"ქართული ოცნება" ქვეყანას რუსული ავტორიტარიზმისკენ მიაქანებს" - როგორ ეხმაურებიან საერთაშორისო პარტნიორები გუშინდელ აქციას
აქცია რუსული კანონის წინააღმდეგ
საქართველოს საერთაშორისო პარტნიორები 30 აპრილს, რუსული კანონის წინააღმდეგ გამოსული დემონსტრანტების მიმართ სპეცრაზმის ძალადობას ეხმაურებიან და ამბობენ, რომ “ქართული ოცნება” ქვეყანას რუსული ავტორიტარიზმისკენ მიაქანებს. ისინი მოუწოდებენ ხელისუფლებას, უზრუნველყოს დემონსტრანტების გამოხატვის თავისუფლება.
ჯოზეფ ბორელი, ევროკავშირის უმაღლესი წარმომადგენელი საგარეო პოლიტიკის და უსაფრთხოების საკითხებში: “მკაცრად ვგმობ საქართველოში ძალადობას დემონსტრანტების წინააღმდეგ, რომლებიც მშვიდობიანად აპროტესტებდნენ უცხოეთის გავლენების კანონს. საქართველო ევროკავშირის კანდიდატის სტატუსის მქონე ქვეყანაა, მოვუწოდებ ხელისუფლებას მშვიდობიანი შეკრების უფლება უზრუნველყონ. ძალის გამოყენება [აქციის] ჩასახშობად მიუღებელია.”
მირიამ ლექსმანი, ევროპარლამენტარი: “შეძრწუნებული ვარ თბილისში დემონსტრანტების წინააღმდეგ პოლიციის დაუნდობლობის სურათებით. ეს კანონის აღსრულება არაა. სიტუაციის დაწყნარების ნაცვლად ქართული ოცნების მთავრობა დაძაბულობასა და პოლარიზაციაზე ნავთს ასხამს, საქართველოს რუსული სტილის ავტორიტარიზმისკენ მიაქანებს.”
ვიოლა ფონ კრამონი, ევროპარლამენტარი: “გთხოვთ გამოიყენეთ ეს ვიზიტი, რომ საქართველოს ხელისუფლებას უთხრათ, შეწყვიტონ საკუთარი ხალხის ცემა. აღარ მოხდეს ძალადობა და დაუნდობლობა მშვიდობიანი მოქალაქეების მიმართ. უთხარით, რომ გაიწვიონ რუსული კანონი – აღარანაირი კარგი პროექტები და ბედნიერი ფოტოები საქართველოს მაღალჩინოსნებთან.
ეს ფოტოები სრული აბსურდია მას შემდეგ, რაც საქართველოში ამჟამად და ბოლო კვირების განმავლობაში ხდება. ევროპულ კომისიასა და ვერა იოუროვას ვთხოვ, შეიმუშაოს სანქციები ბიძინა ივანიშვილის წინააღმდეგ ამ მესიჯების ნაცვლად. ევროკავშირს აქვს ინტერესი მხარი დაუჭიროს და გადაარჩინოს დემოკრატიული პარტნიორები საქართველოში.”
ანდრიუს კუბილიუსი, ევროპარლამენტარი: “პუტინი, ლუკაშენკო და ივანიშვილი ერთსა და იმავე გზას მიჰყვებიან: ჯერ დაუნდობელი ძალის გამოყენება მშვიდობიანი დემონსტრანტების წინააღმდეგ, შემდეგ ქვეყნის დემოკრატიული მომავლის წინააღმდეგ დიქტატურის დამყარება. დიქტატურის მომავალი ყოველთვის ერთია: სანქციები, ჩამოშლა და ტრიბუნალი.”
მიხაელ როთი, გერმანიის ბუნდესტაგის საგარეო კომიტეტის თავმჯდომარე: “ძვირფასო ირაკლი კობახიძე, დაუყოვნებლივ შეწყვიტე ძალადობა შენი მოქალაქეების წინააღმდეგ, რომლებიც მშვიდობიან დემონსტრაციებს აწყობენ ევროპული ღირებულებებისთვის. გაიწვიე უცხოელ აგენტთა კანონი! არ გაანადგურო საქართველოს მომავალი, რომელიც ევროპის გულშია!”
პეტერ ფიშერი, გერმანიის ელჩი საქართველოში: “ძალადობა უნდა შეწყდეს. ეს არასდროსაა გამოსავალი. გერმანია და ევროკავშირი ამ მოვლენებს ყურადღებით აკვირდებიან და აფასებენ. ჩვენ საქართველოს პარტნიორები და მეგობრები ვართ მშვიდობაში, თავისუფლებასა და განვითარებაში.”
რასა იუკნევიჩიენე, ევროპარლამენტარი: “ნიღბები მოხსნილია – ბიძინა ივანიშვილმა გამოააშკარავა საქართველოს ევროპული მიმართულების მიმართ წინააღმდეგობა, აჩვენა ნამდვილი სახე. ის არასდროს ყოფილა მომხრე. ახლა გადამწყვეტი მომენტია საქართველოს მომავლისთვის. მჯერა ქართველი ხალხის, ისინი დაიცავენ ქვეყნის ევროპულ გზას.”
გაბრიელიუს ლანდსბერგისი, ლიეტუვის საგარეო საქმეთა მინისტრი: “20 წლის წინ ევროკავშირში გაწევრიანებას არ სჭირდებოდა პოლიციასთან დაპირისპირება, ცრემლსადენი გაზი, ადამიანებისა და ტერიტორიების დაკარგვა. ეს დღევანდელი რეალობაა. მაგრამ ხალხის გადაწყვეტილება, იყოს ევროპული პროექტის ნაწილი მხოლოდ აძლიერებს ჩვენს გადაწყვეტილებას გავუწოდოთ მათ დახმარების ხელი.”
