ამერიკელი სენატორები: ოცნების უარი EU-სთან მოლაპარაკებებზე ქართველი ხალხის ღალატია
ჰელსინკის კომისიის მიმართვა
აშშ-ს ჰელსინკის კომისიის თანათავმჯდომარე სენატორები ბენ კარდინი, როჯერ ვიკერი და ჯონ კორნინი “ქართული ოცნების” მიერ ევროკავშირში გაწევრიანების მოლაპარაკებების შეჩერებასა და მიმდინარე საპროტესტო აქციებს გამოეხმაურნენ. მათი თქმით, ოცნების უარი ევროკავშირთან მოლაპარაკებებზე ქართველი ხალხის ღალატია.
სენატორებმა განცხადებაში ქართველი ხალხისა და მათი ევროატლანტიკური მისწრაფებებისადმი მხარდაჭერა გაიმეორეს და ივანიშვილის რეჟიმის მიერ მშვიდობიანი პროტესტის ძალადობრივი გზით ჩახშობის მცდელობები დაგმეს.
“ქართული ოცნების გადაწყვეტილება, უარი თქვას ევროკავშირში გაწევრიანების მოლაპარაკებებზე, სრული ღალატია ქართველი ხალხის ცხადი და აბსოლუტური სურვილისა, იცხოვრონ ევროპული ღირებულებებისა და ინსტიტუტების [გარემოცვაში]. ასე იქცევა არა ის მთავრობა, რომელიც დემოკრატიული რეფორმებისა და პლურალიზმისკენაა მიდრეკილი, არამედ სახიფათო რეჟიმი, რომელსაც საქართველო რუსული სტილი ავტოკრატიისკენ მიჰყავს. ეს ქმედებები უხეშად არღვევს დემოკრატიის საერთაშორისო ნორმებს და ძირს უთხრის ქართველი ხალხის ლეგიტიმურ მისწრაფებებს.
ჩვენ კატეგორიულად ვგმობთ მშვიდობიანი დემონსტრანტების წინააღმდეგ განხორციელებულ ძალადობას – ცრემლსადენი გაზის, რეზინის ტყვიების, წყლის ჭავლის მანქანების, ცემის, მასობრივი დაკავებების ადგილი თბილისის ქუჩებში არ არის. საქართველოს ხელისუფლება, რომელიც ადამიანის უფლებების დარღვევასა და დემოკრატიული პრინციპების ეროზიაზეა პასუხისმგებელი, ანგარიშვალდებულია საკუთარი ხალხისა და საერთაშორისო საზოგადოების წინაშე. ქართველი ხალხის მიერ გაღებული მსხვერპლი ევროატლანტიკური ინტეგრაციისთვის ჩვენს განგრძობად სოლიდარობასა და მოქმედებას მოითხოვს”. – წერია სენატორების განცხადებაში.
რამდენიმე დღის წინ საქართველოში განვითარებულ მოვლენებს გამოეხმაურა აშშ-ს ჰელსინკის კომისიის მეორე თავმჯდომარე და რესპუბლიკელი კონგრესმენი ჯო უილსონიც. განცხადებაში წერია, რომ საქართველოს ერთპარტიული პარლამენტის მიერ დამტკიცებული მთავრობა არალეგიტიმურია. ამასთან, კომისია გმობს მშვიდობიანი აქციის ძალადობრივ დაშლას და ამბობს, რომ ქართველი ხალხის გვერდით დგას.
ჰელსინკის კომისიამ აშშ-ს სახელმწიფო დეპარტამენტს იმ პირების დასჯისკენაც მოუწოდა, რომლებიც საქართველოში მშვიდობიანი პროტესტის უფლებასა და არჩევანის თავისუფლებას ზღუდავენ, აშშ-ს ახლანდელ და მომავალ ადმინისტრაციებს კი მოუწოდა, რომ ქართველ ერს დემოკრატიისა და თავისუფლების აღდგენაში მხარი დაუჭიროს.
უილსონმა, რომელიც აშშ-ს არჩეული პრეზიდენტის, დონალდ ტრამპის ახლო გარემოცვიდანაა, იმავე დღეს X-ზე დაწერა, რომ აშშ-მ ქართული ოცნება – “რუსეთის არალეგიტიმური მარიონეტები” უნდა დაასანქციროს.
