"თქვენ აქ არავინ გელოდებათ!" - როგორ დახვდნენ თბილისში პირველ რეისს მოსკოვიდან. ფოტორეპორტაჟი და კომენტარები
აზიმუტის პირველი რეისი მოსკოვიდან
ოთხი წლის განმავლობაში პირველი პირდაპირი რეისი – მოსკოვი-თბილისი შოთა რუსთაველის აეროპორტში 19 მაისს დაეშვა.
აეროპორტთან ასობით აქტივისტი მივიდა, რომლებიც რუსეთის მიმართულებით პირდაპირი ფრენების აღდგენას აპროტესტებდნენ. მოქალაქეები მოსკოვი-თბილისის რეისის მგზავრებს საპროტესტო ბანერებით, სასტვენებითა და შეძახილებით დახვდნენ.
აეროპორტთან მობილიზებული იყო პოლიცია. ისინი ჩამოსვლის დარბაზში აქტივისტებს არ უშვებდნენ.
პირველ პირდაპირ რეისს, რომელიც თბილისის აეროპორტში დღის ორი საათისთვის დაეშვა, 70-მდე მგზავრი ჩამოჰყვა.
მას შემდეგ, რაც 10 მაისს რუსეთის პრეზიდენტმა ვლადიმირ პუტინმა საქართველოსთან უვიზო მიმოსვლის გაუქმებისა და პირდირი რეისების დანიშვნის გადაწყვეტილებას მოაწერა ხელი, საქართველოში არ ცხრება საპროტესტო გამოსვლები. აეროპორტის გარდა, საპროტესტო აქციები მიმდინარეობს თბილისის ცენტრში, პარლამენტის შენობასთანაც.
ოპოზიცია, სამოქალაქო საზოგადოების წარმომადგენლები და რიგითი მოქალაქეები აპროტესტებენ საქართველოს ხელისუფლების პოზიციას, პუტინის გადაწყვეტილებასთან დაკავშირებით. თბილისი მიესალმა საქართველოსთან პირდაპირი რეისების აღდგენას. პირდაპირ ფრენებს რუსეთის მიმართულებით ქართული კომპანია ჯორჯიან ეარვეისიც შეასრულებს. საზოგადოების ნაწილი მიიჩნევს, რომ იმ დროს, როდესაც მთელი მსოფლიო უკრაინასთან სოლიდარობის ნიშნად აუქმებს რუსეთთან ავიამიმოსვლას, საქართველოს პოზიცია მიუღებელია და ქვეყანას რუსულ ორბიტაზე აბრუნებს.
პირდაპირი ფრენების წინააღმდეგია საქართველოს პრეზიდენტი სალომე ზურაბიშვილი. ტვიტერზე მან სოლიდარობა გამოუცხადა საპროტესტო აქციის მონაწილეებს: “ქართველი ხალხის წინააღმდეგობის მიუხედავად, რუსეთმა თბილისში თავისი არასასურველი რეისი განახორციელა”, – ტვიტს ახლავს ჰეშთეგი “არა რუსულ ფრენებს” #No2Flights2Russia
JAMnews-ი ესაუბრა რამდენიმე მგზავრს, რომლებიც მოსკოვიდან ჩამოვიდნენ და ასევე აქციის მონაწილეებს:
ალექსანდრ ბუზალაძე, მოსკოვი, აზიმუტის რეისის მგზავრი
მე ჩამოვედი 10 დღით, მეგობრის სანახავად. ვიცი, რომ დაძაბული სიტუაციაა საქართველოს და რუსეთს შორის. ეთნიკურად ქართველი ვარ და ამიტომ განსაკუთრებით მაწუხებს ეს სიტუაცია, მაგრამ აგრესია გამოსავალი არ არის. როგორც ჯონ ლენონი იტყოდა, მხოლოდ სიყვარული უშველის ამ სიტუაციას.
