მოსკოვში, მეორე მსოფლიო ომში გამარჯვების აღლუმზე ფაშინიანი არ ჩავა. უარი თქვეს სხვა ლიდერებმაც

სომხეთის პრემიერ-მინისტრი მოსკოვში, მეორე მსოფლიო ომში გამარჯვების 75-ე წლისთავისადმი მიძღვნილ აღლუმზე არ წავა. ნიკოლ ფაშინიანმა ამის შესახებ რუსეთის პრეზიდენტს შეატყობინა წერილით, რომელშიც კორონავირუსის ეპიდემიასთან დაკავშირებული სიტუაციის გამწვავებაზეა საუბარი.

სომხეთის პრემიერი ერთადერთი არ არის, ვინც უარი თქვა მოსკოვში ჩასვლაზე. თუმცა, მანამდე, მიწვევაზე თანხმობა განაცხადა. რუსეთის დედაქალაქში, ასევე არ წავლენ თურქმენეთის, აზერბაიჯანისა და ხორვატიის პრეზიდენტები და იაპონიის პრემიერ-მინისტრი.

ამასთან დაკავშირებით, 23 ივნისს, რუსეთის პრეზიდენტის პრესმდივანმა, დმიტრი პესკოვმა განაცხადა, რომ რუსეთი გაგებით ეკიდება იმ ფაქტს, რომ ზოგიერთი ქვეყნის ლიდერს არ შეუძლია ჩასვლა „ამა თუ იმ მიზეზით“. უარის მიზეზად უმრავლეს შემთხვევაში მითითებულია კორონავირუსის პანდემიის პირობებში დაწესებული შეზღუდვების რეჟიმი.

ამავდროულად, თვითონ სომხეთში, ნიკოლ ფაშინიანის უარი კრემლის მიწვევაზე არაერთგვაროვნად მიიღეს.

• 1 ივლისიდან პუტინი მარადიულად დარჩება რუსეთის ხელისუფლებაში
• ვის და რა დახმარებას უწევენ სომხეთში, კორონავირუსის ეკონომიკური შედეგების დასაძლევად

ფაშინიანის წერილი 

საკუთარ გზავნილში, სომხეთის პრემიერმა ხაზი გაუსვა, რომ დიდ სამამულო ომში გამარჯვება „ჩვენი საერთო მიღწევაა“.

“როგორც მოგეხსენებათ, სიამოვნებით მივიღეთ თქვენი მოწვევა და ვაპირებდი მოსკოვში ჩამოსვლას საზეიმო ღონისძიებებში მონაწილეობის მისაღებად. თუმცა, როგორც მოგვიანებით გაირკვა, არსებული ეპიდემიოლოგიური ვითარება არ მაძლევს ამ ვიზიტის განხორციელების შესაძლებლობას. აქედან გამომდინარე, გადავწყვიტე თავი შევიკავო მოსკოვში ვიზიტისგან, რაც დეტალურად იყო განხილული და შეთანხმებული ჩვენ აპარატებს შორის. ვიმედოვნებ, რომ მალე შევხვდებით და საშუალება მოგვეცემა განვიხილოთ ჩვენ ქვეყნებს შორის სამოკავშირეო ურთიერთობის დღის წესრიგში არსებული საკითხები”.

მაგრამ სომხეთი მაინც იქნება წარმოდგენილი მოსკოვში აღლუმზე. ამის შესახებ, Facebook-ის საკუთარ გვერდზე, პრემიერის პრესმდივანმა, მანე გევორგიანმა დაწერა:

“აღლუმზე, სომხეთს წარმოადგენს 75 კაცისაგან შემდგარი ჯგუფი, რომელსაც თავდაცვის მინისტრი, დავიდ ტონოიანი უხელმძღვანელებს”. 

რას ფიქრობენ სომხეთში ფაშინიანის უარზე

ამ საკითხზე კომენტარი გააკეთა პარლამენტის ვიცე-სპიკერმა, ალენ სიმონიანმა. მისი თქმით, მსოფლიოს ყველა ქვეყნის ლიდერი ახლა კორონავირუსის გავრცელების პრობლემის წინაშე დგას და არა მხოლოდ სომხეთის პრემიერი იყო იძულებული გაეუქმებინა ვიზიტი, არამედ სხვა ქვეყნების მეთაურებიც.

