აფხაზეთში დააკავეს პოლიციელი, რომელმაც დაკავებულს კამერების წინ სცემა
პოლიციის სისასტიკე აფხაზეთში
აფხაზეთში დააკავეს პოლიციელი, რომელმაც ერთ-ერთი დაკავებულს კამერების წინ სცემა. ამ დაკავებას წინ უძღოდა ვიდეოს გავრცელება სოციალურ ქსელში, სადაც ჩანდა, როგორ ურტყამდა პოლიციის თანამშრომელი დაკავებულს და როგორ მშვიდად უყურებდნენ ამას პოლიციის სხვა თანამშრომლები.
ამბავს სოციალურ ქსელში დიდი ვნებათაღელვა მოჰყვა. აფხაზეთში ფიქრობენ, რომ პოლიციელის დაკავება სწორედ ამ ხმაურის დამსახურებაა, სხვა შემთხვევაში, ეს საქმეც ისევე დაიმალებოდა, როგორც არაერთი მსგავსი შემთხვევა.
პოლიციის ლეიტენანტ მანჩა კიახბას წინააღმდეგ სამსახურებრივი უფლებამოსილების გადამეტების ბრალდებით სისხლის სამართლის საქმეა აღძრული. სოხუმის საქალაქო სასამართლოს გადაწყვეტილებით პოლიციელი ორთვიან პატიმრობაშია.
გამოძიებით დადგინდა, რომ 2024 წლის 3 თებერვალს, სოხუმის პოლიციის პირველი სამმართველოს შენობაში, მან მუშტებით სცემა დაკავებული ასტამურ საბეკია. საბეკია 2023 წლის ოქტომბერში დააკავეს პოლიციელებისთვის წინააღმდეგობის გაწევისა და მათი შეურაცხყოფის ბრალდებით.
ვიდეო, რომელშიც ჩანდა, რომ პოლიციელი დაკავებულს სცემდა, სოციალურ ქსელებში ივნისის შუა რიცხვებში გავრცელდა. ამავე ვიდეოში ჩანდა, რომ პოლიციის სხვა თანამშრომლები ამ ამბავს მშვიდად უყურებდნენ.
ვიდეოს გავრცელების შემდეგ, შინაგან საქმეთა სამინისტრომ გამოაქვეყნა განცხადება, რომელშიც ნათქვამია, რომ აღნიშნულ ფაქტზე უკვე ჩატარდა შიდა გამოძიება, პოლიციელი გაათავისუფლეს სამსახურიდან, “დამკვირვებლებს“ კი ჯარიმა დაეკისრათ.
თუმცა, ასეთმა მსუბუქმა სასჯელმა საზოგადოება აღაშფოთა. მით უმეტეს, რომ ეს არ არის პოლიციის სისასტიკის პირველი შემთხვევა. ასეთ შემთხვევებს სისტემური ხასიათი აქვს და ორ შემთხვევაში მომხდარი დაკავებულების სიკვიდილითაც კი დასრულდა.
- პოლიციის სისასტიკე აფხაზეთში: როდესაც დაკავებულთა წამება ნორმაა და არა გამონაკლისი
- პოლიციის სისასტიკე აფხაზეთში: როდესაც დაკავებულთა წამება ნორმაა და არა გამონაკლისი
ამჯერად კი, არსებობს შესაძლებლობა, რომ სამართლიანობამ იზეიმოს. თუმცა, სოციალური ქსელების მომხმარებლები შიშობენ, რომ როცა მღელვარება ჩაცხრება, ეს საქმე მაინც ჩაიფარცხება.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
