"ისინი ცოცხლები გვჭირდება" - აზოვის მებრძოლები რუსეთის კონტროლირებად ტერიტორიაზე გაიყვანეს

აზოვის მებრძოლები რუსეთის კონტროლირებად ტერიტორიაზე გაიყვანეს

უკრაინაში რუსეთის შეჭრიდან 82-დღიანი წინააღმდეგობის შემდეგ, 16 მაისის საღამოს, “აზოვსტალის” ქარხნიდან 260-ზე მეტი უკრაინელი ჯარისკაცის ევაკუაცია განხორციელდა. მათ შორის, 53 დაჭრილი იყო.

ათობით ავტობუსმა ისინი რუსეთის მიერ კონტროლირებად ნოვოაზოვსკსა (დონეცკის ოლქი) და ოლენივკაში (ყირიმი) გადაიყვანა.

უკრაინის ხელისუფლება აცხადებს, რომ მათ რუს ტყვეებში გაცვლას აპირებს. რუსული მხარე ამას ჯერ არ ადასტურებს.

“აზოვსტალი” უკრაინის მნიშვნელოვანი საპორტო ქალაქის დასაცავად ბოლო ბასტიონი იყო. ახლა მარიუპოლი, რომელიც მთელი მსოფლიოსთვის სიმამაცის სიმბოლოდ იქცა და სამთვიანი დაბომბვისა და ალყის შემდეგ თითქმის მთლიანად განადგურდა, რუსული ჯარის კონტროლის ქვეშაა.

• ბირთვული დარტყმა, კონტრშეტევა, ცეცხლის შეწყვეტა? უკრაინაში ომის პროგნოზები
• მოსაზრება: მოპარული გამარჯვების დღე
• რიგი ცხედრების ამოსაცნობად. ქალაქი ბუჩა რუსეთის ჯარის გასვლიდან ერთი თვის შემდეგ
• მშვიდობის ოაზისი “მეორე ფრონტის” ნაცვლად. მოსაზრება აფხაზეთიდან

ჯერ უცნობია ისევ რჩებიან თუ არა უკრაინელი მებრძოლები “აზოვსტალის” ბუნკერებსა და გვირაბებში, რომლებიც მიწისქვეშეთში, ბირთვული ომისთვის წინააღმდეგობის გაწევის მიზნით, საბჭოთა ეპოქაში აშენდა.

აქამდე ითვლებოდა, რომ ქარხანას 600-მდე სამხედრო იცავდა. იქ მყოფი ყველა მშვიდობიანი მოქალაქე, რამდენიმე ასეული ადამიანი, მაისის თვეში ჰუმანიტარული დერეფნებით გაიყვანეს.

“აზოვის” პოლკის მებრძოლის მეუღლემ, ნატალია ზარიცკაიამ, ევაკუაციის დაწყებამდე რამდენიმე საათით ადრე ჟურნალისტებთან საუბრისას, ქარხანაში ვითარება შემდეგნაირად აღწერა:

”ისინი ჯოჯოხეთში არიან. ყოველ დღე ახალ ჭრილობებს იღებენ. ბევრს ხელი ან ფეხი აღარ აქვს. ისინი დაქანცულები არიან, წამლებიც არ აქვთ“.

„უკრაინელი სამხედროების, დაზვერვის, მოლაპარაკებების ჯგუფის, წითელი ჯვრის საერთაშორისო კომიტეტისა და გაეროს ქმედებების წყალობით, ვიმედოვნებთ, შევძლებთ ჩვენი ბიჭების სიცოცხლის გადარჩენას. მათ შორის მძიმედ დაშავებულები არიან, მათ ეხმარებიან.

უკრაინას ცოცხალი სჭირდება უკრაინელი გმირები. ეს არის ჩვენი პრინციპი. მარიუპოლის დამცველთა გადარჩენის ოპერაცია ჩვენმა სამხედროებმა და დაზვერვამ დაიწყეს. ბიჭების სახლში დასაბრუნებლად მუშაობა გრძელდება. ამ საქმეს სიფრთხილე და დრო სჭირდება“, – განაცხადა უკრაინის პრეზიდენტმა ვოლოდიმირ ზელენსკიმ.

