ჩემოდნების აქცია ქუთაისში, საჩუქრად გაგზავნილი ასაფეთქებელი ახალქალაქში და სხვა ამბები საქართველოს რეგიონებიდან. დაიჯესტი
ადგილობრივი მედიის დაიჯესტი
გორში შიმშილის გამო მოსწავლე გაკვეთილზე ცუდად გახდა
გორში, მე-7 საჯარო სკოლაში, დაწყებითი კლასის ერთ-ერთი მოსწავლე გაკვეთილზე ცუდად გახდა. როგორც რადიო „მოზაიკას“ სკოლის დირექტორმა უთხრა, მოსწავლე მშიერი იყო.
რადიო “მოზაიკა” წერს, რომ ეს არ არის პირველი შემთხვევა.
“ამ კვირაში რამდენჯერმე გამოიძახეს სასწრაფო, ერთი და იმავე მიზეზით. ბავშვები ცუდად ხდებიან, რადგან სკოლაში მშივრები დადიან. ხშირ შემთხვევაში, შიმშილის მიზეზი უსახსრობაა”, – ამბობენ მშობლები რადიო “მოზაიკასთან”.
ვრცლად: რადიო მოზაიკა
სექსუალურ კავშირზე უარის გამო, ახალქალაქში კაცმა ქალს საჩუქარში ჩადებული ასაფეთქებელი გაუგზავნა
ახალქალაქში მცხოვრებმა ახალგაზრდა ქალმა 13 დეკემბერს, საღამოს, სახლის კართან ყუთით საჩუქარი შენიშნა. ყუთში ტკბილეული და ასაფეთქებელი ნივთიერება იყო. მოწყობილობა აფეთქდა. ქალი სიკვდილს სასწაულებრივად გადაურჩა, ოთახიდან გასვლა მოასწრო. თუმცა, დაზიანდა მისი სახლი.
მომხდარიდან მალევე შინაგან საქმეთა სამინისტრომ ამ საქმეზე შუა ხნის კაცი დააკავა. აღმოჩნდა, რომ კაცმა ქალს ასაფეთქებელი მოწყობილობა მას შემდეგ გაუგზავნა, რაც მისგან უარი მიიღო სექსუალურ კავშირზე. კაცი ქალს იმიჯის შელახვითაც აშანტაჟებდა. ბრალდებული დაკავებულია. მას წინასწარი პატიმრობა შეუფარდეს.
ვრცლად: Sknews.ge
ახალქალაქში სასამართლომ გაათავისუფლა კაცი, რომელსაც ათი წლის ბავშვზე სექსუალურ ძალადობას ედავებიან
ახალქალაქის რაიონული სასამართლოს მოსამართლემ, არარატ ესოიანმა, 50 წლამდე კაცი, რომელიც ათი წლის ბავშვზე სექსუალურ ძალადობაში იყო ბრალდებული, უდანაშაულოდ ცნო. მცირეწლოვანის დედა მოსამართლის გადაწყვეტილებას აპროტესტებს და კაცის დასჯას ითხოვს.
კაცი ბავშვის მეზობელია. დედა ამბობს, რომ ამ კაცმა მის შვილზე არაერთხელ იძალადა. ამავე დროს, აშინებდა, მოკვლით ემუქრებოდა, თუ ბავშვი მომხდარს ვინმეს მოუყვებოდა: „მოატყუა ჩემი შვილი. ორჯერ მოხდა…შეიყვანა სახლში და დააბა… ჩემმა მეზობელმაც დაინახა“.
ოჯახი სოციალურად დაუცველია. დედა მარტოხელაა. ამბობს, რომ ახლა ისინი გამუდმებულ შიშში ცხოვრობენ, რადგან ბრალდებული კაცი გარეთაა და მათ ყოველდღე ხედავს. ბავშვს კი ამის გამო ფსიქოლოგიური პრობლემები დაეწყო.
ვრცლად: Sknews.ge
ხონში ახალგაზრდა კაცი მოკლეს
ხონში, ე.წ. სამხედრო დასახლებაში ახალგაზრდა კაცი მოკლეს. შემთხვევა 17 დეკემბერს მოხდა.
გამოცემა „ქუთაისიპოსტის“ ინფორმაციით, დაპირისპირებას სიტყვიერი და ფიზიკური კონფლიქტი უძღოდა წინ.
