რიგები თავისუფლებისთვის - უჩვეულო მასობრივი საპროტესტო აქცია ბელარუსში
კვირას, 31 მაისს, ათასობით ბელარუსი ქვეყნის სხვადასხვა ქალაქში ქუჩაში გამოვიდა და გრძელ რიგებში ჩადგა. Euroradio- ს ცნობით, ხალხი გამოვიდა, რათა ხელმოწერებით მხარი დაეჭირა პრეზიდენტობის კანდიდატ სვეტლანა ტიხანოვსკაიასთვის.
საზოგადოების მხრიდან ასეთი სოლიდარობა კანდიდატის საინიციატივო ჯგუფის ხელმძღვანელის, სვეტლანას მეუღლის და პოპულარული ბლოგერის, სერგეი ტიხანოვსკის დაკავებას მოჰყვა.
- იძულებითი გამჭვირვალობა: როგორ მიაჩვია კორონავირუსმა ხალხთან საუბარს ბელარუსის ხელისუფლება
- ბელარუსული ფლეშმობი: “რას იტყოდა შენს სიკვდილზე ლუკაშენკო”
- რაში სჭირდება ვლადიმირ პუტინს ბელარუსი და რა იქნება შემდეგი ნაბიჯი
ტიხანოვსკი და მისი მომხრეები ქალაქ გროდნოში, ხელმოწერების შეგროვების მიზნით მოწყობილი ლეგალური პიკეტის დროს, “პოლიციელებზე ძალადობის ფაქტზე” დააკავეს. მის მიმართ სისხლის სამართლის საქმეა აღძრული.
შედეგად, მკვეთრად გაიზარდა იმ ადამიანების რიცხვი, რომელთაც ოპოზიციის კანდიდატის მხარდასაჭერად ხელმოწერის დატოვება სურდათ. პიკეტები ბელარუსის ყველა დიდ ქალაქში და მინსკის ცენტრში ჩატარდა, ტიხანოვსკაიას მხარდამჭერთა და ოპოზიციის სხვა კანდიდატების მომხრეთა რიგები კილომეტრებზე იყო გადაჭიმული.
ბელარუსის პრეზიდენტმა ალექსანდრ ლუკაშენკომ სახელმწიფო უშიშროების კომიტეტის ხელმძღვანელთან შეხვედრაზე ოპოზიციის მომხრეების ქმედებები გააკრიტიკა და უკრაინულ მაიდანს შეადარა.
”ჩვენ აბსოლუტურად ვიცით, რა მიზნები აქვთ ამ უსაქმურებს: საპრეზიდენტო არჩევნების წინ ან საპრეზიდენტო არჩევნების დღეს “მაიდანჩიკი” მოგვიწყონ… მე მინდა გავაფრთხილო ყველა – “მაიდანი”, ბელარუსში ვერ მოხდება”, – თქვა ლუკაშენკომ.
საპრეზიდენტო არჩევნები ბელარუსში 2020 წლის 9 აგვისტოს არის დაგეგმილი.
