ხუთი მთავარი რჩევა ცხოვრების ჯანსაღ წესზე. სპოილერი: მათ შორის არის საკუთარი თავის განებივრება

ცხოვრების ჯანსაღი წესი რჩევები

თუ ფიქრობთ, რომ ჯანსაღი ცხოვრების წესების დაცვას მხოლოდ რკინის ნებისყოფის, თავზე საყრელი თავისუფალი დროისა და ბევრი ფულის მქონე ადამიანები ახერხებენ, ძალიან ცდებით.

JAMnews-მა, კურორტ „საირმესთან“ ერთად, მტკიცებულებითი მედიცინის წყაროებზე დაყრდნობით მოამზადა ხუთი რჩევა, რომელიც აუცილებლად გაგიადვილებთ ჯანმრთელი ცხოვრების დაწყებას.

რჩევა პირველი: ივარჯიშეთ და იმოძრავეთ (რამდენიც შეგიძლიათ!)

აქ ვერაფრით გაგაკვირვებთ. ეს ბანალური რჩევა, რომელიც ცხოვრების განმავლობაში ათასჯერ მოგისმენიათ მშობლებისგან, ფიზკულტურის მასწავლებლისგან თუ ენდოკრინოლოგისგან, სრული სიმართლეა.

ფიზიკური აქტივობა აუცილებელია, რომ იყოთ ჯანმრთელი, თუმცა ეს არ ნიშნავს, რომ ყოველ დღე 17 კილომეტრი უნდა ირბინოთ ან 40 კილოიანი შტანგები ზიდოთ.  ჯანმრთელობის მსოფლიო ორგანიზაცია და ბრიტანეთის ჯანდაცვის ეროვნული სამსახური გვირჩევენ კვირაში მინიმუმ 150 წუთი ზომიერი ინტენსივობის აერობულ აქტივობას ან 75 წუთი ენერგიული ინტენსივობის ვარჯიშს.

ზომიერი აქტივობა არის, მაგალითად, ველოსიპედით სეირნობა ან სწრაფი სიარული. ხოლო მაღალი აქტივობა შეიძლება იყოს სირბილი ან მეგობრებთან ერთად ფეხბურთის თამაში.

ანუ დღეში თუ 20 წუთი ისეირნებთ სწრაფი ნაბიჯით და 10 წუთი ირბენთ,  ეს საკმარისი იქნება, რომ ჯანმოს რეკომენდაცია შესრულებულად ჩაითვალოს.

ორი ლიტრი წყალი დღეში? ონკანის წყალი შეიძლება? ყველა მთავარი კითხვა წყალზე და წყლის სმაზე

JAMnews-მა კომპანია “კოკა-კოლა ბოთლერს ჯორჯიასთან” გასცა პასუხი ყველაზე გავრცელებულ კითხვას სასმელ წყალზე

იდეალურია, თუ ამ ნახევარსაათიან აქტივობას კვირაში ორჯერ (ან უფრო ხშირად) ძალისმიერი ვარჯიშის ელემენტებს დაამატებთ, რათა თქვენი სხეულის ძირითადი კუნთების აამუშაოთ. ამისთვის არ არის აუცილებელი დარბაზში აბონემენტის შეძენა. შეგიძლიათ სახლში გააკეთოთ, იუთუბზე ათასნაირი გაკვეთილებია.

თუ ამ ეტაპზე ეს რეკომენდაციები ზედმეტად რთულად შესასრულებლად მოგეჩვენებათ,  მცირედით დაიწყეთ: უბრალოდ, უარი თქვით ლიფტზე და მანქანით ან ავტობუსით მგზავრობის ნაცვლად, ფეხით იარეთ.

საკვები არ დაყოთ კარგ და ცუდ საკვებად. მრავალფეროვნად იკვებეთ

ძნელი დასაჯერებელია, მაგრამ სპეციალისტები ამბობენ, რომ კარგი და ცუდი საკვები არ არსებობს. რა თქმა უნდა, სტაფილო და ბროკოლი მეტ სასარგებლო ნივთიერებას შეიცავს, ვიდრე პოპკორნი, მაგრამ ეს არ ნიშნავს, რომ კინოში ბროკოლი უნდა ჭამოთ ან სტაფილო.

მთავარი და, ალბათ, ერთადერთი წესია: საკვები უნდა იყოს მრავალფეროვანი, დაბალანსებული და ზომიერი. ისე, რომ ადამიანმა საკვებიდან მიიღოს საკმარისი რაოდენობით ცილები, ცხიმები, ნახშირწყლები, ვიტამინები და მინერალები.

