სააკაშვილი, ევროკავშირი და სანქციები ივანიშვილს: ანა ფოტიგა ჯოზეფ ბორელს კითხვებით მიმართავს
ანა ფოტიგა ჯოზეფ ბორელს კითხვებით მიმართავს
პოლონელი ევროპარლამენტარი ანა ფოტიგა საგარეო პოლიტიკისა და უსაფრთხოების საკითხებში ევროკავშირის უმაღლეს წარმომადგენელს, ჯოზეფ ბორელს ევროკავშირში საქართველოს წევრობაზე, მიხეილ სააკაშვილისადმი არასათანადო მოპყრობასა და ბიძინა ივანიშვილისთვის შესაძლო სანქციების დაწესებაზე კითხვებით მიმართავს.
ანა ფოტიგას თქმით, ევროკავშირის წევრობაზე საქართველოს განაცხადს მხარს უჭერს, თუმცა, მისი თქმით, ეს პროცესი დამსახურების შესაბამისად მიიღწევა.
“რეალურად, წევრობის პროცესი დამსახურებას შეესაბამება. ამ კუთხით, მე მაშფოთებს საქართველოს მესამე პრეზიდენტის მიხეილ სააკაშვილისადმი მოპყრობა, რაც ღრმად ეწინააღმდეგება ევროპულ სტანდარტებსა და ღირებულებებს“, – წერს ფოტიგა.
ევროპარლამენტარის თქმით, მას აღელვებს საქართველოს მესამე პრეზიდენტის, მიხეილ სააკაშვილისადმი განხორციელებული შურისძიების პოლიტიკა, ევროპულ სტანდარტებსა და პრინციპებს ეწინააღმდეგება.
“მე ვუერთდები უამრავ მოწოდებას, რომ მიხეილ სააკაშვილს სამართლიანად და ღირსეულად მოეპყრონ და თავი შეიკავონ დამამცირებელი მოპყრობისა და პოლიტიკური შურისძიებისგან. მრავალმა დამოუკიდებელმა ინსტიტუტმა, დოქტორმა და დიპლომატმა წამოწია სერიოზული შეშფოთება სასამართლო პროცესის მიმდინარეობაზე და ციხეში მისდამი არასათანადო მოპყრობაზე“, – ამბობს ფოტიგა.
მისივე განმარტებით, საქართველოს მესამე პრეზიდენტის მიმართ მსგავსი მოპყრობა წაქეზებულია ბიძინა ივანიშვილის მიერ:
“ოლიგარქის, რომელსაც რუსეთთან აქვს კავშირი და საქართველოს ხელისუფლებას არაფორმალურად აკონტროლებს. გარდა ამისა, ეს არაფორმალური კავშირები იწვევს ქართული ოცნების ხელისუფლების ბუნდოვან პოზიციას უკრაინაში რუსეთის აგრესიასთან დაკავშირებით.“
ანა ფოტიგას მოჰყავს მოლდოვის დეოლიგარქიზაციის მაგალითიც და ივანიშვილისთვის სანქციების დაწესების პოზიტიური ეფექტის შესახებ ეკითხება ბორელს.
ევროპარლამენტარი სვამს ორ კითხვას:
- შეესაბამება ეს შურისძიებისკენ მიმართული პოლიტიკა და საქართველოს მესამე პრეზიდენტისადმი არასათანადო მოპყრობა ევროპულ ღირებულებებსა და ვალდებულებებს, რასაც ითხოვს წევრობის პროცესი?
- ეთანხმება თუ არა ვიცე-პრეზიდენტი და უმაღლესი წარმომადგენელი [ჯოზეფ ბორელი], რომ მოლდოვის დეოლიგარქიზაციამ ამ ქვეყანაში პოლიტიკური რეფორმებზე და ევროკავშირში მის მომავალზე პოზიტიური გავლენა მოახდინა და ეთანხმება თუ არა იმ აზრს, რომ პირადი სანქციების დაწესება საქართველოში ცუდი სახელის მქონე ოლიგარქზე, ვისაც რუსეთთან კავშირები აქვს მოიტანს, მსგავს პოზიტიურ ეფექტს?
● ივანიშვილი პოლიტიკიდან მიდის. რა წერია მის გამოსამშვიდობებელ წერილში
● სააკაშვილის საქმეები. რისთვის ზის ციხეში ყოფილი პრეზიდენტი
● კელი დეგნანი: სანქციები ჩვენი ერთ-ერთი ბერკეტია
საპარლამენტო უმრავლესობის წევრი ბექა დავითულიანი ჟურნალისტებთან ევროპარლამენტარ ანა ფოტიგას წერილს გამოეხმაურა. მისი თქმით, ვინც იტყვის, რომ საქართველოს მთავრობა, “ქართული ოცნება” ან ბიძინა ივანიშვილი პრორუსულია, ის უბრალოდ ფანტაზიორობს, ანა ფოტიგა კი ამ წუთას არის ფანტაზიორი.
მისვე განმარტებით, საზღვარგარეთ პოლიტიკოსების მხრიდან ბიძინა ივანიშვილისთვის სანქციების დაწესების თემამ არაერთხელ წამოიწია, თუმცა, ამას არაფერი მოჰყვა და არც ამჯერად მოჰყვება.
“რაც შეეხება მიხეილ სააკაშვილის პატიმრობის პირობების სამართლებრივ შეფასებას, ამაზე შესაბამისი სტრუქტურები გააკეთებენ შეფასებას, ასევე სტრასბურგის სასამართლოშია შეტანილი სარჩელი სააკაშვილის მხრიდან და იქაც ვნახავთ, რა დასკვნას გამოიტანენ. რაც შეეხება პოლიტიკურ შეფასებას, ჩემი პოზიცია ცალსახა და მარტივია, არაადამიანური მოპყრობა რა არის ეს მიხეილ სააკაშვილმა გვაჩვენა მთელ საქართველოს. არაადამიანურად მას არავინ მოპყრობია და ფოტიგას ამ პოლიტიკურ შეფასებაში ვერ დავეთანხმები. ამ პოლიტიკურ შეფასებას რატომ აკეთებს, არ ვიცი, ჰკითხეთ მას”, – ამბობს დეპუტატი.
დავითულიანის თქმით, ბიძინა ივანიშვილის მიერ დაარსებულმა პარტიამ კონსტიტუციაში ჩაწერა, რომ ნატო და ევროკავშირი არის საქართველოს საგარეო ორიენტირი და შესაბამისად, მთავრობა, ის პარტია, რომელიც “ამ კაცმა დააფუძნა”, მიდის დასავლეთისკენ.
