ფუნდამენტალისტის ამოცნობის 5 ხერხი
საქართველოში ბევრი ადამიანი მიიჩნევს, რომ რელიგიური ექსტრემიზმი მხოლოდ ისლამში გვხვდება, მართლმადიდებლობა კი, მისი ნებისმიერი გამოვლინებით, ყველაზე სამართლიანი რელიგიაა. ყველაზე საინტერესო ისაა, რომ ადამიანები, რომლებსაც გულწრფელად სწამთ საკუთარი რწმენის განსაკუთრებული, ყოვლისმომცველი დემოკრატიულობის, თავად აღმოჩნდებიან ხოლმე ფუნდამენტალისტები. წარმოგიდგენთ თანამედროვე ქართველი ფუნდამენტალისტის რამდენიმე მახასიათებელს.
1.
ის ეთაყვანება პატრიარქს, სიყვარულით ეპყრობა მის ფოტოებს, რომლებსაც რეგულარულად აქვეყნებს სოციალურ ქსელებში თხოვნით, – ‘ყველამ თითო გული დაუწეროს’ კომენტარების ველში. თვალყურს ადევნებს პატრიარქის ჯანმრთელობას და ძალიან ეშინია მისი სიკვდილის, რასაც, მისი რწმენით, სამყაროს აღსასრული მოჰყვება. მისი აზრით, სავარაუდოდ, აპოკალიფსი მხოლოდ საქართველოს მასშტაბით დადგება, მაგრამ არ არის გამორიცხული, რომ მთელი მსოფლიო დადგეს აღსასრულის წინაშე.
2.
ის მზადაა, დიდხანს იკამათოს და არწმუნოს ნებისმიერი ეროვნების წარმომადგენელი, რომ ქართველებმა ბევრად უფრო ადრე მიიღეს ქრისტიანობა, ვიდრე იმ ხალხმა, რომელსაც მისი თანამოსაუბრე წარმოადგენს. ამ მოსაზრების დამტკიცება მისთვის ძალიან მნიშვნელოვანია, რადგან მას საკუთარი ერის განსაკუთრებულობის სწამს; და თან დარწმუნებულია, რომ სწორედ მისი რელიგიაა ყველაზე ძლიერი, მტკიცე, წმინდა და ჭეშმარიტი.
3.
დარწმუნებულია ქართველების გამორჩეულობაში და სწამს, რომ მის ხალხს თავად ღვთისმშობელი მფარველობს. კი, შესაძლოა ის სხვებსაც მფარველობდეს, მაგრამ საყოველთაოდაა ცნობილი, რომ საქართველო ღვთისმშობლის წილხვედრი ქვეყანაა და სწორედ ამის გამო არ შეიძლება საქართველოსთან ომი – ღვთისმშობლის წილხვედრობის, და არა სუვერენიტეტის, საერთაშორისო სამართლისა და სხვა მსგავსი სისულელეების გამო.
4.
ძალიან ეშინია ყველაფრის, რაც დასავლურია. სჯერა, რომ ევროპაში მხოლოდ ჰომოსექსუალები და პედოფილები ცხოვრობენ, რომლებსაც ერთი სული აქვთ, საკუთარი ‘გადახრები’ გადასდონ ქართველ ახალგაზრდებს, რომლებიც ჯერ მთლად ბოლომდე არ გარყვნილან. მისთვის ‘ევროპული ღირებულებები’ ცალსახად სალანძღავი სიტყვათშეთანხმებაა. ჯორჯ სოროსი კი სატანაა, ანდა – ანტიქრისტე.
5.
ის იცავს ერში გაბატონებულ მორალურ ფასეულობებს; არასდროს იხევს უკან, როდესაც ხედავს, რომ ამ ღირებულებებს საფრთხე ექმნება და პატივს სცემს ‘სილამაზეს’, კერძოდ კი: ტრადიციებს, ჩვეულებრი სოციალურ როლებს – ოჯახის პატრიარქალურ წყობას; მიაჩნია, რომ ქალიშვილობის ინსტიტუტი ძალიან მაღალი ღირებულებაა და მასზე უარის თქმით ქვეყანა სასიკვდილო განაჩენს გამოუტანს საკუთარ თავს; ჩასახვის საწინააღმდეგო აბები კი ბოროტებაა. და თუ ამ საშუალებაზე უარს იტყვის მთელი ერი, მაშინ, სავარაუდოდ, შესაძლებელი იქნება ქვეყნის უწინდელი დიდების აღდგენა.
ყოველივე ზემოთ აღინიშნულს მართლმადიდებელი ექსტრემისტი მტკიცედ, აგრესიულად, თუმცა არგუმენტების გარეშე იცავს. ფუნდამენტალისტი ოპონენტს, არგუმენტების ნაცვლად, ამგვარი სიტყვებით ამკობს – ‘სატანა სოროსის მიერ საქართველოს გასანადგურებლად დაქირავებული მოღალატე გეი’.
მასალის გამოქვეყნების თარიღი: 25 ნოემბერი, 2015
