“Kazarma karantini”: Türkiyədən evakuasiya edilən Azərbaycan vətəndaşları soyuqdan, aclıqdan və hətta zorakılıqdan şikayətlənirlər
Yüz nəfərdən çox insan hərbi hissələrdə karantinə yerləşdirilib
Koronavirus pandemiyası səbəbilə Türkiyədən evakuasiya edilən tələbələr və digər Azərbaycan vətəndaşları Naxçıvan Muxtar Respublikasında karantin altına alınıb və onlar saxlanma şəraitindən, təhdidlərdən hətta zorakılıqdan şikayətlənirlər.
Evakuasiya edilənlər hərbi hissələrə yerləşdirilib.
“Nə yemək var, nə içmək, nə də su. 159 nəfərə 90 çarpayı var. Gecə soyuq olub, çox uşaq soyuqlayıb. Hər yerə zəng vurmuşuq, bizə baxan yoxdur”, – BBC onlardan birindən sitat gətirib.
Martın 27-ə olan rəsmi məlumata əsasən, Azərbaycanda 122 koronavirusa yoluxma halı qeydə alınıb. Yoluxanlardan üçü ölüb, on beş nəfər sağalıb.
“Qapının arxasında əsgərlər dayanıb. Amma biz həbsdə deyilik axı. Etirazımızı bildirəndə telefonumuzu və posportumuzu əlimizdən alırlar, hətta zirzəmiyə aparırlar”, – “Azadlıq Radiosu” başqa bir tələbəyə istinadən xəbər verib.
Evakuasiya olunanların bir hissəsi fizioterapiya sanatoriyasının binasında yerləşdirilib, amma bildirdiklərinə görə, orada da şərait yaxşı deyil.
Sosial şəbəkələrdə də etirazlara cavab olaraq ən azı bir tələbənin amansızca döyülməsi haqda xəbər yayılıb.
Hələlik heç bir rəsmi reaksiya yoxdur. Amma bu, Azərbaycanda karantin altına alınan insanların saxlanma şəraitindən və antisanitariyadan şikayət etdiyi ilk hadisə deyil. Prezident administrasiyasının şöbə rəisi Hikmət Hacıyev isə bildirib ki, “karantin sanatoriya deyil. Heç kim elə qəbul etməsin ki, karantinə istirahətə gəlib, onun üçün pulsuz turizm imkanları yaradılıb”.