"გირჩი" იყოფა. ზურაბ ჯაფარიძე პარტიის სხვა ლიდერებთან მუშაობას წყვეტს

პოლიტიკური პარტია “გირჩი” დაიშალა. მოძრაობის ერთ-ერთმა დამფუძნებელმა და ლიდერმა ზურაბ ჯაფარიძემ ფეისბუკზე დაწერა პოსტი, სადაც აღნიშნავს, რომ პარტიის სხვა ლიდერებთან – იაგო ხვიჩიასთან, ვახო მეგრელიშვილთან და სანდრო რაქვიაშვილთან პარტიულ თანამშრომლობას წყვეტს:

“სალამი მეგობრებო, მოკლე ინფორმაცია მინდა მოგაწოდოთ – სამწუხაროდ ერთი მხრივ ჩემი, ხოლო მეორე მხრივ იაგოს, ვახოს და სანდროს გზები გაიყო. მე აღარ ვაპირებ მათთან ერთად გირჩის კეთებას.”

კონკრეტულად რა გახდა ამ გადაწყვეტილების მიზეზი, ჯაფარიძე არ ამბობს. მისი თქმით, “ბევრი მიზეზი” არსებობს.

გირჩში განხეთქილება დროში დაემთხვა ხელისუფლებასა და ოპოზიციას შორის მიმდინარე მოლაპარაკებების პროცესს პარლამენტში შესვლა-არშესვლასთან დაკავშირებით.

ჯაფარიძის ამ გადაწყვეტილებას წინ უძღოდა სკანდალი, რომელშიც პარტია ერთ-ერთი ლიდერის, იაგო ხვიჩიას განცხადების გამო აღმოჩნდა.

ბოლო დღეების განმავლობაში სოციალურ ქსელებში მწვავე განხილვის საგანი გახდა იაგო ხვიჩიას ფეისბუქ-პოსტი, რომელიც ბავშვთა პორნოგრაფიას ეხება.

ხვიჩია ფეისბუკზე გამოეხმაურა შს სამინისტროს მიერ ერთი პირის დაკავებას, რომელსაც ბრალად ედება არასრულწლოვნის შემცველი პორნოგრაფიის შეძენა, შენახვა, ფლობა და სარგებლობა.

“ანუ? პორნო გადმოწერა, დაასეივა, ერთხელაც გადაწყვიტა ესარგებლა და დაიჭირეს? სულ გააფრინეს,” – დაწერა ხვიაჩიამ და ეს დაკავება გააპროტესტა.

პოსტს მკვეთრი აზრთა სხვადასხვაობა მოჰყვა თავად “გირჩშიც”. პარტიის ერთ-ერთმა დამფუძნებელმა და შემომწირველმა ნინო დარსაველიძემ საერთო კრების მოწვევა მოითხოვა.

“როდესაც 22 ადამიანი ვაფუძნებდით გირჩს, როდესაც უამრავმა ადამიანმა ჩადო ძალისხმევა იმაში, რომ ამ პოლიტიკური გაერთიანების ხმა ისმოდეს, ძალიან ცოტას ექნებოდა ჩაფიქრებული, რომ პედოფილიის მოხმარების გაპრავებამდე დავა ეს გაერთიანება,” – ამბობს დარსაველიძე.

“გირჩი” დატოვა მწერალმა ტორესა მოსიმაც.

“რაკი ჯაფარამ დაპოსტა და მოხდა ის, რაც მოხდა, ვფიქრობ ჩემი მხრიდან მოცდა და გადადება აღარ ღირს. მე ვწყვეტ ყველანაირ პოლიტიკურ პროცესში მონაწილეობას” – წერს ტორესა მოსი.

● ფიტნესკლუბი, რომელიც რეგულაციების დარღვევისთვის დააჯარიმეს, “გირჩის” ლიდერმა იქირავა

რა არის “გირჩი”?

მემარჯვენე-ლიბერტარიანული პარტია გირჩი 2016 წელს, ყოფილი მმართველი გუნდიდან „ნაციონალური მოძრაობიდან“ ოთხი დეპუტატის — ზურაბ ჯაფარიძის, პავლე კუბლაშვილის, გიორგი ხაჩიძისა და გიორგი მელაძის წამოსვლის შემდეგ შეიქმნა.

“ახალი პოლიტიკური ცენტრი – გირჩი” ასე გაეცნო ეს პარტია ამომრჩეველს. პარტიის სიმბოლიკის ნაწილია მწვანე გირჩი თეთრ ფონზე, როგორც სიახლის სიმბოლო.

2020 წლის საპარლამენტო არჩევნებში ამ პარტიამ 2.89 პროცენტი მიიღო.

„გირჩის“ ლიდერი ზურაბ ჯაფარიძე 2018 წლის საპრეზიდენტო არჩევნებში მონაწილეობდა და პირველ ტურში ამომრჩეველთა ხმების 2,26 პროცენტი მიიღო – ეს 36 034 ხმაა.

„გირჩის“ პოლიტიკური დღის წესრიგის ერთ-ერთი მთავარი მიმართულებაა თავისუფალი ბაზარი, დერეგულირებული ბიზნესი, შრომის ინსპექციის და სხვა სახელმწიფო მარეგულირებლების გაუქმება, ნარკოტიკების ლეგალიზაცია, საკონტრაქტო სამხედრო სამსახურზე გადასვლა და სავალდებულო სამხედრო გაწვევის გაუქმებაა. გაერთიანებაში ასევე გამოდიან სოციალური დახმარებებისა და სუბსიდიების გაუქმების მოთხოვნით და ეკონომიკაში სახელმწიფოს მინიმალური ჩარევის მომხრე არიან.

„გირჩი“ განსხვავდება ტრადიციული ქართული პარტიებისგან. მისი მხარდამჭერები, ძირითადად, ახალგაზრდები არიან, რომლებიც პარტიის ულტრალიბერალურ შეხედულებებს უჭერენ მხარს. “გირჩის” ლიდერები აქტიურები არიან სოციალურ ქსელებში და დროდადრო არაორდინარულ აქციებს მართავენ.

მაგალითად, 2016 წლის ახალი წლის ღამეს, „გირჩის“ აქტივისტებმა საკუთარი ოფისის ეზოში დემონსტრაციულად დათესეს კანაფი. რამდენიმე თვის წინ კი თბილისში მარიხუანის კოსტიუმირებული ფესტივალი გამართეს.

„გირჩის“ წარმომადგენლების სარჩელის დამსახურებით, 2018 წლის ივლისში საკონსტიტუციო სასამართლომ ფაქტობრივად დააკანონა ქვეყანაში მარიხუანის მოხმარება, როდესაც ადმინისტრაციული ჯარიმა გააუქმა.

2017 წლის აპრილში, „გირჩმა“ დაარეგისტრირა რელიგიური ორგანიზაცია, „საქართველოს ქრისტიანული, ევანგელისტური, პროტესტანტული ეკლესია – ბიბლიური თავისუფლება“. ამით “გირჩმა” მოძებნეს ახალგაზრდების სამხედრო სავალდებულო სამსახურიდან კანონიერად გათავისუფლების გზა – ორგანიზაციაში მიდის წვევამდელი, მას აძლევენ ცნობას, რომ ის სასულიერო პირია და სახელმწიფო მას ათავისუფლებს სამსახურისგან, რადგანაც, ქართული კანონმდებლობის თანახმად, სამხედრო სამსახურში გაწვევა შეიძლება გადავადდეს, თუ ადამიანი სასულიერო პირია ან სასულიერო სემინარიაში სწავლობს.