 14 დეკემბერს რესტორან Elements-თან დაპირისპირებისას, ცეცხლსასროლი იარაღიც გამოიყენეს, რასაც ორი ადამიანის სიცოცხლე შეეწირა. გავრცელებული ვერსიით, დაპირისპირების მიზეზი რესტორნის მეპატრონე ჟანა კიმი და დიზაინერი ფატიმა მისიკოვა გახლდათ.

2017 წლის 19 ივლისს “შაქრო მალადოის” საქმის განხილვის პროცესში კიდევ რადენიმე პირი დააკავეს, მათ შორის რუსეთის საგამოძიებო კომიტეტის მოსკოვის მთავარი სამმართველოს ხელმძღვანელის პირველი მოადგილე, გენერალ-მაიორი დენის ნიკანდროვი, დააპატიმრეს ამავე უწყების პირადი უსაფრთხოების სამმართველოს უფროსი მიხაილ მაქსიმენკო და მისი მოადგილე ალექსანდრ ლამონოვი. იმავე საღამოს რუსეთის საგამოძიებო კომიტეტის კიდევ 7 თანამშრომელი აიყვანეს, რომლებიც გამოძიებაში იყვნენ ჩართულნი. მედიაში გავრცელებული ინფორმაციით, მათ ქრთამის სახით 500 ათასი ევრო მიიღეს, რათა კალაშოვისთვის ბრალდება შეემსუბუქებინათ, ხოლო კალაშოვის “მარჯვენა ხელი” ანდრეი კაჩუიკოვი კი გაეთავისუფლებინათ.

გამოცემა “ნოვაია გაზეტა ევროპის” თანახმად, კალაშოვი რამდენჯერმე იყო დაკავებული. 2006 წელს ის დუბაიში დააკავეს და ესპანეთს გადასცეს. იქ კრიმინალური ავტორიტეტი დამნაშავედ იყო ცნობილი ფულის გათეთრების საქმეში და შვიდ-ნახევარი წლით თავისუფლების აღკვეთა და 20 მლნ ევროს ჯარიმის გადახდა ჰქონდა მისჯილი. მოგვიანებით სასჯელი ცხრაწლიანი პატიმრობით შეეცვალა.

ყველაზე გავლენიანი ქართველი კრიმინალური ავტორიტეტი შაქრო კალაშოვი, იგივე “შაქრო მალადოი” თბილისში, 1953 წელს დაიბადა, კანონიერ ქურდად კი 16 წლის ასაკში მოინათლა. ის აშშ-ის სანქციების შავ სიაში 2019 წელს მოხვდა კრიმინალური სამყაროს 10 სხვა ლიდერთან ერთად.

კანონიერი ქურდები და არჩევნები

ეს პირველი შემთხვევა არ არის, როდესაც ე.წ. კანონიერი ქურდების სახელები არჩევნებთან დაკავშირებით გაისმა. 2012 წლის საპარლამენტო არჩევნებამდე რამდენიმე თვით ადრე, მაშინდელი მმართველი პარტია და შსს აცხადებდა, რომ საზღვარგარეთ მყოფი ქართველი კანონიერი ქურდები აქტიურად უჭერდნენ მხარს “ქართულ ოცნებას” და ცდილობდნენ ზეგავლენა მოეხდინათ არჩევნების შედეგებზე დაშინებისა და შანტაჟის მუქარით.

2021 წელს არასამთავრობო ორგანიზაციებმა — “ინიციატივა მოწყვლადი ჯგუფების რეაბილიტაციისათვის“ (RIVG) და “დემოკრატიისა და უსაფრთხოების განვითარების ინსტიტუტი“ (IDSD) ჩაატარეს კვლევა, რომელშიც წინასაარჩევნო პერიოდში დარღვევებსა თუ დანაშაულებზე, მათ შორის კრიმინალური ავტორიტეტების ჩარევაზე – რესპონდენტები საუბრობენ.

კვლევის თანახმად, ერთ-ერთი მეთოდი, რომელსაც აღნიშნული ჯგუფები იყენებდნენ, არის ოპოზიციის კანდიდატების წინასაარჩევნო შეხვედრებზე „უბნის ავტორიტეტების“ ახლო დისტანციაზე შეჯგუფება, ხმამაღალი გინება და გამომწვევი ქცევა პროვოკაციის მოწყობის და უბნებში დაგეგმილი შეხვედრების ჩაშლის მიზნით.

გარდა ამისა, ზემოქმედების ე.წ. ბერკეტებს შორის არის ფსიქოლოგიური ძალადობაც, როდესაც ე.წ. უბნის ავტორიტეტები, როგორც წინასაარჩევნოდ, ასევე არჩევნების დღეს, უბნებში აქტიურად გამოჩენით ცდილობენ ზემოქმედება მოახდინონ ოპოზიციურად ან ნეიტრალურად განწყობილ ამომრჩეველზე – კენჭისყრის დღეს ისინი ჯგუფდებიან საარჩევნო უბანთან, რითაც მიანიშნებენ ამომრჩეველს, რომ თვალყურს ადევნებენ ხმის მიცემის პროცესს და ქმნიან შთაბეჭდილებას, რომ აკონტროლებენ ამომრჩევლის ხმის მიცემის საკითხს.

რესპონდენტებმა დაასახელეს ისეთი შემთხვევები, როდესაც ე.წ. უბნის ავტორიტეტები ახსენებენ ამომრჩეველს, რომ წინა ხელისუფლების დროს ისინი ცუდ მდგომარეობაში იყვნენ და შესაძლოა, ეს დრო კვლავ დაბრუნდეს.