BBC: ქართველების პროტესტის შემდეგ, რუსულმა კრუიზმა ბათუმი დატოვა
BBC ქართველების პროტესტზე
BBC 31 ივლისს ბათუმის პორტში რუსული საკრუიზო გემის შემოსვლასა და მოქალაქეთა პროტესტს ეხმაურება. ავტორიტეტული ბრიტანული გამოცემა წერს, რომ ქართველების პროტესტის შემდეგ, რუსულმა კრუიზმა ბათუმი დატოვა.
“კრუიზის შესვლამ საქართველოში გამოიწვია ადგილობრივი მოსახლეობის პროტესტი, რომელიც თავდაპირველად ბათუმში დაიწყო, შემდეგ კი დედაქალაქში, თბილისშიც გადაინაცვლა.” – წერს გამოცემა. მათივე ცნობით, რუსები, რომლებიც კრუიზზე იმყოფებოდნენ, იმეორებდნენ კრემლის პროპაგანდას საქართველოში 2008 წლის ომთან დაკავშირებით.
BBC ასევე აღნიშნავს, რომ გემმა პორტი მას შემდეგ დატოვა, რაც ომის მოწინააღმდეგე დემონსტრანტებმა მას კვერცხები დაუშინეს და მგზავრების ქვეყნის დატოვებისკენ მოუწოდეს. ამასთან, BBC ყურადღებას ამახვილებს ინფორმაციაზეც, რომ ეს კრუიზის ბოლო ვიზიტია ბათუმში, რადგან “შემდგომი მარშრუტებიდან ბათუმი ამოღებულია”.
გამოცემა საქართველოს ხელისუფლების პოლიტიკის შესახებ წერს, რომ მმართველმა პარტიამ გამოიწვია ბევრი ქართველის გაბრაზება მოსკოვთან დაახლოების პოლიტიკითა და რუსეთთან პირდაპირი ფრენების აღდგენით.
BBC საქართველოს პრეზიდენტ სალომე ზურაბიშვილსაც ციტირებს და ამბობს, რომ ზურაბიშვილი პროდასავლელი პოლიტიკოსია – “როდესაც საქართველოში სოჭიდან პირველი რუსული საკრუიზო გემი შემოვიდა, პრეზიდენტმა შეაქო ქართველი ხალხი” – აღნიშნავს BBC.
გამოცემა “ქართული ოცნების” თავმჯდომარის ირაკლი კობახიძის განცხადებაზეც წერს და აცხადებს, რომ ირაკლი კობახიძემ დაგმო რუსული კრუიზის საწინააღმდეგო საპროტესტო აქციები, როგორც ძალადობრივი და გააკრიტიკა აშშ-ის ელჩი კელი დეგნანი მის მიერ გაკეთებული განცხადების გამო.
“ქართული ოცნების” თავმჯდომარე ირაკლი კობახიძე ამბობს, რომ რაც აშშ-ის ელჩმა კელი დეგნანმა რუსების შემოსვლაზე თქვა, “ქართველი ხალხი ასე არ ფიქრობს”.
კელი დეგნანმა განაცხადა, რომ არ აქვს მნიშვნელობა რას ფიქრობს თვითონ, რადგან მთავარია, რას ფიქრობს ქართველი ხალხი და ეს მათ ძალიან “მკაფიოდ და ნათლად” აჩვენეს. მისივე განმარტებით, არავინ არ უნდა ელოდოს, რომ ქართველები მიესალმებიან ხალხს იმ ქვეყნიდან, რომელიც ახორციელებს საქართველოს ტერიტორიების 20%-ის ოკუპაციას.
“მაშინ როდესაც ხელოვნურად შექმნილი ადმინისტრაციული სასაზღვრო ზოლით ის ოჯახებს ყოფს, მაშინ როდესაც აკავებენ საქართველოს მოქალაქეებს და ხანდახან თვეობით ჰყავთ ტყვეობაში და არ უშვებენ. ნამდვილად არ აქვს მნიშვნელობა, ეს ხალხი სახმელეთო გზით შემოდის, თუ ზღვით. ჩემი აზრით, ქართველი ხალხი მკაფიოდ აჩვენებს, რომ მათ ეს არ სურთ. ქართველები იყენებენ კონსტიტუციით გარანტირებულ უფლებას, გამოხატონ ეს გრძნობა და გააპროტესტონ. ეს გახლავთ დაშვებული დემოკრატიულ სახელმწიფოში და დაშვებულია კონსტიტუციით.” – აღნიშნა დეგნანმა.
● გრიგორი კარასინი: ბათუმში აქციას სააკაშვილის აქტივისტები აწყობდნენ
● “თქვენ ჩვენი რაღაც რესპუბლიკა იყავით” – რას ამბობენ რუსეთის მოქალაქეები, რომლებიც ბათუმში საკრუიზო ლაინერით შემოვიდნენ
● უკრაინის ომის შემდეგ საქართველოს ეკონომიკა სულ უფრო დამოკიდებული ხდება რუსეთზე. ციფრები და ანალიზი
31 ივლისის დილას რუსეთიდან მომავალ საკრუიზო გემ ASTORIA GRANDE-ს ბათუმის პორტში მოქალაქეები საპროტესტო აქციით დახვდნენ. აქცია ბათუმში გვიან ღამით დაიწყო.
აქციამდე რამდენიმე საათით ადრე შინაგან საქმეთა სამინისტრომ პორტის მიმდებარე ქუჩები გადაკეტა, ნავსადგურთან კი რკინის ჯებირებით შემოსაზღვრეს ტერიტორია, სადაც საკრუიზო გემი უნდა შემოსულიყო.
ეს პირველი შემთხვევა არ არის, როდესაც საკრუიზო გემი Astoria Grande ბათუმში ჩერდება. საკრუიზო ლაინერი ბათუმის პორტში 27 ივლისს გაჩერდა. საკრუიზო ლაინერმა მოგზაურობა სოჭის პორტიდან დაიწყო და რუსი ტურისტები გადაჰყავდა, რომლებმაც მედიებთან ანტიქართული განცხადებები გააკეთეს.
საკრუიზო გემზე იმყოფებოდნენ უკრაინის წინააღმდეგ რუსეთის ომისა და პრეზიდენტ ვლადიმირ პუტინის მხარდამჭერი არტისტებიც. ამჯერად რუს ტურისტებს ტელეარხ RU.TV-ის ვარსკვლავებთან ერთად მოგზაურობას სთავაზობდნენ.
