„აფხაზეთის სახალხო მოძრაობა“ - აფხაზეთის ახალი ოპოზიცია
აფხაზეთის ე.წ. პრეზიდენტობის ყოფილმა კანდიდატმა, ადგურ არძინბამ, რომელმაც ნახევარი წლის წინანდელ არჩევნებზე, ხმათა 35.42% დააგროვა, ახალი რესპუბლიკური საზოგადოებრივი ორგანიზაციის, „აფხაზეთის სახალხო მოძრაობის“ პრეზენტაცია გამართა.
ნახევარწლიანი დუმილის შემდეგ, პოლიტიკოსმა ხელისუფლება კორონავირუსის პანდემიასთან არაეფექტიანი ბრძოლისა და იმის გამო გააკრიტიკა, რომ არ აქვთ მკაფიო პოზიცია საკითხებისადმი, რომელიც აფხაზეთის ინტერესებს შეეხება.
„სხვა“ ოპოზიცია
აფხაზეთის პოლიტიკური არენიდან ექვსთვიანი გაუჩინარება ისტორიაში პრეზიდენტობის ყველაზე ახალგაზრდა კანდიდატმა (ის 38 წლის არის) იმით ახსნა, რომ ახალ ხელისუფლებას დრო მისცა, „რათა მათ რთული პოლიტიკური და ეპიდემიოლოგიური სიტუაციის მიუხედავად, შეექმნათ მთავრობა და წარმოედგინათ საკუთარი გეგმები და იდეები“.
„დრო გავიდა და, სამწუხაროდ, ამ დრომდე ვერ ვხედავთ ვერანაირ პროგრამას, ნათელ მოქმედებებს არსებულ კრიტიკულ სიტუაციაში, ჩვენ ბანალურად არ გვესმის, რას აკეთებს ხელისუფლება დღეს და რის გაკეთებას გეგმავს ხვალ“, – განაცხადა არძინბამ.
• მოსაზრება: აფხაზეთში კრიზისი გარდაუვალია – მნიშვნელოვანია, როგორ შეხვდება მას ხელისუფლება
• აფხაზეთის პარლამენტმა ამნისტია გამოაცხადა, შსს და საზოგადოების ნაწილი კატეგორიული წინააღმდეგია
„აფხაზეთის სახალხო მოძრაობა“ – მისი დამფუძნებლების აზრით, უნდა გახდეს ხალხის გამაერთიანებელი და ექსპერტული გადაწყვეტილებების შესამუშავებელი მოედანი და მოწოდებულია იქცეს ოპოზიციად, მაგრამ „სხვა სახით“.
თუკი, უკანასკნელი წლების განმავლობაში, ოპოზიციის ძირითადი ინსტრუმენტი იყო საპროტესტო მიტინგები და ძალაუფლების ძალის გამოყენებით ხელში ჩაგდება, ახალი ოპოზიცია, ადგურ არძინბას სახით, ადრევე გამუდმებით აკრიტიკებდა პოლიტიკური ბრძოლის ასეთ მეთოდებს. ხალხი ხუმრობს, რომ ახალ პრეზიდენტს, ასლან ბჟანიას ძალიან ბევრი შეცდომა მიტინგებად არ უჯდება, ყოფილი პრეზიდენტის, რაულ ხაჯიმბას გაძევებას კი ხალხი უფრო ნაკლებისთვის ცდილობდა.
![](https://jam-news.net/app/uploads/2020/10/121028340_466038420960402_1982364905936737121_n-1024x768.jpg)
ეპიდემია და ყარაბაღი
მოძრაობის ხელმძღვანელმა, ადგურ არძინბამ მოქმედი ხელისუფლებისადმი ძირითადი პრეტენზიების შესახებ ისაუბრა:
„დაუშვებელი ფუფუნებაა – პანდემიის პირობებში, თანამდებობებისა და გავლენის სფეროების გადანაწილებაზე დროის ხარჯვა. ამ დროისთვის ყველაზე მთავარი საკითხი – ეპიდემიასთან ბრძოლა და აქ მნიშვნელოვანია წინსწრებით მუშაობაა, როგორც ეს გაკეთდა მარტში. იმ ნაბიჯებს, რომლებიც დღეს იდგმება, ვერ ვუწოდებთ წინმსწრებს, სიტუაცია კრიტიკულია“.