სომხურ მედიაში ასევე გამოქვეყნდა პუბლიკაციები იმის შესახებ, რომ ფაშინიანმა უარი განაცხადა წასვლაზე, რადგან მას კორონავირუსზე ტესტის გაკეთება მოსკოვში შესთავაზეს. როგორც ჩანს, ეს დაკავშირებული იყო იმ ფაქტთან, რომ 1 ივნისს, ნიკოლ ფაშინიანმა კორონავირუსით დაინფიცირების შესახებ განაცხადა, მაგრამ ვიცე-სპიკერმა ეს ინფორმაცია არ დაადასტურა. მისი აზრით, “ეს არ შეიძლება იყოს მიზეზი”. 

ზოგიერთი ადგილობრივი ექსპერტი მიიჩნევს, რომ უარის მიზეზი საერთოდ არ არის დაკავშირებული კორონავირუსთან და სახელმწიფოთაშორის და შიდაპოლიტიკურ პრობლემებში მდგომარეობს.

კერძოდ, საუბარია ოპოზიციური პარტია „აყვავებული სომხეთის“ ლიდერისა და ქვეყნის ერთ-ერთი უმდიდრესი ბიზნესმენის, გაგიკ ცარუკიანის წინააღმდეგ მიმდინარე სისხლის სამართლებრივ დევნაზე. მის პარტიას რუსეთში, ერთადერთ პრორუსულ ძალად მიიჩნევენ, რომელიც პარლამენტშია წარმოდგენილი. მისი ლიდერისთვის დეპუტატის იმუნიტეტის ჩამორთმევა და სისხლის სამართლის საქმის აღძვრა – ფაქტობრივად „თავისიანზე“ თავდასხმაა.

ამას გარდა, ფაშინიანის უარს მოსკოვში გამგზავრებაზე, უკავშირებენ სომხეთის ექს-პრეზიდენტთან, რობერტ ქოჩარიანთან დაკავშირებულ ისტორიასაც.

საქმე იმაშია, რომ სომხეთში გრძელდება სასამართლო პროცესი, რომელშიც მთავარი ბრალდებული ქვეყნის ყოფილი პრეზიდენტი, რობერტ ქოჩარიანია. რუსეთის პრეზიდენტი კი არ მალავს მისადმი მეგობრულ დამოკიდებულებას. სომხეთში პუბლიკაციები გამოქვეყნდა იმის შესახებ, რომ ვლადიმირ პუტინმა სომხეთის ხელისუფლებას საკონსტიტუციო წესრიგის დამხობაში ბრალდებული ქოჩარიანის პატიმრობიდან გათავისუფლება სთხოვა. გასულ კვირას, სააპელაციო სასამართლომ ექს-პრეზიდენტის გირაოს სანაცვლოდ გათავისუფლების გადაწყვეტილება მიიღო. 

პოლიტიკური მიმომხილველი აკოფ ბადალიანი ამ საკითხთან დაკავშირებით, შემდეგ დასკვნამდე მივიდა: 

“აღლუმამდე, ერევანმა საჩუქარი გაუკეთა პუტინს – შეუცვალა რა აღკვეთის ღონისძიება რობერტ ქოჩარიანს. ეს არის რუსულ-სომხური რთული ურთიერთობის ერთ-ერთი საკვანძო საკითხი, რომელსაც მოსკოვი ერევანზე ზეწოლისთვის იყენებდა, რისთვისაც ქოჩარიანი, სხვა სომეხი პოლიტიკოსებისაგან განსხვავებით, რომელთაც რუსეთში იპოვეს თავშესაფარი, სომხურ მართლმსაჯულებას გადაეცა. ახლა ამ ბერკეტს სომხეთი მოსკოვის წინააღმდეგ იყენებს და სასამართლოს გადაწყვეტილების შემდეგ, ფაშინიანი უარს ამბობს მოსკოვში გამგზავრებამდე, რითიც მიანიშნებს პუტინს, რომ ის ელოდება შეხვედრას, რათა საკითხები განიხილოს”.