თავდაცვის მინისტრის მოადგილემ ანა მალიარმა ხაზგასმით აღნიშნა, რომ ჯარისკაცებმა მარიუპოლში „სრულად შეასრულეს სარდლობის მიერ დასახული ყველა დავალება“:

აზოვსტალის დაკავებით მათ ხელი შეუშალეს რუსეთს სამხრეთის ქალაქ ზაპოროჟიეს სწრაფად დაკავებაში და კრიტიკულად საჭირო დრო მოიგეს რეზერვების მოწყობისთვის, ძალების გადაჯგუფებისა და დასავლური შეიარაღების მიღებისთვის.

“სამწუხაროდ, ჩვენ არ გვაქვს შესაძლებლობა სამხედრო გზით გავათავისუფლოთ “აზოვსტალი”. უკრაინისა და მთელი მსოფლიოსთვის ყველაზე მნიშვნელოვანი საერთო ამოცანაა მარიუპოლის დამცველების სიცოცხლის გადარჩენა“, – განაცხადა მალიარმა.

“აზოვის” ბატალიონის მეთაურმა დენის პროკოპენკომ ვიდეომიმართვაში დაადასტურა, რომ „მარიუპოლის მთელი გარნიზონის სიცოცხლის გადასარჩენად უმაღლესი სამხედრო სარდლობის დამტკიცებულ გადაწყვეტილებას ასრულებს და უკრაინელი ხალხის მხარდაჭერის იმედი აქვს“.

თავდაპირველად “აზოვის” პოლკი იყო მილიცია, რომელიც ჩამოყალიბდა რუს სამხედროებთან საბრძოლველად 2014 წელს უკრაინაში შეჭრის, ყირიმის ანექსიის და ლუგანსკისა და დონეცკის სეპარატისტული ერთეულების შექმნის შემდეგ.

წარსულში აზოვი ასოცირდებოდა ულტრამემარჯვენე ნაციონალისტებთან, მაგრამ მთლიანად დაშორდა ამ მიმართულებას და გახდა უკრაინის ეროვნული გვარდიის ქვედანაყოფი.

"დიახ, რუსეთი დამარცხდება". ოსი სამხედროების საუბარი ბიბილოვთან

რატომ თქვეს ოსმა სამხედროებმა უარი უკრაინაში ბრძოლაზე

ვიდრე “აზოვის” ევაკუაცია მიმდინარეობდა, უკრაინის ფრონტებზე ბრძოლა გრძელდება

● ძირითადი ბრძოლები ქვეყნის აღმოსავლეთით, დონბასში მიმდინარეობს.

● უკრაინამ განაცხადა, რომ ჯარებმა, რომლებიც სიდიდით მეორე ქალაქ ხარკოვს იცავენ, რუსული ჯარის უკან დახევა შეძლეს და რუსეთის საზღვრამდე დაწინაურდნენ.

● 16 მაისს დასავლეთ უკრაინაში, ლვოვში აფეთქებების სერია იყო. ლვოვის მერის თქმით, არც ერთ დარტყმას მიზნისთვის არ მიუღწევია, საჰაერო თავდაცვამ ყველა მოიგერია.

● რადგან მოსკოვი არ აპირებს დანებებას უკრაინაში სამხედრო შეჭრის დაწყებიდან თითქმის სამი თვის შემდეგაც კი, ფინეთმა და შვედეთმა გადაწყვიტეს უარი თქვან სამხედრო შეურიგებლობის პოლიტიკაზე და გამოაცხადეს ნატოში გაწევრიანების სურვილი.

● თუმცა ამ საკითხის მომავალი ჯერ კიდევ გაურკვეველია, რადგან თურქეთი უარს აცხადებს. მან ფინეთი და შვედეთი თურქეთში ტერორისტულად გამოცხადებული ქურთი ბოევიკების ორგანიზაციების თავშესაფარსა და მხარდაჭერაში დაადანაშაულა .

ფოტოები აზოვსტალის ბუნკერებიდან. აზოვის პოლკის პრესსამსახური/როიტერი