უახლოეს პერიოდში, „აფხაზეთის სახალხო მოძრაობა“ კორონავირუსთან დაკავშირებით დისკუსიის ინიცირებას მოახდენს, რათა ექსპერტებთან ერთად შემუშავდეს წინადადებები.
ასევე, ადგურ არძინბა აღშფოთდა იმით, რომ ამ დრომდე არ მოიწვიეს უშიშროების საბჭო მთიან ყარაბაღში მიმდინარე ომის თემაზე: „ყველა ქვეყანა, რომელსაც ესაზღვრება ან ურთიერთობა აქვს აფხაზეთს – რუსეთიც, თურქეთიცა და საქართველოც, ამ კონფლიქტთან კავშირში არიან, გულუბრყვილობა იქნება ფიქრი, რომ ეს აფხაზეთს არ ეხება“.
ეროვნული ინტერესები და ურთიერთობა საქართველოსთან
ადგურ არძინბამ გააკრიტიკა ხელისუფლება აფხაზეთის ეროვნულ ინტერესებთან დაკავშირებით მკაფიო პოზიციის არარსებობის გამო.
თუმცა, მას არ დაუზუსტებია, მხედველობაში ჰქონდა თუ არა საკითხები, რომელიც ახლა ყველაზე მეტად აღელვებს საზოგადოებას – უძრავი ქონების რუსებზე მიყიდვა და მათ მიერ აფხაზეთის მოქალაქეობის გამარტივებული მიღება.
ჭორების თანახმად, პრეზიდენტმა უკვე გადასცა პარლამენტს შესაბამისი პროექტები წინასწარი შესწავლისთვის.
ადრე, არძინბა არაერთხელ გამოსულა გამარტივებული პასპორტიზაციისა და უძრავი ქონების უცხოელებისთვის მიყიდვის წინააღმდეგ.
ამჯერად, საუბარი იყო საქართველოსთან ურთიერთობაზე, ცხადია, იმ ცოტა ხნის წინანდელი სკანდალის ფონზე, რომელიც აფხაზეთში ქართველი პოლიტიკოსების ვიზიტმა გამოიწვია. მაშინ, აფხაზეთის პრეზიდენტის მრჩეველმა, ლაშა საკანიამ, რომელიც ქართულ დელეგაციას დახვდა და გააცილა, განაცხადა, რომ ეს პრეზიდენტის დავალებით გააკეთა და პოსტი დატოვა.
„რატომღაც, საქართველოსთან ურთიერთობები დინამიკურად ვითარდება. აქ უნდა გვესმოდეს, რომ განვსაზღვროთ წითელი ხაზები ექსპერტების დონეზე, თუ რა გვინდა და როგორ მივაღწევთ ამას“, – განაცხადა არძინბამ.
მისი აზრით, ურთიერთობების თვალსაზრისით, სასარგებლო იქნებოდა შესწავლა ცოტა ხნის წინ ხელმოწერილი ხელშეკრულებისა სერბეთსა და სეპარატისტულ კოსოვოს შორის, რომლის დამოუკიდებლობაც დასავლური ქვეყნების უმრავლესობამ აღიარა.
„ყურადღებით წაიკითხეთ, რას მოაწერა ხელი სერბეთმა და თქვით, რატომ არის, რომ ის ქვეყნები, რომლებიც დღეს საქართველოს უჭერენ მხარს, ვერ ურჩევენ მას, მოაწეროს ჩვენთან ასეთივე შეთანხმებას ხელი? სერბეთმა ხომ ფაქტობრივად საკუთარ თავზე აიღო ვალდებულება, აღიაროს პასპორტი, აწარმოოს ეკონომიკური საქმიანობა და ხელი არ შეუშალოს კოსოვოს საერთაშორისო აღიარებას. საკუთარი აღიარების გარდა, ისინი ფაქტობრივად ყველაფერზე დათანხმდნენ, მაშინ, რატომ შეიძლება კოსოვოსთვის და ჩვენთვის არა? უნდა წამოვწიოთ ეს საკითხები და დისკუსია სათანადო დონეზე ავწიოთ“, – განაცხადა პოლიტიკოსმა.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო