Wildberries ყაზახეთში გადადის?
დრონებით შეტევა Wildberries-ზე
“ნოვაია გაზეტა ევროპას” მასალა
კომპანია Wildberries-ი ასტანასა და ალმათიში საწყობებს აშენებს, რომელთა საერთო ფართობი 260 ათას კვადრატულ მეტრს აღემატება. ამის შესახებ ყაზახეთის ვაჭრობისა და ინტეგრაციის მინისტრმა არმან შაკალიევმა განაცხადა.
დეტალები. მინისტრის ინფორმაციით, Wildberries-ი ალმათის მახლობლად 100 ათას კვადრატულ მეტრზე მეტი ფართობის საწყობს აშენებს. კიდევ ერთი, 160 ათასი კვადრატული მეტრის ფართობის ობიექტი ასტანაში შენდება. მათი ექსპლუატაციაში გაშვება 2027 წლის პირველ კვარტალში იგეგმება. გარდა ამისა, კომპანია უკვე ქირაობს დაახლოებით 46 ათასი კვადრატული მეტრის ფართობის საწყობებს.
შაკალიევის განცხადებით, Wildberries-ს ყაზახეთში ახალი საწყობების განთავსების საკითხზე უწყებისთვის ოფიციალურად არ მიუმართავს. ამასთან, კომპანიებს შეუძლიათ, საწყობების მფლობელებთან ხელისუფლების მონაწილეობის გარეშე, დამოუკიდებლად მოილაპარაკონ, განმარტა მან.
რუსეთის საგარეო საქმეთა სამინისტროს დასტური. რუსეთის საგარეო საქმეთა მინისტრის მოადგილის, მიხაილ გალუზინის განცხადებით, მოსკოვმა და ასტანამ მარკეტპლეისების ინტეგრაციაზე მუშაობა Wildberries-ის საწყობებზე უკრაინული თავდასხმების დაწყებამდე დაიწყეს. მისი თქმით, Ozon-სა და Wildberries-ზე უკვე ასობით ათასი ყაზახი მიმწოდებელია რეგისტრირებული.
ამასთან, გალუზინმა გარიგებების დეტალები არ გაასაჯაროვა და კომპანიების კონკრეტული გეგმების შესახებ ინფორმაციის დაზუსტება მათ წარმომადგენლებთან ურჩია.
კონტექსტი. 29 ივლისს გაზეთი „კომერსანტი“ წერდა, რომ რუსეთის ტერიტორიაზე მდებარე ლოგისტიკურ ცენტრებზე დრონებით განხორციელებული თავდასხმების შემდეგ Wildberries-ი ყაზახეთში საწყობებს ეძებდა. გამოცემის წყაროების ინფორმაციით, ქვეყანაში საწყობების შეზღუდული რაოდენობის გამო კომპანია მზად არის, ყველა ხელმისაწვდომი ფართობი დაიკავოს. ამ გზით მარკეტპლეისს თავისი ინფრასტრუქტურის ნაწილის უპილოტო საფრენი აპარატების დარტყმებისგან დაცვა სურს.
„კომერსანტის“ ინფორმაციით, Wildberries-ი ახალი საწყობების მოძიებას რუსეთშიც აგრძელებს. თუმცა თავისუფალი ფართობების მფლობელები უპილოტო საფრენი აპარატების თავდასხმის რისკის გამო მარკეტპლეისთან ახალი საიჯარო ხელშეკრულებების გაფორმებას ერიდებიან.
exchange
