რა ხდებოდა ოქტომბრის ბოლო კვირას საქართველოს რეგიონებში. დაიჯესტი

ამბები რეგიონებიდან. კვირის დაიჯესტი

• სამცხე-ჯავახეთს ერთი კვირის განმავლობაში აშშ-ს ელჩი სტუმრობდა

გასულ კვირას სამცხე-ჯავახეთს ამერიკის შეერთებული შტატების ელჩი საქართველოში, კელი დეგნანი სტუმრობდა. ელჩმა რეგიონში მოქმედი თითქმის ყველა სამთავრობო და არასამთავრობო უწყება მოინახულა. ეწვია უნივერსიტეტსა და რამდენიმე სკოლას. შეხვდა მოსწავლეებს ამერიკის კუთხეში. ესტუმრა სასამართლოებს, საზოგადოებრივი ჯანდაცვის ცენტრსა და სოფლის მეურნეობის ლაბორატორიებს. მოინახულა ახალციხის უძველესი სინაგოგა.

ელჩის ვიზიტი რეგიონში თითქმის მთელ კვირას გრძელდებოდა. სტუმრობა საზეიმო მიღებით დასრულდა.

ვრცლად:

Sknews.ge – ამერიკის ელჩი სამცხე-ჯავახეთშია – ვისთან გამართა შეხვედრები კელი დეგნანმა

nor.ge – Визит посла США – Келли Дегнан посетила Радио NOR/видео

• ადგილობრივი საკრებულოების წევრები „ქართული ოცნებიდან“ პარტიას ტოვებენ და „ხალხის ძალას“ უერთდებიან

გასულ კვირას ზუგდიდის საკრებულოს ორი მოქმედი წევრი “ქართული ოცნებიდან”, ანტიამერიკული განცხადებებით გამორჩეულ მოძრაობა “ხალხის ძალას” შეუერთდა. დეპუტატები ამბობენ, რომ ეს გადაწყვეტილება უკავშირდება მათ სურვილს “ხალხს სწორი ინფორმაცია მიაწოდონ”.

“ხალხის ძალას“ შეუერთდა ათი დეპუტატიც სამცხე-ჯავახეთის მუნიციპალიტეტებიდან. ზუგდიდის მსგავსად, აქაც, თითო მუნიციპალიტეტიდან პარტია „ქართული ოცნება“ ორ-ორმა დეპუტატმა დატოვა.

ვრცლად:

რადიო ათინათი – ზუგდიდის საკრებულოს 2 წევრი “ხალხის ძალას” შეუერთდა

Sknews.ge – ‘ხალხის ძალას’ სამცხე-ჯავხეთიდან ‘ოცნების’ 10–მდე დეპუტატი შეუერთდა‘

• თვითმმართველობის არჩევნებიდან ერთი წლის თავზე, სენაკში როგორც იქნა აირჩიეს საკრებულოს ახალი თავმჯდომარე

ეს პოზიცია მმართველი გუნდის წარმომადგენელმა საბა ოდიშარიამ დაიკავა. ოდიშარია „ქართული ოცნების” 17-მა წევრმა აირჩია. ოპოზიციას კენჭისყრაში მონაწილეობა არ მიუღია. ამ გადაწყვეტილებით სენაკის საკრებულოს ერთწლიანი კრიზისი დასრულდა.

სენაკის საკრებულო ერთ-ერთია მათ შორის, ვინც ბოლო არჩევნების შედეგად, ოპოზიციის უმრავლესობით დაკომპლექტდა. თუმცა, ახლა ძალთა ბალანსი შეცვლილია. მას შემდეგ, რაც ენმ-ს ერთმა დეპუტატმა, პირადი განცხადებით საკრებულო დატოვა, შუალედური არჩევნების ჩატარება გახდა საჭირო. ამ არჩევნებში კი მმართველო პარტიის წევრმა გაიმარჯვა. ახლა საკრებულოში მმართველ პარტიას 17, ოპოზიციას კი 16 წევრი ჰყავს. (აქამდე პირიქით იყო).

ვრცლად:

Livepress.ge – კრიზისი დასრულდა – სენაკის საკრებულოს ახლადარჩეული თავმჯდომარე 

• საგარეჯოში 13 პირს სახელმწიფოს კუთვნილი მიწების მიტაცებას ედავებიან

საქართველოს პროკურატურამ კახეთში 13 პირს წაუყენა ბრალი სახელმწიფოს კუთვნილი მიწების თაღლითურად დაუფლების, თაღლითობაში დახმარებისა და სამსახურებრივი უფლებამოსილების ბოროტად გამოყენების ფაქტზე. ბრალდებულებს შორის საგარეჯოს მუნიციპალიტეტის მერის ყოფილი წარმომადგენელია.

