"სააკაშვილი კვდება ციხეში და ეს ძალიან იმოქმედებს საქართველოს მომავალზე" - ევროპარლამენტში გამართული დებატები
ევროპარლამენტში გამართულ დებატები
ევროპარლამენტის პლენარულ სხდომაზე ევროპარლამენტარმა ანა ფოტიგამ მიხეილ სააკაშვილის ჯანმრთელობის მდგომარეობასთან დაკავშირებით დაუყოვნებლივი დებატების გამართვა მოითხოვა, რაზეც თანხმობა მიიღო. დებატები დღეს გაიმართა.
პატიმრობაში მყოფი საქართველოს მესამე პრეზიდენტი გუშინდელ სასამართლო პროცესს დისტანციურად ჩაერთო. მან სასამართლოს სიტყვით ქართულ და უკრაინულ ენებზე მიმართა და განაცხადა, რომ ერთადერთი, რასაც ითხოვს, “ადეკვატური მკურნალობის საშუალების მიცემაა”.
ექსპრეზიდენტმა სიტყვით გამოსვლისას საკუთარ ჯანმრთელობის მდგომარეობაზე ისაუბრა და ფიზიკური მდგომარეობის საჩვენებლად მაისური აიწია. მან ამას “არაეთიკური სურათი” უწოდა და ბოდიში მოიხადა. მიხეილ სააკაშვილს მკვეთრად აქვს წონაში დაკლებული, რაზეც მეტყველებდა გამოკვეთილი ნეკნები და მუცელი. გამოსვლის დროს ის საუბრობდა ნელა, შესვენებებით და პაუზების დროს ღრმად სუნთქავდა.
“უკრაინის გამარჯვებაში დარწმუნებული ვარ, მაგრამ თუ მე ვერ ვიცოცხლებ გამარჯვებამდე, რომელიც ახლოსაა, გული უნდა იყოს დამარხული კიევში, ის ეკუთვნის უკრაინას.” – თქვა საქართველოს მესამე პრეზიდენტმა.
აშშ-ს ელჩის, უკრაინისა და მოლდოვის პრეზიდენტების განცხადებები. რა მოხდა დებატებამდე
2 თებერვალს გავრცელდა საქართველოში აშშ-ის ელჩის, კელი დეგნანის განცხადება მიხეილ სააკაშვილზე. მისი თქმით, ეს არის ძალიან სერიოზული მდგომარეობა, “რაც ჩვენ გუშინ ვნახეთ.”
“ამერიკის მთავრობაც და სხვა ქვეყნების მთავრობებიც ყურადღებით აკვირდებიან ამ პროცესს და ეს არის შეშფოთების საგანი. ხელისუფლების პასუხისმგებლობაა, რომ მიხეილ სააკაშვილმა მიიღოს მისთვის საჭირო მედიკამენტური მკურნალობა და ეს არის, რაზეც ჩვენ ყველა ვართ ფოკუსირებულნი, რომ პირველი ვიცოდეთ მისი ზუსტი დიაგნოზი, რა სჭირდება მას და რომ ხელისუფლება აწვდის მას საჭირო დახმარებას და რა თქმა უნდა, ჩვენ გავაგრძელებთ ამ საკითხზე დაკვირვებას” – განაცხადა დეგნანმა.
გუშინ, უკრაინის პრეზიდენტმა ვოლოდიმირ ზელენსკიმ განაცხადა, რომ საქართველოს ხელისუფლება მიხეილ სააკაშვილს ნელ-ნელა კლავს. მოგვიანებით მან კიდევ ერთი განცხადება გაავრცელა და მსოფლიოს მოუწოდა, მისი სიკვდილით დასჯა აღკვეთონ.
“მისი სიცოცხლისთვის შექმნილი საფრთხის გათვალისწინებით, მოვუწოდებ საქართველოს ხელისუფლებას, გაიხსენოს ევროპული სტანდარტების მიხედვით ნაკისრი ვალდებულებები ადამიანის უფლებების დაცვის კუთხით, შეწყვიტოს ძალადობა და გაათავისუფლოს მიხეილი! უკრაინამ გამოსავლები შესთავაზა. მოვუწოდებ მსოფლიოს, დაეხმაროს მიხეილს სიცოცხლის გადარჩენაში და აღკვეთოს მისი სიკვდილით დასჯა”, – აცხადებს ზელენსკი.