კვების რაციონის შედგენისას შეგიძლიათ გაითვალისწინოთ სხვადასხვა ქვეყნის კვების სახელმძღვანელო. მაგრამ ზოგადად, სწორი კვების ყველა სახელმძღვანელო ეყრდნობა ერთსა და იმავე პრინციპს: მეტი ბოსტნეული, კენკრა, თხილი, ხილი, მარცვლეული, თევზი და ზღვის პროდუქტები, ნაკლები წითელი და დამუშავებული ხორცი, მარილი, შაქარი და ალკოჰოლი.

ძილი და დასვენება ისეთივე აუცილებელია, როგორც ფიზიკური აქტივობა

ექიმები ზრდასრულ ადამიანებს ურჩევენ დღეში 7-9 საათამდე ძილს (ძილის ხანგრძლივობა დამოკიდებულია სხვადასხვა ფაქტორზე, მათ შორის ასაკზე).

ამავდროულად, რეკომენდაციები შეიცავს გაფრთხილებასაც: ნორმა შეიძლება იყოს ინდივიდუალური. ზოგს მეტი ძილი სჭირდება, ზოგს კი ნაკლები – მნიშვნელოვანია, რომ თქვენ გრძნობდეთ თავს გამოძინებულად და დასვენებულად.

ძველი საირმის ახალი სიცოცხლე – როგორ ვითარდებოდა ქვეყნის ერთ-ერთი მთავარი კურორტი

საქართველოში არ მოიძებნება ოჯახი, რომლის საოჯახო ალბომში არ არის შავ-თეთრი ფოტო წარწერით – კურორტი „საირმე“

გარდა ძილში გატარებული საათების რაოდენობისა, მნიშვნელოვანია მათი ხარისხიც: ღრმად გძინავთ თუ არა, ღამე ხომ არ იღვიძებთ, დილით დასვენებულად თუ გრძნობთ თავს.

ძილის გასაუმჯობესებლად, სომნოლოგები გვირჩევენ ყოველ დღე ერთსა და იმავე დროს დასაძინებლად წასვლას; გვიკრძალავენ ალკოჰოლს, სიგარეტსა და მძიმე საკვებს და გვირჩევენ ვიძინოთ ბნელ, გრილ ოთახში, კომფორტულ ლეიბსა და ბალიშზე.

მნიშვნელოვანია დღის რეჟიმის დაცვა და სხვა ინდიკატორების მონიტორინგი – მაგალითად, რამდენ დროს ატარებთ სოციალურ ქსელებში.

გარდა ამისა, აუცილებელია, უქმეების და შვებულებების ისე გატარება, რომ მართლა დაისვენოთ.

დაისახეთ ახალი და რაც მთავარია, რეალისტური მიზნები

იმისთვის, რომ შეინარჩუნოს ფორმა და ცხოვრების ჯანსაღი წესი რუტინაში გადავიდეს, ბევრ ადამიანს სჭირდება სტიმული. ამიტომ, დაისახეთ მიზანი. მნიშვნელოვანია მისი რაც შეიძლება ნათლად და მკაფიოდ ფორმულირება.  “ყოველ დილით სირბილის” ნაცვლად ჯობია ჩაწეროთ – “მოვემზადო თბილისის მარათონისთვის“.

როდესაც მიზანი ნათელია, მერე დაწერეთ დეტალური გეგმა, თუ როგორ აპირებთ ამ მიზნის მიღწევას. ამავე დროს, მნიშვნელოვანია, რომ მიზანი იყოს რეალისტური. „დავიკლო 37 კილო და მომავალ წელს „ვიქტორია სიქრეთის“ ანგელოზი გავხდე“ ცოტა რთული მისაღწევი შეიძლება იყოს და წარუმატებლობამ სტრესში ჩაგაგდოთ.  

გაანებივრეთ საკუთარი თავი

ყოველდღიური რუტინისა და მიზნების მარათონში არ დაივიწყოთ საკუთარი თავი და თქვენი საჭიროებები. ყველაზე რთულ მომენტებშიც კი მნიშვნელოვანია შეგეძლოთ განტვირთვა. ზოგჯერ, მაგალითად, სასარგებლოა მთელი შაბათ-კვირა დივანზე წოლაში გაატაროთ, ზოგჯერ კი მეგობრებთან ერთად ქალაქგარეთ გაიპაროთ ან უბრალოდ ლამაზი კაბა იყიდოთ.