საუბარია სახელმწიფოს კუთვნილ 122 700 ლარის ღირებულების 79 232 კვ.კმ მიწის ფართობზე. ბრალდებულები გამოძიებასთან თანამშრომლობენ და ჩადენილ დანაშაულს აღიარებენ.

ვრცლად:

Speqtri.ge – სახელმწიფო მიწების მითვისების ფაქტი საგარეჯოში

• ხარაგაულის სოფლებში ჭები გააკეთეს, მაგრამ მათში წყალი არ არის

ხარაგაულის მერს და მუნიციპალიტეტის სოციალური სამსახურის უფროსს კორუფციაში ადანაშაულებენ. ჩინოვნიკებს ედავებიან, რომ ხარაგაულის სოფლებში, ვარძიაში, წყალაფორეთში, ბუდიანეთსა და საქარიქეთში, გზის, წყლის და სხვა ტიპის სამუშაოების შესასრულებლად ასი ათასობით ლარი იყო გამოყოფილი, შედეგი კი არ ჩანს.

ოპოზიციის თქმით, სოფლებში რამდენიმე ჭა უნდა მოწყობილიყო მაგრამ გაკეთებულ ჭაში წყალი არ არის. საუბარია დაახლოებით 9 ჭაზე, რომლისთვისაც დაახლოებით, 300 000 ლარი დაიხარჯა.

ვრცლად:

Kutaisipost.ge – “გახარჯულია თანხები და სამუშაოები მიტოვებულია” – ხარაგაულის მერს კორუფციაში ადანაშაულებენ

• კახეთში ახალგაზრდა კაცმა და მოკლა

სიღნაღის მუნიციპალიტეტში, სოფელ ტიბაანი-ჯუგაანის დამაკავშირებელ საავტომობილო გზაზე, ძმამ და მოკლა. ურთიერთშელაპარაკებისას მიყენებული დაზიანებებით ქალი ადგილზე გარდაიცვალა.

დის მკვლელობაში ბრალდებული ძმა შსს-მ უკვე დააკავა.

ვრცლად:

Knews.ge – პოლიციამ დის მკვლელობაში ბრალდებული მამაკაცი დააკავა

• ქუთაისში ათასამდე ბავშვი ერთჯერად ფულად დახმარებას მიიღებს

გაეროს ბავშვთა ფონდის გადაწყვეტილებით, ქუთაისში მოწყვლად ოჯახებში მცხოვრებ დაახლოებით ათასამდე ბავშვს საცხოვრებელი პირობები გაუუმჯობესდება. ამისთვის, ფონდმა, ქუთაისის მერიას გრანტის სახით 232 415 ლარი გამოუყო. ეს თანხა ბავშებზე ერთჯერადი დახმარების სახით გადანაწილდება.

ვრცლად:

Kutaisipost.ge – გაეროს ბავშვთა ფონდი ქუთაისში მცხოვრებ 989 ბავშვს დაეხმარება

• პურის ფესტივალი მესხეთში, ღვინის დღეები ზუგდიდში და ჭაჭის ფესტივალი თელავში

გასულ კვირას საქართველოს რეგიონებში რამდენიმე ფესტივალი იყო. მესხეთში უკვე მეხუთედ გაიმართა ტრადიციად ქცეული პურის ფესტივალი. მრავალფეროვანი და მადისაღმძვრელი პურების დაგემოვნება სტუმრებს ახალციხის ციხის ტერიტორიაზე შეეძლოთ. ფესტივალზე ხორბლის ენდემური სახეობებისა და ადგილობრივი ჯიშების ფქვილით გამომცხვარი პურის დაგემოვნება იყო შესაძლებელი.

ზუგდიდმა კი ღვინის დღეებს უმასპინძლა. ბოტანიკურ ბაღში კი სპეციალური სივრცე იყო მოწყობილი, სადაც ადგილობრივებს თავიანთ მეურნეობაში დაწურული ღვინის გამოფენა შეეძლოთ.  იქვე  მეგრული სამზარეულოს, მათ შორის გებჟალიას მომზადების მასტერკლასებიც იმართებოდა.

5 ნოემბერს გემრიელ ფესტივალს თელავი უმასპინძლებს. ამ ქალაქში უკვე ემზადებიან ჭაჭის ფესტივალისთვის. ფესტივალის მიზანია ყურძნის ჭაჭისგან დამზადებული არყის პოპულარიზაცია და ჭაჭის მწარმოებელი ფერმერების, გლეხების, მცირე მარნების და კომპანიების წახალისება.  ფესტივალი თელავში, ერეკლე მეფის მუზეუმის ეზოში გაიმართება.

ვრცლად:

Sknews.ge  – ახალციხეში „პურის ფესტივალი 2022“ გაიმართა

რადიო ათინათი – ზუგდიდში ღვინის ფესტივალი მიმდინარეობს

Knews.ge –  თელავში ჭაჭის ფესტივალი გაიმართება

ამბები რეგიონებიდან. კვირის დაიჯესტი