ზელენსკი: "15 წელი გავიდა, რუსული ოკუპაცია ისევ გრძელდება". საერთაშორისო გამოხმაურებები ომის წლისთავზე
რუსეთ-საქართველოს აგვისტოს ომის 15 წლისთავს საქართველოს საერთაშორისო პარტნიორები გამოეხმაურნენ. მათ მხარი დაუჭირეს საქართველოს ტერიტორიულ მთლიანობას და სუვერენიტეტს. საერთაშორისო თანამეგობრობის წევრებმა აქცენტი საქართველოს მიერ არჩეულ ევროკავშირისა და ნატოს გზაზეც გაკეთეს.
“რუსეთმა უნდა გაიყვანოს თავისი ჯარი და შეწყვიტოს საქართველოს ტერიტორიის ოკუპაცია”, – ამის შესახებ აშშ-ის სახელმწიფო დეპარტამენტის პრესსპიკერმა, მეთიუ მილერმა ბრიფინგზე განაცხადა.
მისი თქმით, შეერთებული შტატები ამ პოლიტიკის მიმართ მხარდაჭერას განაგრძობს.
“ვფიქრობ, გარკვევით განვაცხადეთ სახელმწიფო მდივნის განცხადებაში ის, რასაც გარკვეული პერიოდის განმავლობაში ვაცხადებთ, რომ რუსეთმა უნდა გაიყვანოს ჯარი და შეწყვიტოს საქართველოს ტერიტორიის ოკუპაცია. გავაგრძელებთ, მკაფიოდ გამოვხატოთ ჩვენი მხარდაჭერა ამ პოლიტიკის მიმართ”, – აღნიშნა მეთიუ მილერმა.
7 აგვისტოს მსოფლიო საქართველოს წინააღმდეგ რუსულ აგრესიას იხსენებს უკრაინის პრეზიდენტი, ვოლოდიმირ ზელენსკი. “ჭრილობა რჩება” – განაცხადა მან სპეციალურ ვიდეომიმართვაში.
“ყოველ წელს, ამ დღეს მთელი მსოფლიო იხსენებს რუსეთის აგრესიას საქართველოს წინააღმდეგ. უკვე 15 წელი გავიდა. რუსული ოკუპაცია ისევ გრძელდება – ეს ჭრილობა ქართულ სახელმწიფოზეც რჩება. ძალიან ბევრი ითქვა – 2008 წელს მსოფლიო უფრო გამბედავი რომ ყოფილიყო, ბევრი რამ სხვაგვარად იქნებოდა. უკვე მაშინ რუსეთს უნდა გაეგო, რომ აგრესიისთვის აგრესორი უფრო მეტს იხდის. ეს ახლა ნამდვილად უნდა გაიგოს.
მაშინ როდესაც უკრაინა ამ ომში გაიმარჯვებს, ეს შეაჩერებს არა მხოლოდ რუსული აგრესიული მადის გაფართოებას, გადაარჩენს სხვა ერებს იმისგან, რასაც ახლა განვიცდით ჩვენ – უკრაინა, საქართველო და მოლდოვა; ჩვენი გამარჯვება მოუტანს ნორმალიზებას ყველას – გააქრობს რუსულ ოკუპაციას. უკრაინელები სოლიდარულები არიან ქართველ ხალხთან, და მე მადლობას ვუხდი საქართველოს ყველა მოქალაქეს, რომლებიც ჩვენებთან [უკრაინელ სამხედროებთან] ერთად იცავენ თავისუფლებას! განსაკუთრებით მათ, ვინც იბრძვის უკრაინის თავდაცვისა და უსაფრთხოების ძალების შემადგენლობაში! თავისუფლება გაიმარჯვებს, საქართველო გაიმარჯვებს, უკრაინა გაიმარჯვებს!” – აღნიშნა ზელენსკიმ.
აშშ-ის სახელმწიფო მდივნის ენტონი ბლინკენის განცხადება გაავრცელა აშშ-ს სახელმწიფო დეპარტამენტმა. ტექსტში აღნიშნულია, რომ შეიარაღებული შეჭრისა და ქვეყნის ტერიტორიის 20%-ის ოკუპირების შემდეგ უკვე 15 წელია გასული, აშშ კი კვლავინდებურად საქართველოს სუვერენიტეტს და ტერიტორიულ მთლიანობას უჭერს მხარს საერთაშორისოდ აღიარებული საზღვრების ფარგლებში.
