იყო კი „ისკანდერი“? – მოსაზრებები ბაქოდან

სომხეთის პრემიერ-მინისტრ ნიკოლ ფაშინიანის განცხადებას ყარაბაღის მეორე ომის დროს ოპერატიულ-ტაქტიკური სარაკეტო კომპლექს „ისკანდერის“ გამოყენების ფაქტზე, რეაქცია მოჰყვა არა მხოლოდ სომხეთიდან და რუსეთიდან, არამედ აზერბაიჯანიდანაც. ბაქოს კომენტარები ერთ საკითხამდე დადის: იყო კი „ისკანდერი“?

რა მოხდა?

ოპოზიციური სომხური ტელეარხის, ArmNews-ისათვის მიცემულ ინტერვიუში პრემიერ-მინისტრმა ნიკოლ ფაშინიანმა სენსაციური განცხადება გააკეთა, ფაქტობრივად აღიარა რა ყარაბაღის მეორე ომის დროს ოპერატიულ-ტაქტიკური სარაკეტო კომპლექს „ისკანდერის“ გამოყენების ფაქტი.

ამით უპასუხა სომხეთის ექსპრეზიდენტის სერჟ სარგსიანის ბრალდებას იმის თაობაზე, რომ ახლანდელმა ხელისუფლებამ ეს იარაღი არ გამოიყენა. „აბა, იკითხოს, რატომ არ აფეთქდა „ისკანდერი“? ან რატომ აფეთქდა, მაგალითად, მხოლოდ 10 პროცენტით?“ – ჟურნალისტებით მეშვეობით მიმართა ფაშინიანმა სახელმწიფოს ყოფილ მეთაურს. 

სომხეთის მთავრობის მეთაურის სიტყვებს მეორე დღეს მოსკოვის სასტიკი რეაქცია მოჰყვა.

ილჰამ ალიევის რეაქცია

26 თებერვალს, ადგილობრივი და უცხოელი ჟურნალისტებისათვის გამართულ პრესკონფერენციაზე რუსულ ტელეარხ „ზვეზდას“ კორესპონდენტმა ილჰამ ალიევს კითხვა დაუსვა ფაშინიანის განცხადებაზე, ყარაბაღის მეორე ომის დროს „ისკანდერის“ რაკეტების გამოყენებასთან დაკავშირებით.

„ომის შედეგები უცვლელი დარჩება“ – ილჰამ ალიევმა ჟურნალისტების კითხვებს უპასუხა

ალიევი პრესკონფერენციაზე ოთხი საათის განმავლობაში პასუხობდა ჟურნალისტების შეკითხვებს

„რაც შეეხება სომხეთის პრემიერ-მინისტრის განცხადებას სარაკეტო კომპლექს „ისკანდერთან“ დაკავშირებით, მან კითხვები ჩვენც აღგვიძრა. მე არ ვისურვებდი ამ თემის ირონიზებას, უკვე საკმარისი კომენტარები მოჰყვა როგორც რუსეთის ოფიციალური პირებისა და რუსეთის პარლამენტის, ასევე  ექსპერტების მხრიდან იმის თაობაზე, რომ, რა თქმა უნდა, ძალიან უნდა მოინდომო, რაკეტა 10 პროცენტით რომ აფეთქდეს.

ჩვენ არ გვინახავს „ისკანდერის“ რაკეტების გაშვება, არ გვინახავს. ამიტომ, როცა ეს განცხადება მოვისმინეთ, გუშინ კიდევ ერთხელ დავინტერესდით. მაგრამ არა, ჩვენ ეს არ გვინახავს. ეს მორიგი, მე ვიტყოდი, საჯარო ლაფსუსია. ასეთი უკვე ბევრი იყო.

და, პრინციპში, ის, რაც ამჟამად სომხეთში ხდება, ტრაგიკომედიის რაღაც სცენას წააგავს. აი, ასე დავახასიათებდი იმას, რაც იქ ხდება“, – უპასუხა ალიევმა. 

იყო კი „ისკანდერი“? – აზერბაიჯანის საგარეო საქმეთა ყოფილი მინისტრის კომენტარი

ამ საკითხის კომენტირებისას, აზერბაიჯანის საგარეო საქმეთა ყოფილმა მინისტრმა ტოფიკ ზულფუგაროვმა დაეჭვება გამოთქვა სომხეთის შეიარაღებული ძალების არსენალში ოპერატიულ-ტაქტიკური სარაკეტო კომპლექს „ისკანდერის“ არსებობის თაობაზე.

„სოციალურ ქსელებში ცხარე დისკუსია მიმდინარეობს იმაზე, კარგია „ისკანდერი“ თუ ცუდი… გადავწყვიტე, განმეორებით გამოვაქვეყნო სამი წლის წინანდელი პუბლიკაცია, რათა დისკუსია ჩვენთვის უფრო მნიშვნელოვან კალაპოტში მივმართო – აქვთ ეს კომპლექსი სომხებს თუ არა?

ის სომხებს არასდროს ჰქონიათ, ამიტომაც არ იყენებდნენ. თემა ფაშინიანმა იმისთვის წამოჭრა, რომ სარგსიანს სიმართლე ათქმევინოს – „ისკანდერების“ არსებობა სომხეთის შეიარაღებაში, ესაა რუსეთის პროსომხური წრეების პროპაგანდისტული ფეიკი, რომლის მიზანია აზერბაიჯანის დაშინება სომხეთის „სამხედრო ძლიერებით“. უჯარისკაცო გენერალი ენით იბრძვის.

ახლა ველოდებით, პირველი ვინ წამოაყრანტალებს სიმართლეს, ფაშინიანი, სარგსიანი თუ ლავროვი?“ – დაწერა ზულფუგაროვმა თავის Facebook- გვერდზე.