ჩრდილოეთ ოსეთში "კომუნისტების სიძულვილის" ბრალდებით ბლოგერს ასამართლებენ
ოს ბლოგერს „კომუნისტების სიძულვილის“ ბრალდებით ასამართლებენ
33 წლის ბატრაზ მისიკოვი, ცნობილი ბლოგერი Sidamon, მალე ჩრდილოეთ ოსეთში (რუსეთში ), კომუნისტების მიმართ სიძულვილის გაღვივების ბრალდებით, სასამართლოს წინაშე წარდგება.
მის მოკლე პოსტს ტელეგრამის არხზე, რომელიც ვლადიკავკაზში ლენინის ქუჩისთვის სახელის გადარქმევას შეეხებოდა, ფაქტობრივად, ლინგვისტური ექსპერტიზა ჩაუტარეს. ბლოგერი ამტკიცებს, რომ მიკერძოებულები იყვნენ, მაგრამ მიუხედავად ამისა, ეს სასამართლოში მის წინააღმდეგ მთავარი მტკიცებულებაა.
რა მოხდა: ლენინი, ტოგუზოვი, მეფე პეტრე პირველი (დიდი) და ომი უკრაინაში
ყველაფერი იმით დაიწყო, რომ ცნობილმა ადგილობრივმა აქტივისტმა ვალერი გაზზაევმა ლენინის ქუჩისთვის, საბჭოთა კავშირის გმირის კაურბეკ ტოგუზოვის პატივსაცემად, სახელის გადარქმევის იდეა გააჟღერა.
ამ იდეას რუსეთის ფედერაციის კომუნისტური პარტიის ოსურის შტოს მწვავე განცხადება მოჰყვა. მათმა წარმომადგენლებმა მაგალითად უკრაინის ომი მოიყვანეს:
„2014 წლის მაიდანის შემდეგ, ბანდეროველებმა პირველივე ბრძანებით უკრაინის კომუნისტური პარტიის საქმიანობა აკრძალეს, მიიღეს კანონი დეკომუნიზაციის შესახებ, წამოიწყეს კამპანია საბჭოთა ძეგლების დანგრევისა და ქუჩებისთვის სახელწოდების გადარქმევის მიზნით, რომელთა შორის მნიშვნელოვანი ნაწილი ლენინის სახელს ატარებდა.
სკანდალში ჩაერთო კომუნისტური პარტიის მოსკოვის ცენტრალური ოფისიც.
რუსეთის ფედერაციის კომუნისტური პარტიის ცენტრალური კომიტეტის თავმჯდომარის მოადგილემ დიმიტრი ნოვიკოვმა განაცხადა “ცინიკურ პროვოკაციასა” და “საბჭოთა სახელმწიფოს დამაარსებლის მიმართულებით გადაფურთხების შესახებ”, რასაც “ყოველი გონიერი ადამიანი” ხედავს.
ბატრაზ მისიკოვ Sidaemon-ი ამ დისკუსიას თავის Telegram არხზე გამოეხმაურა:
„რუსებს შეუძლიათ მთლიანად ქალაქ ლენინგრადს გადაარქვან სახელი თავიანთი მეფისა და მისი ზეციური მფარველის პატივსაცემად. მაგრამ ოსებს არ შეუძლიათ ერთი ქუჩის სახელი შეცვალონ თავიანთი გმირის პატივსაცემად წითელი სექტანტებისა და სახელმწიფოს ნაღვლის გარეშე, რომელიც ოსურ და კომუნისტურ ინტერესებს შორის, ყოველთვის ამ უკანასკნელს ირჩევს”.
და იქვე, საქმეში რუსეთის ფედერაციის უსაფრთხოების ფედერალური სამსახურის ადგილობრივი ფილიალი ჩაერთო. Telegram-ის პოსტი გამოძიებისთვის ადგილობრივ ექსპერტებს, ცოლ-ქმარ ინნა და ოსკარ კუნავინებს გაუგზავნეს.
ექსპერტების დასკვნა ასეთი იყო: ბლოგერი პროპაგანდას უწევს „რუსების“ უპირატესობას „ოსებზე“ და „იყენებს სიტყვებს და განცხადებებს, რომლებიც მიმართულია ზოგადად კომუნისტების, კერძოდ კი ოსეთის კომუნისტებისა და ასევე, სახელმწიფოს მიმართ სიძულვილისა და მტრობის გაღვივებისკენ“.
ბრალდებულმა ბლოგერმა ვიდეომიმართვაში თქვა, რომ ექსპერტები მასთან დიდი ხნის პირად ანგარიშებს ასწორებენ.
