ცხინვალში გახმაურებული მკვლელობის გამოძიება დასრულდა
ცხინვალში გახმაურებული მკვლელობის გამოძიება დასრულდა
სამხრეთ ოსეთში ახალი გენერალური პროკურორი დაინიშნა და პირველი, რაც მან თანამდებობის დაკავების შემდეგ გააკეთა, ინალ ძაბიევის მკვლელობის გახმაურებული საქმის გამოძიების დასრულების შესახებ გამოაცხადა. ჩვენ განვმარტავთ, თუ რამდენად შეესაბამება ეს პრეზიდენტ ალან გაგლოევის პირად ინტერესებს.
პრეზიდენტის მეჯვარე
ახალი გენერალური პროკურორი გრიგორი სობაევი გახდა, რომელიც პრეზიდენტ ალან გაგლოევის ერთგულია. რეალურად გაგლოევი ლობირებდა მის ამ პოსტზე დანიშვნას.
გენერალური პროკურორის თანამდებობა ვაკანტური იყო წელიწადზე მეტი ხნის განმავლობაში. თავდაპირველად გაგლოევი ცდილობდა ამ სავარძელში ჩრდილოეთ ოსეთის პროკურატურის ხანდაზმული პენსიონერი თანამშრომელი, სოსლან ბეტეევი დაენიშნა და ამისთვის გენერალური პროკურატურის შესახებ კანონის შეცვლაც კი სურდა, რადგან ასაკობრივი ზღვარი გაეზარდა. თუმცა პარლამენტმა ეს ხრიკი არ მოიწონა. შემდეგ კი გაგლოევის არჩევანი გრიგორი სობაევზე შეჩერდა.
ამან ამჯერად იმუშავა – 2023 წლის 27 ივნისს დეპუტატებმა სობაევის კანდიდატურას ერთხმად დაუჭირეს მხარი, 5 ივლისს კი პრეზიდენტმა მისი დანიშვნის შესახებ განკარგულება გამოსცა.
”ის არის ჭკვიანი, გონიერი, მიზანდასახული.”– ასე ახასიათებენ კოლეგები გრიგორი სობაევს.
ცნობილია, რომ სობაევი პროკურატურაში სხვადასხვა წლებში სხვადასხვა თანამდებობებზე მუშაობდა – იყო ცხინვალის საქალაქო სასამართლოს მოსამართლე, თავდაცვის სამინისტროში იურიდიული სამსახურის უფროსი და ბოლოს, ცხინვალის პროკურორი. ამ სტატუსით ის ასრულებდა ძაბიევის საქმის პროკურორის ფუნქციას.
გენერალური პროკურორის თანამდებობის დაკავებისთანავე სობაევმა განაცხადა, რომ პროკურატურამ დაასრულა გამოძიება ინალ ძაბიევის გარდაცვალების ფაქტზე. მისი თქმით, ახლა ბრალმდებლები საქმის მასალებს ეცნობიან, რის შემდეგაც ის სასამართლოს გადაეგზავნება.
- სამხრეთ ოსეთი: მოკლული ინალ ჯაბიევის ქვრივი პრეზიდენტს ადანაშაულებს
- ვინ მოკლა ინალ ჯაბიევი ცხინვალში? ოჯახი აქციებს აგრძელებს
ინალ ძაბიევი 2020 წელს შინაგან საქმეთა მინისტრის მკვლელობის მცდელობაში ერთ-ერთი ეჭვმიტანილი იყო.
2020 წლის 28 აგვისტოს ჯაბიევი გარდაიცვალა კრიმინალური პოლიციის მიერ დაკითხვის შემდეგ. ვარაუდობენ, რომ ის ფაქტობრივად წამებით მოკლეს.
ძაბიევის გარდაცვალებამ ფართო საზოგადოების პროტესტი გამოიწვია.
სამხრეთ ოსეთის ამჟამინდელი ე.წ. პრეზიდენტი ალან გაგლოევი იმ დროს ოპოზიციური პარტიის, „ნიხასის“ ლიდერი იყო. მან სასტიკად გააკრიტიკა მაშინდელი პრეზიდენტი ანატოლი ბიბილოვი და პირადად მას დააკისრა პასუხისმგებლობა ძაბიევის სიკვდილზე.
ძაბიევის საქმის პოლიტიკურ ბრძოლაში გამოყენებით ოპოზიციამ მოახერხა ბიბილოვის რეიტინგის სერიოზულად შერყევა. შედეგად, 2022 წლის საპრეზიდენტო არჩევნებში ბიბილოვი გაგლოევთან დამარცხდა და იძულებული გახდა დაეთმო პრეზიდენტის სავარძელი.
2022 წლის ივლისში ცხინვალის უზენაესმა სასამართლომ გაამართლა შინაგან საქმეთა მინისტრზე თავდასხმის საქმის ყველა მონაწილე და რეაბილიტაციის უფლება მისცა ინალ ძაბიევს და მეორე ეჭვმიტანილს, ნიკოლაი ცხოვრებოვს.
ალან გაგლოევის რეიტინგი, რომელიც საგრძნობლად დაეცა მისი მოღვაწეობის ერთი წლის განმავლობაში, დამოკიდებულია ძაბიევის მკვლელობაში ეჭვმიტანილების სამართლიან გამოძიებასა და დასჯაზე.
ყოფილი პროკურორი დოქტორზე
ძაბიევის საქმეზე ბრალდებულები შინაგან საქმეთა სამინისტროს კრიმინალური პოლიციის რვა თანამშრომელია. მათ ბრალად ედებათ სხეულის განზრახ მძიმე დაზიანება, რამაც გამოიწვია გაუფრთხილებლობით სიცოცხლის მოსპობა და უფლებამოსილების გადამეტება ძალადობის გამოყენებით, რასაც მძიმე შედეგები მოჰყვა.
გარდა ამისა, დაუდევრობისა და უფლებამოსილების გადამეტების ბრალდებით ეჭვმიტანილები არიან კრიმინალური გამოძიების დეპარტამენტის უფროსი ჯემალ ბიბილოვი, ყოფილი გენერალური პროკურორი ურუზმაგ ჯაგაევი (სობაევის წინამორბედი) და შინაგან საქმეთა სამინისტროს ყოფილი უფროსი იგორ ნანიევი.
ძაბიევის გარდაცვალების მიზეზებზე ჩატარებული ექსპერტიზის შედეგებს გამოძიება არ ასაჯაროებს.
თავად ბრალდებულები ბრალს არ აღიარებენ.
„როდესაც ეჭვმიტანილებმა კიდევ ერთხელ მოითხოვეს სისხლის სამართლის საქმის მასალების გაცნობის ვადის გაგრძელება, სობაევმა ნერვები ვერ მოთოკა და მათ მკვლელები უწოდა. საპასუხოდ, ერთ-ერთმა ბრალდებულმა მას სპორტული ფეხსაცმელი ესროლა“, – თქვა სობაევის ერთ-ერთმა კოლეგამ.
JAMnews-ის წყაროებმა გენერალურ პროკურატურაში ასევე დაადასტურეს გამოძიების დასრულება.
„დიახ, სამუშაო დასრულებულია. ბრალდებულები გამოძიების მასალებს ეცნობიან. დაზარალებულ მხარეს ასევე ეძლევა შესაძლებლობა გაეცნოს საქმეს. როგორც კი ბრალდებულები საქმე შეისწავლიან, იგი სასამართლოს გადაეცემა“.
სტატია მომზადებულია ცხინვალის რედაქციის მიერ და პროექტის პირობების თანახმად, დაბეჭდილია უცვლელად.ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
