"არასდროს დავივიწყებთ იმას, რაც ჩვენთვის ქართველებმა გააკეთეს და აკეთებენ" - ინტერვიუ ანდრი ერმაკთან
ინტერვიუ ანდრი ერმაკთან
“მთავარი არხისთვის” მიცემულ ვრცელ ინტერვიუში, უკრაინის პრეზიდენტის ოფისის ხელმძღვანელმა, ანდრი ერმაკმა განაცხადა, რომ ქართველი და უკრაინელი ხალხი ყოველთვის იმეგობრებენ, “ამას ვერაფერი შეცვლის” და უკრაინელები არასდროს დაივიწყებენ იმას, რაც საქართველოს მოქალაქეებმა მათთვის გააკეთეს და აკეთებენ. მისივე თქმით, უკრაინის გამარჯვება საქართველოს გამარჯვებაც იქნება.
ინტერვიუში ერმაკმა “ქართული ოცნების” წინასაარჩევნო ბანერებზე საუბრისას თქვა, რომ უკრაინას არ სურს ქვეყნის შიდა საქმეებში ჩარევა და ქართველი ხალხის ნებას პატივს სცემს, მაგრამ დარწმუნებულია, რომ ეს ბანერები ქართველების დამოკიდებულებას არ ასახავს.
ამასთან, ერმაკი აღნიშნავს, რომ უკრაინას საქართველოსთან საკომუნიკაციო არხები არასდროს ჩაუკეტია, თუმცა ურთიერთობების სრულფასოვნად აღსადგენად ელის, რომ ოფიციალური თბილისი რუსულ აგრესიას დაგმობს.
რა თქვა ანდრი ერმაკმა. მოკლედ
“არასდროს დავივიწყებთ იმას, რაც ჩვენთვის ქართველებმა გააკეთეს და აკეთებენ”
“მე უბრალოდ მზად ვარ სიამოვნებით მივმართო ჩემს ძმებს, ჩემს მეგობრებს – ქართველ ხალხს და ვთქვა, რომ ჩვენ მეგობრები ვართ, ჩვენ თქვენ ძალიან გაფასებთ და ვიქნებით მეგობრები ხვალაც და ზეგაც და ვერავინ და ვერაფერი ვერ შეცვლის ამას.
არასდროს დაივიწყოთ, რომ თქვენ დიდი ერი ხართ, თქვენ ძლიერი და თავისუფალი, შემოქმედი , მუსიკალური და ნიჭიერი ხალხი ხართ, ის ერი რომელიც მუდამ მზად არის სხვას დახმარების ხელი გაუწოდოს.
იცოდეთ, ის რაც გააკეთეს და აკეთებენ საქართველოს მოქალაქეები ჩვენთვის, უკრაინელებისთვის, არასდროს დავივიწყებთ. ჩვენ ეს ყოველთვის გვემახსოვრება და იცოდეთ, რომ ჩვენი გამარჯვება თქვენი გამარჯვებაც იქნება, რადგან ეს არის მაგალითი იმისა, თუ როგორ არ უნდა დავნებდეთ არასდროს.
ეს არის მაგალითი იმისა, თუ როგორ უნდა ვიყოთ ყოველთვის გულახდილები, არავის არ უნდა შევუშინდეთ და ყოველთვის უნდა გვჯეროდეს, რომ სიკეთე, რწმენა, თავისუფლება ყოველთვის გაიმარჯვებს, რაც არ უნდა რთული იყოს დღეს, რადგან ყველაზე რთული, ყველაზე ბნელი ღამე ხომ ყოველთვის განთიადის წინ არის. ჩვენ გავიმარჯვებთ!
პირადად ვიცი, რა ურთიერთობებია ჩვენს ხალხებს შორის, ძალიან მიყვარს თქვენი ქვეყანა, ბევრჯერ ვარ ნამყოფი. ბევრი მეგობარი მყავს და ვიცი, როგორი თბილი, ამაყი, მართლაც ძალიან ლამაზი, გულწრფელი და თავისუფლების, დამოუკიდებლობის მოყვარული ხალხი, დიდი ერია.
რა თქმა უნდა, ჩვენს ხალხებს ერთნაირი ფასეულობები და ბრძოლის სულისკვეთება აერთიანებს. ეს მე ჩემი თვალით მაქვს ნანახი.
საქართველოში ვიყავი იმ დღეებში, როცა რუსული ტანკები თბილისთან იდგნენ, მე ვიცი, რას გრძნობდით თქვენ მაშინ და ახლა ძალიან კარგად მესმის, რატომ გრძნობენ ქართველები ასე სიღრმისეულად იმ ტკივილს, რომელსაც ჩვენ დღეს განვიცდით.”
“დარწმუნებული ვარ, ეს [ქართული ოცნების ბანერები] არ ასახავს ქართველების დამოკიდებულებას“
“მე ინტერნეტში ვნახე ეს ბილბორდები. სიმართლე გითხრათ, არ მინდოდა ამ საკითხზე კომენტარის გაკეთება, რადგან თქვენ არჩევნები გაქვთ წინ. ეს თქვენზეა დამოკიდებული, ვის აირჩევთ. ჩვენ პატივს ვცემთ ქართველი ხალხის ნებას და არჩევანს. პრეზიდენტ ზელენსკისა და მისი გუნდისთვის ძალიან მნიშვნელოვანია სხვა ქვეყნების პატივისცემა.