მალხაზი, აზიმუტის რეისის მგზავრი
მოსკოვში რომ ვცხოვრობთ იმ ქართველებისთვის ძალიან კარგია ეს რეისი რომ დაინიშნა. რუსეთსა და საქართველოს შორის ურთიერთობების აღდგენასაც მივესალმები. პოლიტიკა არ არის ჩემი საქმე, ხალხზე უნდა ვიფიქროთ, ხალხისთვის კი რა არის ცუდი, თუ პირდაპირ ჩამოვალთ.
ტატიანა, აზიმუტის რეისის მგზავრი
საქართველოში შაბათ-კვირის გასატარებლად ჩამოვედით. სასტუმრო დავჯავშნეთ, კაფეებსა და რესტორნებში ვივლით. აქ ფული უნდა დავხარჯოთ და თან ვისიამოვნოტ თქვენი ლამაზი ქვეყნით. მგონი, ეს ყველასთვის კარგია.
ქეთი ყურმაშვილი, 40 წლის, საპროტესტო აქციის მონაწილე, თბილისი
აქ მოვედი იმიტომ, რომ ძალიან მიყვარს ჩემი სამშობლო, არ ვეგუები ოკუპაციას, განსაკუთრებით ახლა, როდესაც ხელისუფლება პირდაპირ არის შეკრული რუსეთთან. ახლა უსასტიკესი ომი მიდის რუსეთსა და უკრაინას შორის და ამ დროს ფრენების აღდგენა არის პირდაპირი დანაშაული.
მაია მაღრაძე, მაკა მინდიაშვილი, ირაკლი კიკიანი, საპროტესტო აქციის მონაწილეები, თბილისი
მაია მაღრაძე: საქართველოს 20 პროცენტი კი არა, 100 პროცენტი აქვს რუსეთს დაპყრობილი. ჩვენი შვილების მომავალი იყიდება. დღეს გიგა ოთხოზორიას მკველობის დღეა. დღეს მისი მკვლელების თვითმფრინავი დაეშვა თბილისის მიწაზე.
მაკა მინდიაშვილი: დღეს აქ უნდა ვყოფილიყავით ძალიან ბევრნი. ის ახალგაზრდობა, ვინც რუსულ კანონს აპროტესტებდა, დღეს აქ უნდა იდგეს, რადგან ეს კიდევ უარესია. დასანქცირებულ, ოკუპანტ ქვეყანას, რომელმაც შენი ძმები და დები დახოცა ხალიჩებს ვუგებთ და გულღიად ვხვდებით?!
ირაკლი კიკიანი: ევროპის საპარლამენტო ანსამბლეამ რუსეთი ტერორიზმის ხელშემწყობ ქვეყანად აღიარა. ამით არის ყველაფერი ნათქვამი. გამოდის, რომ საქართველოს ხელისფულება მხარს უჭერს ტერორიზმის ხელშემწყობ ქვეყანას.
ალინა კოლიჩევა, 22 წლის, რუსეთის მოქალაქე, რომელიც თბილისში ცხოვრობს
ვეწინააღმდეგები რუსული თვითმფრინავების საქართველოში ფრენას, იმიტომ რომ მე თავად რუსეთიდან ვარ და იმ ქვეყანაში, ასე პლაკატით დგომა არ შემიძლია. მე ძალიან კარგად ვიცი რა არის რუსეთი და ამიტომაც გამოვიქეცი იქიდან. არ მინდა საქართველოც რუსეთად გადაიქცეს. მინდა საქართველო ევროკავშირის წევრი ქვეყანა გახდეს.
მარინა ადამია, თბილისი
ვინც ჭეშმარიტი პატრიოტია, ყველა აქ უნდა ვიდგეთ. ჩვენ ვართ უძველესი ცივილიზაციის მქონე, საღად მოაზროვნე ერი და ჩვენს ახალგაზრდობას არ უნდა რუსეთი. ჩვენ გვინდა ევროპა – წინსვლა, განვითარება, პროგრესი.
