“ქართული ოცნების” თავმჯდომარის, ირაკლი კობახიძის მტკიცებით, ძალადობის წახალისება ოპოზიციისა და მედიის საშუალებით ხდება. მისივე თქმით, ზურა ჯაფარიძეზე და მიშა მშვილდაძეზე მოძალადეებს ოპოზიციამ, NGO-ებმა და ელჩებმა “დააჯერეს”, რომ ფიზიკური და ვერბალური ძალადობა სამოქალაქო აქტივიზმია.
ოპოზიციური ტელეკომპანიის, „ფორმულას“ ერთ-ერთ დამფუძნებელს და პოლიტიკური გადაცემების წამყვანს, მიშა მშვილდაძეს უცნობი პირი ქუჩაში თავს დაესხა და ფიზიკურად გაუსწორდა. გამოძიება სისხლის სამართლის კოდექსის 126-ე მუხლით მიმდინარეობს, რაც ძალადობას გულისხმობს.
ეს მინიმუმ მეოთხე შემთხვევაა, როდესაც ქუჩაში თავს ესხმიან ხელისუფლების ოპონენტებს. ბოლო ათი დღის განმავლობაში ანალოგიური თავდასხმის ობიექტები გახდნენ პარტია „გირჩი -მეტი თავისუფლების“ ლიდერი ზურა ჯაფარიძე, პუბლიცისტი და ლიტერატორი ლევან ბერძენიშვილი, „ნაციონალური მოძრაობის“ წევრი დავით ოსიყმაშვილი.
“მთელი ამ პერიოდის განმავლობაში, ჩვენ ვისმენდით ძალადობის წამახალისებელ განცხადებებს, სიუჟეტებს და ა.შ… ასევე, მინდა შეგახსენოთ, რომ ადამიანი, რომელიც პოლიციელებს ცეცხლს უკიდებდა, ლამის გმირად გამოაცხადეს, აქაც იყო დუმილი კონკრეტული ელჩების მხრიდან და ეს არის ძალადობის წახალისება. როდესაც ადამიანები გამოდიოდნენ ქუჩაში, რუსთაველზე, დედას აგინებდნენ ადამიანებს, ეს შეფასდა კონკრეტული ელჩის მხრიდან, როგორც გამოხატვის თავისუფლება.
არამარტო ძალადობის წახალისება ხდება, ამ ყველაფერს არქმევდნენ სამოქალაქო აქტივიზმს და ეს ყველამ დაიჯერა, ვინც იძალადა ზურა ჯაფარიძეზე, მიშა მშვილდაძეზე, მათ დააჯერეს სწორედ ამ ადამიანებმა, ოპოზიციამ, NGO-ებმა, ელჩებმა დააჯერეს, რომ ეს ყველაფერი, ფიზიკური თუ ვერბალური ძალადობა არის სამოქალაქო აქტივიზმი. ეს არის ტყუილი. ფიზიკური და ვერბალური ძალადობა არ არის სამოქალაქო აქტივიზმი, ეს უნდა შეიგნოს ყველამ. არავითარი კავშირი არ აქვს ფიზიკურ და ვერბალურ ძალადობას სამოქალაქო აქტივიზმთან“, – განაცხადა კობახიძემ.
ჟურნალისტის კითხვაზე, რომელიც ნინო წილოსანის განცხადებას ეხებოდა და რომელმაც განაცხადა, რომ “წითელი ხაზია მოღალატისა და რუსეთუმეს ძახილი”. ასევე, უმრავლესობის დეპუტატების ბოლოდროინდელ მუქარის შემცველ განცხადებები, რომ “ვინც ოცნებას დაუძახებს რუსებს, ყველა მიიღებს პასუხს”, კობახიძემაც აღნიშნა, რომ “პასუხს მიიღებს ყველა”.
“პასუხს მიიღებს ყველა, ვინც… ძალადობაზე არ არის საუბარი. პასუხს მიიღებს ყველა, რა თქმა უნდა, არაძალადობრივ პასუხს, ვინც ცდილობს საქართველოში დათესოს აგრესია, რადიკალიზმი და ა.შ.” – ამბობს კობახიძე.
27 ივნისს პარლამენტში სიტყვით გამოსვლის დროს, დეპუტატმა ნინო წილოსანმა განაცხადა, რომ დარწმუნებულია, პრორუსების დაძახების შემთხვევაში მამუკა მდინარაძე და ბექა ოდიშარია ოპონენტებს პასუხს გასცემენ.
მანამდე მმართველი პარტიის წევრმა ბექა ოდიშარიამ კომიტეტის სხდომაზე თქვა, რომ ვინც პრორუსს დაუძახებს, “ცხვირ-პირში მიიღებს”. მამუკა მდინარაძემ კი დაიმუქრა, რომ “მოღალატის” დაძახების შემთხვევაში ოპოზიციას აგინებდა.