ვრცლად: kutaisipost.ge
ქუთაისში, ნასვამმა კაცმა მგზავრებიანი ავტობუსის გატაცება სცადა
შემთხვევა მაშინ მოხდა, როდესაც, ერთ-ერთ გაჩერებაზე, მძღოლი ავტობუსიდან ჩავიდა. ერთ-ერთმა ნასვამმა მგზავრმა, მძღოლის ადგილი დაიკავა და ავტობუსი დაძრა. მგზავრები ყვებიან, რომ ის ყველას თავის სახლში ეპატიჟებოდა.
„დღემდე ვერ ხსნის ამ ფაქტს, თუ როგორ აღმოჩნდა მძღოლის სავარძელში. თვითონაც არ იცის სად მიყავდა მგზავრები, რა მარშუტით გადაადგილდებოდა“, – ასე ამართლებს გამტაცებელს მისი ადვოკატი.
ვრცლად: kutaisipost.ge
გორის ერთ უბანში სასმელი წყლის მოთხოვნით ხალხმა გზა გადაკეტა
გორში, ვერხვების უბანში მცხოვრებლებმა, სასმელი წყლის მოთხოვნით ის გზა გადაკეტეს, რომელიც ცენრტალურ მაგისტრალს უერთდება. ხალხი ამბობს, რომ წლებია მათ წყლის პრობლემა აქვთ და მოსაგვარებლად ხელისუფლება არაფერს აკეთებს.
ვრცლად: qartli.ge
ნინოწმინდაში, სოფელ ხანჩალში, რიტუალების სახლი ინგრევა
ნინოწმინდაში, სოფელ პატარა ხანჩალში მცხოვრებლები რიტუალების სახლის შეკეთებას ითხოვენ. შენობა, სადაც ქელეხები იმართება, ნახევრად დანგრეულია.
“სახურავი ჩამტვრეულია და წყალი ჟონავს, კარი გატეხილია, სკამები, მაგიდები – ყველაფერი გამოსაცვლელია. სამზარეულოც ცუდ მდგომარეობაშია. არავის აინტერესებს, არავინ საუბრობს და არ ფიქრობს ამაზე“, – უთხრეს ადგილობრივებმა რადიო „ნორს“.
ვრცლად: nor.ge
ჩემოდნების აქცია ქუთაისში
“ჩემოდნების აქცია” – ასეთი პერფორმანსი გაიმართა ქუთაისში საქართველოს პარლამენტის ქუთაისიდან თბილისში დაბრუნებიდან ოთხი წლის თავზე. მოძრობამ “დატოვე პარლამენტი ქუთაისში” პარლამენტის ყოფილ შენობასთან საპარლამენტო დედაქალაქის სტატუსის ჩამორთმვა გააპროტესტა.
აქციის ორგანიზატორთა თქმით, “გაჩერებული ქუთაისის” მოქალაქეებს არაფერი რჩებათ, გარდა იმისა, რომ ბარგი ჩაალაგონ და ქალაქი დატოვონ. ამიტომ, სიმბოლურად, მათ ჩემოდნებზე ის ქვეყნები ეწერათ, სადაც ხალხი მიდის ემიგრაციაში.
ვრცლად: kutaisipost.ge
თელაველმა ახალგაზრდებმა გაჭირვებულების დასახმარებლად წინასაახალწლო კამპანია დაიწყეს
თელავში მცხოვრებმა ახალგაზრდებმა სოციალურად დაუცველი მოქალაქეების დასახმარებლად კამპანია დაიწყეს. მათ იდეას ,,ბედნიერი ახალი წელი 2023″ დაარქვეს. ახალგაზრდებს აქვთ იდეა, შეაგროვონ თანხა და ამ ფულით სოციალურად დაუცველ ოჯახებს 100 ლარის ღირებულების საახალწლო ნობათი შეუძინონ.
კამპანიაში ჩართვა და მოსახლეობის დახმარება ნებისმიერ ადამიანს შეუძლია. ანგარიშის ნომრები „კახეთის ხმის“ მასალაში შეგიძლიათ იპოვოთ.
ვრცლად: knews.ge
გურჯაანში სილამაზის სალონებს ამოწმებენ
გურჯაანში, საზოგადოებრივი ჯანდაცვის სამსახურმა, სილამაზის სალონების აღრიცხვა, პასპორტიზაცია და მონიტორინგი დაიწყო.
როგორც გამოცემა “სპექტრი” წერს, 100-მდე სალონი უკვე შეამოწმეს. ჯანდაცვის სამსახური ამოწმებს, რამდენად არის დაცული უსაფრთხოების ნორმები სალონებში.
ვრცლად: Speqtri.ge
მთავარი ფოტო: თათა კაჭკაჭაშვილი, რადიო თავისუფლება
ადგილობრივი მედიის დაიჯესტიm
