ცესკო: საზღვარგარეთ დამატებით 7 საარჩევნო უბანი გაიხსნება
დამატებითი საარჩევნო უბნები
ცენტრალური საარჩევნო კომისიის გადაწყვეტილებით, 2024 წლის 26 ოქტომბრის საპარლამენტო არჩევნებისთვის საზღვარგარეთ დამატებით 7 საარჩევნო უბანი გაიხსნება და ემიგრანტები ხმის მიცემას ჯამში 42 ქვეყანაში 67 უბანზე შეძლებენ.
აღნიშნული უბნები ათენში, ნიუ-იორკში, თესალონიკში, ბერლინში, ბარსელონაში, რომსა და პარიზში დაემატება, იმავე ქალაქებსა და ლოკაციებზე, სადაც უბნები უკვე არსებობს.
ამასთან, ცესკოს სხდომაზე თავმჯდომარემ, გიორგი კალანდარიშვილმა ისრაელში, ქალაქ რამათ-განში საარჩევნო უბნის შენარჩუნების ან გაუქმების საკითხი დღის წესრიგში ჩასმის გარეშე დააყენა, სადაც გადაწყდა, რომ უბნის გაუქმების მოცემული “იმ თავითვე არ დგას”.
“ერთხმად ვთანხმდებით, რომ [ისრაელში] საარჩევნო უბნის გაუქმების შესახებ საკითხის დღის წესრიგში შეტანის საკითხი იმთავითვე არ დგას. […] უბრალოდ, ორჯერ გაჟღერდა, რომ თებერვალში არჩევნები ჩატარდა ევროპარლამენტისო, თუმცა, ინფორმირების მიზნით, ახლა არის ოქტომბრის თვე, ბუნებრივია, თებერვლის შემდეგ ძალიან ბევრი რამ შეიცვალა, მათ შორის, საგარეოს მიერ მოწოდებულ ინფორმაციაში საუბარია, რომ 1 ოქტომბერს დაბომბვა განხორციელდა […] იმის თქმა მინდა, რომ ნუ გავიგებთ ამას, ჩვენ ცხადია არ გვაქვს საკმარისი კომპეტენცია, რომ ისრაელში ამა თუ იმ შენობის, თუ საზოგადოებრივი უსაფრთხოების შესახებ ვიმსჯელოთ, რაიმე ფორმით შევაფასოთ ან განვჭვრიტოთ იმ დღისთვის მოსალოდნელი საფრთხეები”. – თქვა კალანდარიშვილმა.
ცენტრალური საარჩევნო კომისიის თავმჯდომარემ, გიორგი კალანდარიშვილმა ისრაელში, ქალაქ რამათ-განში არსებულ საარჩევნო უბანთან დაკავშირებით 9 ოქტომბერს განაცხადა, რომ ცესკოს საგარეო საქმეთა სამინისტრომ წერილობით მიმართა იმ რისკების შესახებ, რომელიც უკავშირდება ისრაელში საარჩევნო უბნის გახსნას.
დღემდე საქართველოს პარლამენტის 2024 წლის 26 ოქტომბრის არჩევნებისთვის საზღვარგარეთ მყოფი ამომრჩევლებისთვის 60 საარჩევნო უბნის გახსნა იგეგმებოდა. ცესკოს ინფორმაციით, საგარეო საქმეთა სამინისტროდან მიღებული ოფიციალური მონაცემების საფუძველზე, საარჩევნო უბნები 42 ქვეყანაში შექმნეს. მათი მტკიცებით, 26 ოქტომბრის არჩევნებისთვის საზღვარგარეთ იხსნება იმაზე მეტი უბანი, ვიდრე იყო 2020 წლის საპარლამენტო არჩევნებზე. მათ შორის საარჩევნო უბნები იხსნება ისეთ ქვეყნებშიც, “სადაც არ იყო არცერთ წინა არჩევნებზე – არაბთა გაერთიანებული საამიროები, ფინეთის რესპუბლიკა, კორეის რესპუბლიკა, იაპონია და ავსტრალიის თანამეგობრობა”.
