84 წლის ასაკში ბუბა კიკაბიძე გარდაიცვალა
ბუბა კიკაბიძე გარდაიცვალა
84 წლის ასაკში გარდაიცვალა ქართველი კინომსახიობი, საესტრადო მომღერალი, სცენარისტი, კინორეჟისორი, სიმღერების ავტორი ბუბა (ვახტანგ) კიკაბიძე.
2020 წლიდან იყო საქართველოს მეათე მოწვევის პარლამენტის წევრი “ერთიანი “ნაციონალური მოძრაობის” პარტიული სიით. 2008 წლის აგვისტოს ომის შემდეგ, ბუბა კიკაბიძემ უარი თქვა რუსეთში სიმღერაზე და მას მერე მოსკოვში აღარ ჩასულა.
კიკაბიძე 1938 წლის 19 ივლისს თბილისში დაიბადა. 1959-1965 წლებში სწავლობდა თბილისის სახელმწიფო უნივერსიტეტში, 1961-1963 წლებში უცხო ენათა ინსტიტუტში.
1959 წლიდან იყო ფილარმონიის არტისტი; მღეროდა ანსამბლებში “დიელო”, “რერო”; 1967 წლიდან იყო ვოკალურ ინსტრუმენტალურ ანსამბლ “ორერას” სოლისტი.
შესრულებული აქვს როლები ფილმებში: გია (“შეხვედრა მთაში”), ბენჟამენ ღლონტი (“არ დაიდარდო”, 1968), გიორგი მიქელაძე (“მე, გამომძიებელი”, 1971), პავლე (“ვერის უბნის მელოდიები”, 1973), ვალიკო მიზანდარი (“მიმინო”, 1977), ვახტანგი, დავითი, გივი, მუსიკოსი (“იცოცხლე გენაცვალე”, 1981), და სხვ.; დამდგმელი რეჟისორი და სცენარის ავტორი ფილმებისა: “იცოცხლე გენაცვალე” (1981), “მამაკაცები და სხვები”(1985);
საქართველოში უკრაინის საელჩო ბუბა კიკაბიძის გარდაცვალებას გამოეხმაურა და ოჯახსა და მეგობრებს სამძიმარი გამოუცხადა.
“ძნელია ისეთი სიტყვების პოვნა, რომელიც შეამსუბუქებს საყვარელი ადამიანის დაკარგვის ტკივილს. ლეგენდარული კაცი, უკრაინისა და მთელი უკრაინელი ხალხის დიდი მეგობარი ვახტანგ (ბუბა) კიკაბიძე 84 წლის ასაკში გარდაიცვალა. გარდაიცვალა გულწრფელი, მგრძნობიარე და კეთილგანწყობილი ადამიანი, რომელიც ყოველთვის მხარს უჭერდა უკრაინას აგრესორ რუსეთის წინააღმდეგ ბრძოლაში.
მაგრამ მისი გულწრფელი საქმეები და ნათელი ხსოვნა რჩება ამ სამყაროში. ამ ტრაგიკულ მომენტში საელჩოს მთელი გუნდი იზიარებს ნათესავების, მეგობრების, სრულიად საქართველოს მძიმე დანაკარგის ტკივილს და ღრმა მწუხარებით იხრის ქედს. მარადიული ხსოვნა… სამუდამოდ ჩვენს გულებში იქნება შენი მომხიბვლელი ხმა, ღიმილი და შენი სიმღერები, ჩვენო ძვირფასო ბატონო ბუბა”. – ნათქვამია საელჩოს განცხადებაში.
უკრაინის პრეზიდენტის ადმინისტრაციის ხელმძღვანელი ანდრეი ერმაკი ტვიტერზე წერს:
“ქართველი მსახიობი და მომღერალი ვახტანგ კიკაბიძე 84 წლის ასაკში გარდაიცვალა. ვახტანგი უკრაინის დიდი მეგობარი იყო. მშვიდად განისვენე სინათლის ადამიანო.”
Georgian actor and singer Vakhtang Kikabidze died at 84. Vakhtang was a great friend of Ukraine. Rest in peace man of light. pic.twitter.com/U5Fk8wzefL
— Andriy Yermak (@AndriyYermak) January 15, 2023
“2008 წლის შემდეგ, როცა რუსეთი საქართველოში შეიჭრა მან შეწყვიტა რუსეთის ფედერაციაში წარმოდგენების გამართვა.
ის ასევე ყოველთვის მხარს უჭერდა უკრაინას, ღიად გმობდა პუტინს და სძულდა ყველაფერი რაც “რუსულ სამყაროს” უკავშირდებოდა.” – აცხადებს უკრაინის შინაგან საქმეთა მინისტრის მრჩეველი ანტონ გერაშენკო.