„სტრატეგიული ანალიზის ცენტრის” დამფუძნებელი გიორგი რუხაძე მაიკლ მაკფოლის ინტერვიუს გადაცემა „რეზიუმეში“აფასებს და ამბობს, რომ სანქციები უფრო მოულოდნელად მოდის, ვიდრე წინასწარი დაანონსებით. მისი განმარტებით, მაკფოლის მხრიდან ეს არის ბოლო გაფრთხილება.
რუსეთში ამერიკის შეერთებული შტატების ყოფილი ელჩის და უკრაინის პრეზიდენტის მიერ შექმნილი რუსეთის სანქციების ჯგუფის კოორდინატორის, მაიკლ მაკფოლის თქმით, მათ საკმაოდ მყარი მტკიცებულებები აქვთ, რომ ქართველი ინდივიდები და ორგანიზაციები რუსეთს რუსეთს სანქციების გვერდის ავლაში ეხმარებიან. ამის შესახებ მან “რადიო თავისუფლებასთან” ინტერვიუში ისაუბრა.
“რაც ამ ეტაპზე შემიძლია გაგიმხილოთ, არის შემდეგი: ჩვენს ჯგუფს ნამდვილად აქვს განხილული კონკრეტული ინდივიდები და ორგანიზაციები საქართველოდან, რომელთა სანქცირებაზე ვფიქრობთ. ასე რომ, დაელოდეთ მოვლენათა განვითარებას – ახალ დოკუმენტებს ზაფხულის განმავლობაში გამოვაქვეყნებთ.
გვაქვს საკმაოდ მყარი მტკიცებულებები, რომელიც მიუთითებს, რომ ისინი ეხმარებიან რუსეთს სანქციებზე გვერდის ავლასა ან, ასე ვთქვათ, “გზის მოჭრაში”, და ჩვენ გვსურს ამას ნათელი მოვფინოთ. იმაზე, რომ საქართველო ნამდვილად არის ჩართული ამაში, ისიც მიუთითებს, რომ დავასახელებთ ცნობილ გვარებს. ჯერ საბოლოო გადაწყვეტილება არ გვაქვს მიღებული და ამიტომაც ვფრთხილობ.” – ამბობს მაიკლ მაკფოლი.
გიორგი რუხაძე:“სანქციების საკითხებში აშშ-ის, ევროკავშირისა და გაერთიანებული სამეფოს წარმომადგენლები ერთად რომ ჩამოვიდნენ, გვაჩვენეს 38 დასახელების პროდუქტის ჩამონათვალი, რომელთა გატანა რუსეთში არ შეიძლება. მათი შეხვედრების და ბრიფინგების ამოცანა არ იყო ვიღაც დაესანქცირებინათ, მათი ამოცანა იყო პრევენცია მოეხდინათ, რომ საქართველოს გავლით რუსეთს არ მიეღო ისეთი საქონელი, რომელსაც შემდგომ სამხედრო ინდუსტრიაში გამოიყენებდა. რაც შეხება მაკფოლის ჯგუფს, მათ არ აქვთ პრევენციის ამოცანა, საგამოძიებო ორგანოა, რომელიც ფაქტებს ეძებს და თუ პოულობს, თავად ვერ დაასანქცირებს, ის ამ ინფორმაციას აწვდის აშშ-ს, ევროკავშირს და ამაზე დაყრდნობით იღებენ პოლიტიკოსები გადაწყვეტილებას.
სანქციების საკითხებში აშშ-ის, ევროკავშირისა და გაერთიანებული სამეფოს წარმომადგენლებს სანქციების გვერდის ავლასთან დაკავშირებით ინფორმაცია, რომც ჰქონოდათ ბრიფინგზე არ იტყოდნენ.
სანქციები უფრო მოულოდნელად მოდის, ვიდრე წინასწარი დაანონსებით. მგონია, რომ მაკფოლის მხრიდან ეს არის ბოლო გაფრთხილება, რომ თუ ვინმე რამეს აკეთებს, დროზე მოახდინონ რეაგირება. ასევე მინიშნება გააკეთა სახელებზე და გვარებზე.
ქვეყნისთვის ძალიან მძიმეა, როცა ხელისუფლების წარმომადგენელი სანქცირდება, რადგან ეს ნიშნავს, რომ ის ხელისუფლებას იყენებს რომ რუსეთს მიეხმაროს.
ცუდია ისიც, რომ „აირზენა“ დასანქცირდა და არ გამოვრიცხავ, რომ მალე საერთაშორისო სანქციების ქვეშ მოექცეს. კიდევ უფრო ცუდი იქნება, თუკი თანამდებობის პირები დასანქცირდებიან.
დაველოდოთ მაკფოლის შემდგომ განცხადებებს, მაგრამ ტყუილად ის ამ განცხადებას არ გააკეთებდა. მგონია, რომ ცოტა დროა დარჩენილი, იმისთვის, რომ ივანიშვილმა და მის გარშემო მყოფმა ადამიანებმა გაიაზრონ.
“ქართულ ოცნებას“ თავი ყეყეჩად უჭირავს და ამბობს, რომ უსამართლობაა, არაობიექტურია. რა მნიშვნელობა აქვს ობიექტურია თუ არაობიექტური. ფაქტია, რომ შენ ეჭვმიტანილი ქვეყნების სიაში ხარ.“