„რუსეთის ქმედებებმა სამუდამოდ შეცვალა კონფლიქტისგან დაზარებული მოსახლეობის ცხოვრება. უდიდესი პატივისცემით ვიხსენებთ დაღუპულებს, თანაგრძნობას ვუცხადებთ დაჭრილებს და იძულებით გადაადგილებულებს“, – ვკითხულობთ ბლინკენის განცხადებაში.
- “ომზე მახსენდება მონო-ბარათი”. ვის როგორ ახსოვს აგვისტოს ომი
- აგვისტო, 2008. რუსეთ-საქართველოს ომის ქრონიკები
აშშ-ს სახელმწიფო მდივანმა ასევე ისაუბრა კრემლის მიერ განხორციელებულ დეზინფორმაციის კამპანიებზე, ბორდერიზაციასა და ხალხის მასობრივი გადაადგილებაზე, რაც უამრავ სირთულეს უქმნის საქართველოს სახელმწიფოს. ბლინკენი აღნიშნავს, რომ როგორც ქართველი, ისე უკრაინული ხალხი რუსეთის საერთაშორისო სამართლისადმი უპატივცემულობის და ასევე მეზობლებზე დომინირების სურვილის მსხვერპლი გახდა.
“აშშ მტკიცედ დგას იმ პოზიციაზე, რომ რუსეთმა 2008 წელს ხელმოწერილი 6-პუნქტიანი შეთანხმება უნდა შეასრულოს და თავისი ჯარი კონფლიქტის დაწყებამდე არსებულ პოზიციებზე გაიყვანოს. რუსეთმა ასევე უარი უნდა თქვას საქართველოს რეგიონების – აფხაზეთის და სამხრეთ ოსეთის, ე. წ. დამოუკიდებლობის აღიარებაზე. ეს იმისთვის არის საჭირო, რომ ასობით ათასმა იძულებით გადაადგილებულმა პირმა თავის სახლში დაბრუნება შეძლოს. აშშ ურყევი რჩება ქართველი ხალხის მხარდაჭერაში და მის ევროატლანტიკური ინტეგრაციისკენ დაუძლეველ მისწრაფებაში“, – აღნიშნავს ენტონი ბლინკენი.
ევროპული საბჭოს პრეზიდენტი შარლ მიშელიც აღნიშნავს, რომ რუსეთის მიერ საქართველოში შეჭრიდან 15 წლის შემდეგ ურყევი რჩება ევროკავშირის მხარდაჭერა საქართველოს ტერიტორიული მთლიანობისა და სუვერენიტეტისადმი.
„ჩვენ ვდგავართ საქართველოს მამაცი ხალხის გვერდით, რომელმაც აირჩია ევროკავშირის და ნატოს გზა“, — წერს მიშელი.
ასევე რუსეთ-საქართველოს ომის წლისთავს გამოეხმაურა ევროკავშირის უმაღლესი წარმომადგენელი საგარეო პოლიტიკისა და უსაფრთხოების საკითხებში ჯოზეფ ბორელი. მაგ განაცხადა, რომ:
„ევროკავშირის ერთგულება საქართველოში კონფლიქტის მშვიდობიანი მოგვარების მიმართ უფრო ძლიერია, ვიდრე ოდესმე. ვგმობთ რუსეთის სამხედრო ძალების განგრძობად ყოფნას აფხაზეთსა და სამხრეთ ოსეთში“.
ომის წლისთავს გამოეხმაურა ამერიკის შეერთებული შტატების მისია ეუთო-ში. მათ აღნიშნეს, რომ 15 წლის წინ შეიჭრა რუსეთი საქართველოში და ათწლეულების მანძილზე საქართველოს მოქალაქეები აფხაზეთსა და სამხრეთ ოსეთში ოკუპაციის ქვეშ ცხოვრობენ, ბევრი დევნილია.
“რუსეთის 2008 წლის თავდასხმა არის საშინელი შეხსენება მათთვის, ვინც აგრძელებს ტანჯვას რუსეთის შემოსევების კვალდაკვალ საქართველოსა და უკრაინაში“, — ვკითხულობთ მისიის განცხადებაში.
განცხადება გაავრცელა უკრაინის საგარეო საქმეთა სამინისტრომ. მათაც მხარი დაუჭირეს საქართველოს სუვერენიტეტსა და ტერიტორიულ მთლიანობას. ასევე ხაზი გაუსვეს რუსული ჯარის მიერ საქართველოს რეგიონების ოკუპაციას.
15 years ago #Russia invaded #Georgia. 🇬🇪regions, Abkhazia and Tskhinvali region/South Ossetia, remain occupied by 🇷🇺troops. #Ukraine stands with Georgian people and reiterates its support for sovereignty and territorial integrity of 🇬🇪 within internationally recognized borders.
