კომენტარი: სახეზეა უპრეცედენტოდ რეპრესიული რეჟიმი, რომლის მსგავსი საქართველოს 1930-იანი წლების შემდგომ არ ჰყოლია
ოპოზიციონერების დაპატიმრებები
“საერთაშორისო გამჭვირვალობა საქართველოს“ ადამიანის უფლებათა და მართლმსაჯულების პროგრამის მენეჯერის, სანდრო ბარამიძის თქმით, ოპოზიციონერი ლიდერების დაკავება არის სრულმასშტაბიანი დიქტატურა. როგორც მან აღნიშნა, ხელისუფლება ებრძვის დემოკრატიის საყრდენს, რაც არის პოლიტიკური პარტიები, სამოქალაქო საზოგადოება და კრიტიკულ მედია.
სანდრო ბარამიძის განცხადებით, ხელისუფლების “დე-ფაქტო რეჟიმი” საქართველოს ინტერესების საზიანოდ მოქმედებს და ყველაფერს აკეთებს იმისთვის, რომ საქართველო დემოკრატიული სამყაროსგან იზოლაციაში აღმოჩნდეს.
24 ივნისს “სტრატეგია აღმაშენებლის“ ლიდერი გიორგი ვაშაძე სასამართლომ პარლამენტის დროებითი საგამოძიებო კომისიის მოთხოვნის შეუსრულებლობის გამო დამნაშავედ ცნო და 7 თვით პატიმრობა შეუფარდა. მას 2 წლით თანამდებობის დაკავებაც აეკრძალა.
23 ივნისს, “ქართული ოცნების” სასამართლომ ოპოზიციის სამ ლიდერს – მამუკა ხაზარაძეს და ბადრი ჯაფარიძეს (ლელო – ძლიერი საქართველო), ასევე ზურაბ გირჩი ჯაფარიძეს (კოალიცია ცვლილებებისთვის) პატიმრობა შეუფარდა.
საგამოძიებო კომისიაზე გამოუცხადებლობის გამო ციხეში უკვე სხედან ნიკა მელია, ზურაბ გირჩი ჯაფარიძე და ნიკა გვარამია (კოალიცია ცვლილებებისთვის) და თავდაცვის ყოფილი მინისტრი ირაკლი ოქრუაშვილი.
ყველა მათგანს თეა წულუკიანის საგამოძიებო კომისიაზე გამოუცხადებლობას ედავებიან.
სანდრო ბარამიძე: “დე ფაქტო ხელისუფლება ფრონტალურ შეტევას ერთდროულად სამი მიმართულებით, დემოკრატიის სამივე ფუნდამენტური საყრდენის წინააღმდეგ ახორციელებს, ესენია: პოლიტიკური პარტიები, სამოქალაქო საზოგადოება და კრიტიკული მედია. ყველას მიმართ ეს შეტევა ხორციელდება საკანონმდებლო თვალსაზრისით იმიტომ, რომ უკვე მიღებული აქვს ანტიდემოკრატიული კანონები, სამართლის უზენაესობის ელემენტარული პრინციპების დამრღვევი.
ამ კანონების საფუძველზე აღმასრულებელი და სასამართლო ხელისუფლების მიერ განხორციელებული ანტიდემოკრატიული ქმედებები ხორციელდება. ეს უკვე პოლიტიკური პარტიების მიმართ თვალსაჩინოა იმიტომ, რომ არაერთი პოლიტიკური ლიდერი უკვე ციხეში არის, ზოგი განაჩენით, ზოგი განაჩენს ელოდება, მაგრამ ცხადია, მათაც იგივე ვერდიქტს გამოუტანს მურუსიძე-ჩინჩალაძის სასამართლო, როგორც უკვე გამოიტანა ხაზარაძე, ჯაფარიძის, ზურაბ გირჩი ჯაფარიძის წინააღმდეგ. ეს არის უპრეცედენტოდ რეპრესიული რეჟიმი, რომლის მსგავსი ჩვენ 1920-1930 წლების შემდგომ არ გვყოლია. მათ სჭირდებათ ლიდერების ციხეში ყოფნა, რომ საზოგადოებას შეეშინდეს და გაჩუმდეს.
მესამე სექტორის მიმართ შეტევა უკვე დაწყებულია. მოგეხსენებათ, 7 არასამთავრობო ორგანიზაციის მიმართ, მათ შორის ჩვენი ორგანიზაციის, “საერთაშორისო გამჭვირვალობის“ მიმართ ე.წ. ანტიკორუფციული ბიუროს უფროსმა, რომელიც კორუფციის დამცავი ბიურო უფრო არის სინამდვილეში, შეიტანა სასამართლოში შუამდგომლობა და სასამართლომ მისი შუამდგომლობა ე.წ. ინფორმაციის გამოთხოვის თაობაზე დააკმაყოფილა, თუმცა, ჩვენ გავასაჩივრეთ პირველი ინსტანციის სასამართლოს ბრძანებები და სააპელაციო სასამართლოს განჩინებებს ველოდებით. ცხადია, მურუსიძე-ჩინჩალაძის სასამართლოსგან კარგს არაფერს ველით, მაგრამ ასე მარტივი არ არის ჩვენთან ბრძოლა, თუნდაც იურიდიული თვალსაზრისით. ვნახოთ, რა გაუვათ, როგორ წავლენ კიდევ უფრო შორს.
“ქართული ოცნება“ სრულმასშტაბიან დიქტატურას ამყარებს. ცხადია, სასამართლოში არავითარი საჯაროობა არ სჭირდება, რადგან არავინ დაინახოს, როგორ ახორციელებენ ცრუ მართლმსაჯულებას, მართლმსაჯულების შარჟს მურუსიძე-ჩინჩალაძის მიერ დანიშნული მოსამართლეები. ეს რომ არ დაინახოს საზოგადოებამ და მეხსიერებას არ შემორჩეს, არ შემორჩეს ისტორიას არქივების სახით, სწორედ ამისთვის ხურავენ. რაც შეეხება გადაბრალებას, ბოლშევიკებიც ასე ვიღაც სხვას აბრალებდნენ მუდმივად თავიანთ დიქტატურას.“