„მომხდარს აღვიქვამ როგორც დემონსტრაციულ საჯარო დასჯას. ამას მოწმობს ბრალდების მიზანმიმართული აბსურდულობა, მტკიცებულებათა ნუსხის შედგენისას ხაზგასმული დაუდევრობა, პროკურატურის აჩქარება, ასევე რუსეთის ფედერაციის კომუნისტური პარტიის უკიდურესად აგრესიული რეაქცია“, – განუცხადა რუსულ გაზეთ “კომერსანტს” ბატრაზ მისიკოვმა.
საქმე უკვე სასამართლოშია. სხდომის თარიღი ჯერ უცნობია.
- სტალინის სიყვარული ოსურად. მორიგი კამათი ბელადის გარშემო
- რისთვის დახურეს რუსეთში ავტორიტეტული ორგანიზაცია „მემორიალი“
ბლოგერს ბესლანი აქვს გამოვლილი. დანაღმული სკოლა მისმა მამამ გააუვნებელყო
2004 წელს, 15 წლის ასაკში, ბატრაზ მისიკოვი ბესლანის N1, იმ სკოლაში სწავლობდა, რომელიც ტერორისტებმა ჩაიგდეს ხელში. სამი დღის განმავლობაში ის, მისი მშობლები და უმცროსი ძმა, სიცხეში, უწყლოდ, იმ სპორტდარბაზში იყვნენ, სადაც სხვა ბავშვები, მათი მშობლები და მასწავლებლები.
იმ თავდასხმას 334 ადამიანი ემსხვერპლა, მათგან 186 ბავშვი იყო. ის და მისი ოჯახი გადარჩნენ, მაგრამ სკოლისთვის ბრძოლის დროს მშობლები მძიმედ დაშავდნენ. სწორედ მისმა მამამ, კაზბეკ მისიკოვმა გაანეიტრალა ტერორისტების მიერ სპორტდარბაზში დამონტაჟებული ასაფეთქებლები.
ახლა ბატრაზ მისიკოვის მხარდასაჭერად ორგანიზაციის “ბესლანის დედების” წარმომადგენლები გამოვიდნენ.
„კომენტარის მთელი ისტორია, ქუჩის სახელის შეცვლაზე ერთი, წარსულსა და მომავალზე დაფიქრებული ადამიანის აზრია. ეს მხოლოდ და მხოლოდ დისკუსიის საბაბია და არა ადმინისტრაციული საქმის აღძვრის“, – ნათქვამია ორგანიზაციის განცხადებაში.
15 წელზე მეტია „ბესლანის დედები“ ბესლაის ტრაგედიის ობიექტურ გამოძიებასა და არა მხოლოდ ტერორისტების, არამედ ხელისუფლების წარმომადგენლების პასუხისგებაში მიცემას ითხოვენ.
ბესლანის ამ სკოლის ყოფილმა მძევლებმა და კურსდამთავრებულებმა ბლოგერის მხარდასაჭერად პეტიცია შექმნეს.
“ლენინს უნდა გავუფრთხილდეთ”
სანამ ბატრაზ მისიკოვი სასამართლოს ელოდება, ვლადიკავკაზში „ლენინის მემკვიდრეობის“ დასაცავად პროპაგანდისტული ტალღა იზრდება.
ისტორიის მეცნიერებათა დოქტორმა ბერტა ტუაევამ განაცხადა, რომ ლენინის ქუჩას 100 წელი უსრულდება და საიუბილეო თარიღის სამახსოვრო ღონისძიებებით აღნიშვნა შესთავაზა.
„ლენინის ქუჩას თავდაპირველად დვორიანსკაია ეწოდა. 1925 წელს ლენინის ქუჩა გახდა […] ისტორიული ფესვებს მოფრთხილება უნდა, მათ პატივსაცემად სამახსოვრო ღონისძიებები უნდა ჩატარდეს“, – განაცხადა ტუაევამ.
ქუჩის სახელწოდების შეცვლის შესახებ აქტივისტ გაზაევის ინიციატივის კომენტირებისას, მან თქვა, რომ “ეს კრიტიკის მიღმაა”:
„ღმერთმა არ ქნას, ხვალ მშვიდობის გამზირზე ლენინის ძეგლის ჩამოდგება მოითხოვოს”.
სიდემონმა კი ისევ წამოუარა კომუნისტებს:
“ლენინის მოყვარულებს ჩრდილო ოსეთში ისე ძლიერ ავიწროებენ, რომ ვლადიკავკაზის მთელი ცენტრი გადაკეტილი იყო ლენინის სახელობის ბოისკაუტთა [პიონერთა ორგანიზაცია] უაზრო იმიტაციის იუბილეს ზეიმისთვის. ჩემი გასამართლება კი მოხდება ლენინის რაიონულ სასამართლოში”.
ოს ბლოგერს „კომუნისტების სიძულვილის“ ბრალდებით ასამართლებენ
