არ მივიღებთ გადმოგდებულ მანდატებს - "ევროპული საქართველო" პარლამენტში არ შევა
გაზიარება
გაზიარება
“ევროპული საქართველო” უარს ამბობს, შევიდეს პარლამენტში. ისინი ასევე უარს ამბობენ მიიღონ მონაწილეობა მეორე ტურებში, სადაც მათი ორი კანდიდატი, შალვა შავგულიძე და ელენე ხოშტარია გადავიდა.
პარტიის ლიდერების თქმით, არჩევნების შედეგები არალეგიტიმურია.
„ევროპული საქართველოს“ გადაწყვეტილება არის, სრული ბოიკოტი გამოუცხადოს ამ პარლამენტს. არც ერთი ჩვენგანი არ მიიღებს იმ გადმოგდებულ მანდატებს იმიტომ, რომ ეს პარლამენტი არ ასახავს ქართველი ხალხის ნებას” – განაცხადა პარტიის ერთ-ერთმა ლიდერმა გიგი უგულავამ
“ძალიან მტკიცე და ერთიანი პოზიცია გვაქვს, რომ ეს არის არალეგიტიმური არჩევნები. შესაბამისად, ცხადია, არალეგიტიმურ პარლამენტში ჩვენ არ ვაპირებთ შესვლას. ეს არის ბრძოლის ძალიან მნიშვნელოვანი განაცხადი, რომ ჩვენ არ ვაპირებთ შეგუებას იმასთან, რომ ბიძინა ივანიშვილმა მოგვპაროს არჩევნები, როგორც ინსტიტუტი” – თქვა “ევროპული საქართველოს” ვაკის მაჟორიტარი დეპუტატობის კანდიდატმა ელენე ხოშტარიამ.
პარტიის კიდევ ერთი ლიდერის, გიგა ბოკერიას თმით კი, ოპოზიციის ვალია “ერთად დავუპირისპირდეთ ივანიშვილს და ბოიკოტი გამოვუცხადოთ პარლამენტს”.
გიგა ბოკერია: ოპოზიციის ერთიანობა არის უმნიშვნელოვანესი არგუმენტები იმისთვის, რომ ჩვენ მოვახდინოთ იზოლაცია ამ ჩვენი ქვეყნისთვის საშიში, პოლიტიკურად მომაკვდინებელი რეჟიმის რასაც ივანიშვილი ჰქვია. სწორედ ამიტომ იქნა ერთსულოვანი გადაწყვეტილება მიღებული ბოიკოტზე ამ პარლამენტის და ჩვენ გვაქვს ნებისყოფა და რწმენა, რომ მორალურად გავტეხოთ ეს კაცი და მისი გარემოცვა პოლიტიკური კლოუნების, რომელმაც საქართველოს თავს მოახვია ჩვენი ქვეყნისთვის უაღრესად საშიში ტენდენცია სრული მონოპოლიზაციის ძალაუფლების, დაშინების ძალადობის, გაჭირვებაში მყოფი ადამიანების მოსყიდვის.
პარლამენტში შესვლას არ აპირებს არც “გირჩი”.
“ჩვენ მივყვებით ოპოზიციურ შეთანხმებას, რომელსაც პირველი დღიდან ვიცავთ. ჩვენ პარლამენტში შესვლა გვინდოდა იმიტომ, რომ იქ ოპოზიციასთან ერთად გვეკეთებინა რაღაცეები. თუ არავინ არ შევა, ჩვენ რა გვინდა იქ?” – ამბობს გირჩის ლიდერი ზურაბ ჯაფარიძე.
პარლამენტში შესვლის მომხრე იყო “რესპუბლიკელი” დავით ბერძენიშვილი, რომლის პარტიის ორი წევრი – ხათუნა სამნიძე და თამარ კორძაია – გაერთიანებული ოპოზიციის სიაშია.
თუმცა, როგორც ბერძენიშვილი ამბობს, ისინი დაიცავენ საერთო ოპოზიციურ შეთანხმებას და არ შევლენ პარლამენტში.
“ჩვენთვის ადვილი არ არის ამ მანდატებზე უარის თქმა, მაგრამ, რა თქმა უნდა, „რესპუბლიკური პარტია“ ცალკე არ შევა პარლამენტში. საერთო შეთანხმება უნდა შედგეს. გამორიცხულია ჩვენ მარტო შევიდეთ პარლამენტში, მაგრამ ჩვენი პირობა არის, რომ ეს უნდა იყოს საერთო შეთანხმება” – ამბობს ბერძენიშვილი.
უკვე დადასტურებულად ვიცით, რომ პარლამენტში არ შევა ნაციონალური მოძრაობა, ევროპული საქართველო, სტრატეგია აღმაშენებელი, ლეიბორისტები, მოქალაქეები და ლელო.