ჩვენ არასოდეს ჩავერევით სხვის შიდა საქმეებში, მაგრამ არც არავის მივცემთ ნებას, ჩვენ საქმეებში ჩაერიოს. ამიტომ მინდა ვთქვა:
მე აბსოლუტურად დარწმუნებული ვარ, რომ ეს იდეა არ ეკუთვნის ქართველ ხალხს და ეს ნამდვილად არ ასახავს ქართველების დამოკიდებულებას უკრაინის მიმართ. მჯერა, რომ ქართველი ხალხი ხედავს სიმართლეს და ამიტომ უჭერს მხარს უკრაინას რუსი აგრესორების წინააღმდეგ ბრძოლაში.
გულწრფელად გეუბნებით, თქვენ საამაყო შვილები გყავთ, იმიტომ, რომ ეს ადამიანები უბრალოდ კი არ ჩამოვიდნენ უკრაინაში და გვეხმარებიან სხვადასხვა საშუალებით, ისინი მართლაც ძალიან დიდ საქმეს აკეთებენ.”
26 სექტემბერს თბილისის ქუჩებში გამოჩნდა ბანერები, სადაც ერთ მხარეს ომისგან დანგრეული, გაპარტახებული უკრაინის ქალაქების შავ-თეთრი ფოტოებია, მეორე მხარეს კი “მშვიდობიანი და ლამაზი” საქართველო.
ეს მმართველი პარტიის წინასაარჩევნო ნოუჰაუა – ამ ფორმით “ქართული ოცნება” ცდილობს ამომრჩევლებს თავისი მთავარი ნარატივი კიდევ ერთხელ მიაწოდოს – “ქართული ოცნების” ხელისუფლება იმდენად ბრძენი და წინდახედულია, რომ საქართველოში მშვიდობაა აი უკრაინელებმა კი, იგივე გამჭრიახობა ვერ გამოიჩინეს, ამიტომ, იქ ომი და ნგრევაა.
“ჩვენ არასდროს ჩაგვიკეტავს არხები, მაგრამ ველით, რომ თბილისმა რუსული აგრესია დაგმოს”
ჩვენ არასდროს არ ჩაგვიკეტია ეს არხები (საკომუნიკაციო არხები) და არასდროს არ გვითქვამს, რომ ვსვამთ წერტილს. ჩვენ გახსნილები ვართ, მაგრამ იმისთვის, რომ აღვადგინოთ ის ურთიერთობები, რომლებიც უნდა იყოს ჩვენს ქვეყნებს შორის, ჩვენ ველით, რომ უნდა მოხდეს აბსოლუტურად სამართლიანი შეფასება იმისა, რაც ხდება. ჩვენ ველით, რომ ოფიციალურმა თბილისმა დაგმოს რუსული აგრესია.
ჩვენ ვესაუბრეთ საქართველოს პრეზიდენტს, ის შვეიცარიაში იყო მშვიდობის სამიტზე.
მთავრობის დონეზე ასეთი საუბარი პრაქტიკულად არ არის, სამწუხაროდ. ჩვენ სადღაც ვხედავთ ქართულ დელეგაციებს, ბოლოს ვნახეთ გენერალურ ასამბლეაში, მაგრამ სამწუხაროდ, ასეთი საუბარი, როგორიც უნდა იყოს, არ არის…
სამწუხაროდ, საქართველოს ოფიციალური პირების გამოსვლებში ჩვენ ვერ გავიგეთ რუსული აგრესიის დაგმობის სიტყვები, სიტყვები იმის შესახებ, რომ ის რაც დღეს ხდება, ეს აბსოლუტურად არ შეესაბამება საერთაშორისო სამართალს და ეს უნდა იქნას შეჩერებული.
ასეთი დაგმობა არ მოგვისმენია ბავშვების კლინიკის დაბომბვის შემდეგ, სადაც ონკოლოგიური პაციენტები იყვნენ, ამ და სხვა ბევრი შემზარავი ფაქტის შემდეგ დუმილი?.. დუმილი გაუგებარია, მე ვფიქრობ, რომ ეს უკვე სცდება ყველანაირ ფარგლებს.
არადა, საქართველოსთვის აბსოლუტურად გასაგებია, რაც ხდება ჩვენთან, ეს ხომ თქვენ ჩვენზე ადრე გამოიარეთ. თქვენც გაქვთ ოკუპირებული ტერიტორიები. ისინი თავისთავად არ გათავისუფლდება, ამაზე თქვენ უნდა იზრუნოთ.
რუსეთი დღესაც კლავს უკრაინელებს. ამიტომ დღეს რუსეთის მხარეს გადადგმული ნებისმიერი ნაბიჯი, რომელიც ეხმარება მათ სანქციებისთვის თავის არიდებაში გაუგებარია, მაშინ როდესაც მთელს ევროპაში აუქმებენ რეისებს, რუსეთისთვის ხურავენ საჰაერო სივრცეს – რუსების დიდი ნაკადი ჩამოდის საქართველოში.”