— MFA of Ukraine 🇺🇦 (@MFA_Ukraine) August 7, 2023
„15 წლის წინ რუსეთი შეიჭრა საქართველოში. საქართველოს რეგიონები — აფხაზეთი და ცხინვალის რეგიონი/სამხრეთ ოსეთი — კვლავ ოკუპირებულია რუსული ჯარის მიერ. უკრაინა დგას ქართველი ხალხის გვერდით და იმეორებს თავის მხარდაჭერას საქართველოს სუვერენიტეტისა და ტერიტორიული მთლიანობისადმი მის საერთაშორისოდ აღიარებულ საზღვრებში“, — ნათქვამია უკრაინის საგარეო საქმეთა სამინისტროს განცხადებაში.
საქართველოს მხარდამჭერი განცხადება გაავრცელა ესტონეთის პრეზიდენტმა კაია კალასმა და ესტონეთის საგარეო საქმეთა სამინისტრომაც.
„15 წლის წინ დღევანდელ დღეს რუსეთმა დაიწყო აგრესია საქართველოში. საქართველოს 20% კვლავ ოკუპირებულია. სისასტიკე და საერთაშორისო დამართლის დარღვევა [რუსეთის მხრიდან – ჯემნიუსი] გრძელდება. ჩვენ უნდა დავასრულოთ რუსეთის აგრესიის ციკლი“, — წერს კალასი ტვიტერზე.
„15 წლის შემდეგ საქართველო კვლავ ატარებს რუსეთის არაპროვოცირებული შეჭრის ნაიარევს“, — წერია ესტონეთის საგარეო საქმეთა სამინისტროს Twitter-ზე. მათ აღიშნეს, რომ ესტონეთი აგრძელებს საქართველოს ტერიტორიული მთლიანობისა და მისი ევროატლანტიკური ინტეგრაციის მხარდაჭერას.
რუსული ოკუპაცია, ასევე რუსეთის მიერ საერთაშორისო სამართლის უხეში დარღვევით საქართველოზე თავდასხმა დაგმეს ლიეტუვას პრეზიდენტმა გიტანას ნაუსედამ და ლატვიის საგარეო საქმეთა სამინისტრომ.
„ჩვენ ყოველთვის მხარს ვუჭერდით საქართველოს სუვერენიტეტსა და ტერიტორიულ მთლიანობას. დღეს უკრაინა იცავს თავის თავისუფლებას იმავე აგრესორისგან. მოვუწოდებთ რუსეთს, გაიყვანოს ძალები საქართველოსა და უკრაინის ტერიტორიებიდან“, — ამბობს ნაუსედა.
„ჩვენ მტკიცედ ვუჭერთ მხარს საქართველოს დამოუკიდებლობას, სუვერენიტეტს, ტერიტორიულ მთლიანობას და მის გზას ევროატლანტიკური ინტეგრაციისკენ“, — წერია ლატვიის საგარეო საქმეთა სამინისტროს განცხადებაში.
განვაგრძობთ სუვერენიტეტისა და ქართველი ხალხის ევროპული მისწრაფებების მხარდაჭერას, წერს ევროპარლამენტის პრეზიდენტი რობერტა მეცოლა Twitter-ზე:
“15 წლის წინ რუსეთი საქართველოში შემოიჭრა – აგრესიის და ოკუპაციის მანკიერი ტაქტიკა. კრემლს არ სურდა ქართველებს გადაეწყვიტათ საკუთარი მომავალი. ევროპარლამენტი განაგრძობს ტერიტორიული მთლიანობის, სუვერენიტეტისა და ქართველი ხალხის ევროპული მისწრაფებების მხარდაჭერას”, – აღნიშნა მიცოლამ.
განცხადება გაავრცელა დანიის საგარეო საქმეთა სამინისტრომ. მათ დაგმეს რუსეთის სამხედროების უკანონო ყოფნა საქართველოს ტერიტორიებზე.
„15 წლის წინ რუსეთის ჯარები შეიჭრნენ საქართველოში მეზობელი ქვეყნების წინააღმდეგ აგრესიის ახალ ფაზაში. დანია გმობს რუსეთის უკანონო სამხედრო ყოფნას საქართველოს ტერიტორიებზე — აფხაზეთსა და ცხინვალში/სამხრეთ ოსეთში“, – წერია დანიის საგარეო საქმეთა სამინისტროს განცხადებაში.
რუმინეთის საგარეო საქმეთა სამინისტრომ აღნიშნა, რომ აგვისტოს ომის 15 წლისთავი არის რუსეთის აგრესიული ქცევის ხანგრძლივი ისტორიის შეხსენება.
