Abxaziyada koronavirus yoluxmasının rekord artımı
Abxaziyada sentyabrın 1-də sutka ərzində rekord sayda COVID-19 virusuna yoluxma halı qeydə alınıb. 194 nəfərdən götürülən testin 29-da yeni yoluxma halı təsdiqlənib.
Bundan əvvəlki rekord avqustun ortalarında qeydə alınmışdı və həmin vaxt sutka ərzində 26 nəfər yoluxmuşdu.
Hazırda koronavirusdan müalicə üzrə ixtisaslaşmış Qudaut xəstəxanasında rəsmi məlumata əsasən, 29 nəfər müalicə alır. Onlardan 5 nəfər ağır vəziyyətdə, 9 nəfər isə orta ağır vəziyyətdədir.
Abxaziyada bu günə qədər koronavirusa yoluxma hallarının ümumi sayı 359 nəfərdir. Onlardan 125 nəfər sağalıb, dörd nəfər isə ölüb.
COVID-19 virusuna yoluxanların sayının kəskin artmasına baxmayaraq, Abxaziya hökuməti bütün respublika ərazisində sərt məhdudiyyətlər rejiminə qayıtmaq niyyətində deyil. Amma lokal karantin tədbirləri tətbiq edilir.
Məsələn, avqustda koronavirusdan bir nəfərin öldüyü Oçamçir rayonunun Labra kəndində sanitar-epidemioloji xidmətlər tərəfindən karantin tətbiq edilib. Kəndin bütün girişləri və çıxışları bağlanıb.
Bundan başqa, bəzi müəllimlərə COVID-19 diaqnozu qoyulub, onların dərs dediyi məktəblərdə tədris ilinin başlanğıcını bir həftə ləngidiblər.