არჩევნები პროტესტის ფონზე - თსუ-ს რექტორის მოვალეობის შემსრულებელი ჯაბა სამუშია იქნება

არჩევნები პროტესტის ფონზე

თბილისის სახელმწიფო უნივერსიტეტში რექტორის არჩევნები სტუდენტების პროტესტის ფონზე მიმდინარეობდა. რექტორის მოვალეობის შემსრულებელი ჯაბა სამუშია გახდა, რომელიც ერთადერთი კანდიდატი იყო. საზოგადოებრივი მაუწყებლის ცნობით, არჩევნებში მონაწილეობა უნივერსიტეტის აკადემიური საბჭოს 30-მა წევრმა მიიღო, მათგან სამუშიას კანდიდატურას მხარი 28-მ დაუჭირა. 

სტუდენტები ჯაბა სამუშიას კანდიდატურას აპროტესტებდნენ, რადგან, მათი შეფასებით, არჩევის პროცესი სანდო და გამჭვირვალე არ ყოფილა. სტუდენტები ასევე ამბობდნენ, რომ ერთი ადამიანის მონაწილეობის გამო არჩევნები წესების დარღვევით ჩატარდა. სტუდენტების მოთხოვნით, თსუ-ში არჩევნები ხელახლა უნდა ჩატარდეს და მასში მონაწილეობა არა მხოლოდ აკადემიურმა საბჭომ, არამედ აკადემიურმა პერსონალმა უნდა მიიღოს.  

● 10 წელი “ქართულ ოცნებასთან”. სხვადასხვა სფეროს ექსპერტები ოცნების მმართველობას აფასებენ

თსუ-ს რექტორის პოსტი ვაკანტური მას შემდეგ გახდა, რაც 7 ოქტომბერს მოქმედმა რექტორმა გიორგი შარვაშიძემ გადადგომის გადაწყვეტილება მიიღო, ოღონდ გადადგომის კონკრეტული მიზეზები არ დაუსახელებია.

“დღეს მივმართე აკადემიურ საბჭოს, რექტორის თანამდებობიდან გადადგომის თაობაზე. გადაწყვეტილება დიდი ხნით ადრე მივიღე, რის შესახებაც საუნივერსიტეტო საზოგადოება ინფორმირებული იყო. ჩემი გადაწყვეტილების შესახებ საბჭოს ვაცნობე მას შემდეგ, რაც ცნობილი გახდა ევროპის უნივერსიტეტების ასოციაციის მიერ ჩვენი უნივერსიტეტის ინსტიტუციური შეფასების შედეგი და სხვა მნიშვნელოვანი სიახლეები.” – დაწერა გიორგი შარვაშიძემ.

ჯაბა სამუშია 2010-2014 წლებში თბილისის საკრებულოს წევრი იყო. ის ქონების მართვისა და საფინანსო-საბიუჯეტო კომისიის თავმჯდომარის თანამდებობას იკავებდა, 2020 წლიდან კი რუსთაველის ეროვნული სამეცნიერო ფონდის დირექტორია. ის მმართველი პარტიის მიმართ ლოიალობით გამოირჩევა.