"აშშ-მა საქართველოს ხელისუფლებას უთხრა: "პარტნიორები აღარ ვართ და საჭიროებით ვითანამშრომლებთ" — მოსაზრება
აშშ-ს და საქართველოს ურთიერთობა
“სტრატეგიული ანალიზის ცენტრის” დამფუძნებელი ნოდარ ხარშილაძე აშშ-ის საელჩოს განცხადებას ეხმაურება სახელმწიფო დეპარტამენტის წარმომადგენლების საქართველოში ვიზიტის თაობაზე და ამბობს, რომ აშშ-სა და საქართველოს ურთიერთობებში ყველაზე დიდი პრობლემა ის არის, რომ ამერიკელები “ქართულ ოცნებას“ აღარ ენდობიან.
ხარშილაძემ გადაცემაში ოპოზიციაზეც ისაუბრა და აღნიშნა, რომ დღეს ოპოზიცია ბევრად უფრო სუსტია, ვიდრე ის იყო არჩევნების შემდეგ.
აშშ-ის საელჩომ საქართველოში თბილისში გამართული შეხვედრების შესახებ განცხადება გაავრცელა, რომელშიც საუბარია როგორც ხელისუფლების, ისე ოპოზიციის წარმომადგენლებთან გამართულ კონსულტაციებზე და ვაშინგტონის ხედვაზე საქართველო-ამერიკის ურთიერთობების მომავალთან დაკავშირებით. განცხადების თანახმად, აშშ-ის დელეგაციამ ხაზი გაუსვა საქართველოსთან კომერციული თანამშრომლობის გაფართოების ინტერესს და “განიხილა კონკრეტული ნაბიჯები”, რომელთა გადადგმაც საქართველოს მთავრობას შეუძლია “ამ მიზნის” მიღწევისთვის.
ნოდარ ხარშილაძე: “ამერიკელებმა “ქართულ ოცნებას“ უთხრეს, რომ [თქვენი საგზაო რუკა] კარგად შეინახეთო. ამერიკელებმა უთხრეს: ეს არის პირობები, გინდათ? თუ არ გინდათ, რაშიც დაგვჭირდება, იმაზე ვილაპარაკებთ ხოლმე. ყველაზე დიდი პრობლემა ის არის, რომ არ ენდობიან “ქართულ ოცნებას“, რაც უნდა უთხრას “ქართულმა ოცნებამ“, სანამ ქმედებას არ ნახავენ.
იყო დრო, როცა ენდობოდნენ და წინასწარ აძლევდნენ დახმარებებს, ეს იყო 2018-2019 წლებში, თუმცა მას შემდეგ, რაც ბიძინა ივანიშვილმა დაიმუქრა, რომ ელჩთან საუბრის ჩანაწერი მაქვს და გამოვაქვეყნებო, აღარ ენდობიან. ასეთი რაღაცებისგან ინგრევა ნდობა. საერთაშორისო ურთიერთობებში თუ გინდა პარტნიორული ურთიერთობა, ნდობა ძალიან მნიშვნელოვანია. თუ ნდობა არ არის, ასეთი ურთიერთობა იქნება – მანეთი ამაში, კაპიკი იმაში.
ხელისუფლებაში მოსვლა შესაძლებელია ორი გზით: პირველი არის ინსტიტუციური არჩევნები, პარლამენტი, მეორე – ქუჩა. ჩვენთან ოპოზიციამ აირჩია მეორე გზა, მაგრამ სამწუხაროდ, ამ ეტაპზე წარმატებას ვერ მიაღწია. ეს ფაქტია იმიტომ, რომ დღეს “ქართული ოცნებაა“ დე ფაქტო ხელისუფლება.
შედეგებმა ანახა ის, რომ დღეს ოპოზიცია ბევრად უფრო სუსტია, ვიდრე ის იყო არჩევნების შემდეგ. არჩევნების შემდეგ მოსახლეობაში იყო პროტესტი მაღალი მუხტი და ოპოზიციას ამ მუხტის გამოყენება უნდა შეძლებოდა. სამწუხაროა, რომ ვერ შეძლეს. ძალიან კარგი, რომ დღეს კოალიციასა და გაერთიანებებზეა საუბარი, ეს სწორია, რამდენად მოიტანს შედეგს, ეს სანახავია. ყველაფერი იზომება შედეგით და ფაქტებით.”