სააკაშვილის მდგომარეობას გამოეხმაურა მოლდოვის პრეზიდენტი მაია სანდუც. მისი თქმით, ოპოზიციის ლიდერის წამებით სიკვდილი მიუღებელია ქვეყნისთვის, რომელსაც ევროკავშირის წევრობა სურს.
“დაუყოვნებლივ უნდა გათავისუფლდეს და გაიგზავნოს საზღვარგარეთ სამკურნალოდ.” – აცხადებს სანდუ.
● “საქართველოში დემოკრატიის უკუსვლა შემაშფოთებელია” – აშშ-ს სენატის საგარეო კომიტეტის სხდომა
● იქნება თუ არა “მაგნიტსკის აქტის” ანალოგი სააკაშვილზე? ნაციონალურმა მოძრაობამ სიაზე მუშაობა დაასრულა
● სააკაშვილის წერილი WSJ-ში: დასავლეთს შეუძლია გადაარჩინოს ჩემი სიცოცხლე
დებატები ევროპარლამენტში
ევროპარლამენტარი მარკეტა გრეგოროვა: “ჩვენ გვაღელვებს ეს, რადგან ასეც უნდა იყოს. ესაა ღრმად პოლიტიზებული საქმე, ადამიანი კვდება ციხეში. ვთხოვ საქართველოს ხელისუფლებას, არ იფიქროს მხოლოდ პოლიტიკურ ქულებზე, რომლებიც შეიძლება ციხეში მისი დატოვებით მიიღონ, არამედ იმ ქულებზეც, რომლებიც შეიძლება ამით დაკარგონ იმიტომ, რომ დღეს ჩვენ გვიწევს ვისაუბროთ პოლიტიკურ პატიმარზე კანდიდატის სტატუსის ნაცვლად.”
ევროკომისარი იოჰანეს ჰანი: ” ჩვენ ჩავატარეთ შეხვედრა ევროკავშირის ელჩთან და იუსტიციის მინისტრთან ერთად. წინა შემთხვევაშიც ჩვენ გავიმეორეთ, რომ ეს არის საქართველოს მთავრობის პასუხისმგებლობა, რომ ყველანაირი ზომა მიიღოს ბატონი სააკაშვილის ჯანმრთელობის დაცვისთვის. მათ აქვთ კანონიერი ვალდებულება, რომ ყველა პატიმარს მიეცეს ჯანდაცვაზე წვდომა და მათი ფუნდამენტური უფლებები იყოს დაცული. […] ევროკავშირის პოზიცია ნათელია, რომ საქართველოს მთავრობას აქვს პასუხისმგებლობა, რომ იმოქმედონ, თუ ბატონი სააკაშვილის ჯანმრთელობა არის კრიტიკულ მდგომარეობაში.”
ანა ფოტიგა, ევროპარლამენტარი: “რამდენიმე წლის წინ, ვლადიმერ პუტინმა პირადად აღწერა მოპყრობა, რომელიც უნდოდა მიხეილ სააკაშვილის მიმართ. როგორც სხვა ნებისმიერ პირს, სააკაშვილს ჰქონდა უფლება სამშობლოში დაბრუნების, ამიტომ ის დაბრუნდა… მას არ ექცევიან როგორც სხვა ნებისმიერ პირს საქართველოში. მოვუწოდებ საქართველოს მთავრობას, გაუშვას ის იმისათვის, რომ მან მიიღოს სამედიცინო დახმარება საზღვარგარეთ. ის კვდება ციხეში და ეს ძალიან იმოქმედებს საქართველოს მომავალზე.”
ლიეტუველი ევროპარლამენტარი პეტრას აუსტრევიჩიუსი: “მიხეილ სააკაშვილი, ყოფილი პრეზიდენტი, რომელმაც შეცვალა საქართველო, ახლა 16 თვეა დაპატიმრებულია. მოვითხოვ, რომ მიხეილ სააკაშვილს მიეცეს უფლება, საზღვარგარეთ წავიდეს სამედიცინო დახმარების მიღებისთვის. შანსები იმისა, რომ ქვეყანა დაკარგავს თავის ევროპულ სახეს არის ძალიან დიდი.”
მირიამ ლექსმანი, ევროპარლამენტარი: “საქართველოს მთავრობის ეს სამარცხვინო ქცევა პირდაპირ კავშირშია ქვეყნის ევროპულ მომავალთან. მე კიდევ ერთხელ ვთხოვ საქართველოს მთავრობას, მისცენ უფლება, რომ საზღვარგარეთ მიიღოს სამედიცინო დახმარება.“
