Rusiyanın FTX-sinin Ermənistandakı parlament seçkilərinə müdaxiləsi: faktçekerlərin ifşası
Rusiyanın Ermənistanda seçkilərə müdaxiləsi
İyunun 7-də Ermənistanda keçiriləcək parlament seçkilərinə Rusiyanın müdaxiləsi ilə bağlı yeni faktlar ortaya çıxıb. Məlum olub ki, Rusiyadakı erməni icmasının bəzi nümayəndələri Ermənistanda daxili siyasi proseslərə təsir göstərmək üçün fəal addımlar atırlar.
Bundan əlavə, Rusiyada yaşayan və Ermənistan vətəndaşlığına malik seçicilərin “səfərbər edilməsi prosesi” Rusiya Federal Təhlükəsizlik Xidməti tərəfindən koordinasiya olunur.
Bu məlumatı faktların yoxlanılması platforması FIP.am yayıb. Platformanın jurnalisti özünü FTX əməkdaşı kimi təqdim edərək Rusiya Erməni İttifaqının müxtəlif strukturlarının rəhbərləri ilə telefon əlaqəsi saxlayıb. İttifaq nümayəndələri isə FTX zabiti ilə danışdıqlarına əmin olduqları üçün Ermənistan seçkilərinə müdaxilənin təfərrüatlarını açıqlayıblar.
Rusiya Erməni İttifaqı ümumrusiya miqyaslı iri ictimai təşkilatdır. O, Rusiyadakı erməni diasporunun nümayəndələrini birləşdirir. Təşkilat 2000-ci ilin iyununda “Rusiya ermənilərinin birləşdirilməsi, milli kimliyin qorunması və Rusiya ilə Ermənistan xalqları arasında dostluğun möhkəmləndirilməsi” məqsədilə yaradılıb.
Xüsusilə, Ulyanovsk erməni icmasının rəhbəri Arsen Abramyan guya FTX əməkdaşı (əslində isə jurnalist) ilə söhbətində icma üzvlərinə “Rusiya komandasına” səs vermək barədə dəqiq göstəriş verildiyini təsdiqləyib. Abramyanın sözlərinə görə, bu komandaya dörd siyasi qüvvə daxildir:
- Ermənistanın sabiq prezidenti Robert Koçaryanın “Ermənistan” bloku;
- Rusiyalı iş adamı və dollar milyarderi Samvel Karapetyanın “Güclü Ermənistan” Partiyası;
- iri sahibkar Qaqik Tsarukyanın “Çiçəklənən Ermənistan” Partiyası;
- keçmiş ombudsman Arman Tatoyanın “Birliyin Qanadları” Partiyası.
Abramyan bildirib ki, onlar “Birliyin Qanadları” Partiyasına dəstəklərini açıq şəkildə nümayiş etdirmirlər. Partiya özünü “Avropayönlü imicə malik siyasi qüvvə” kimi təqdim edir və Rusiya strukturları bu təsəvvürün qorunub saxlanmasına çalışırlar.
Faktçekerlərin araşdırmasının əsas detalları.
- Paşinyana qarşı “mübarizə” üçün göndərilən Rusiya xüsusi xidmət orqanlarının agentləri: “The İnsider”in ifşaları
- “İnformasiya bombası”: Rusiyanın Ermənistana qarşı hibrid hücumları ilə bağlı məxfi sənədlər sızdırılıb
- “Üçbaşlı müharibə partiyasından baş nazirliyə namizəd: Robert Koçaryan” – Ermənistan Milli Məclisinin vitse-spikeri
İttifaq aviabiletlərlə bağlı kömək göstərir
Ulyanovsk erməni icmasının rəhbəri seçicilərin Rusiyadan Ermənistana daşınmasının necə təşkil edildiyini açıqlayıb. O bildirib ki, bəzi insanlar biletləri özləri alır, icma isə buna imkanı olmayanlara kömək edir:
“Şəxsən mən hələlik heç kimə bilet almamışam. Getməli olan uşaqlar var idi, deyirdilər: “Ürəkdən getmək istəyirəm, sadəcə imkanım yoxdur”. Xahiş edirik, məsələn, uşaqlar pul göndərirlər. Mən də ictimai fəal kimi insanlardan, dostlarımdan xahiş edirəm, onlar da kömək edirlər”.
O bildirib ki, hazırda Moskvadadır və “prosesi” telefonla idarə edir.
Abramyan həmçinin xəbərdarlıq edib ki, özü seçkilərdə iştirak edə bilməyəcək, çünki Ermənistan vətəndaşı deyil. Faktçekerlər müəyyən ediblər ki, o, daha əvvəl erməni icmasına müraciətində Ermənistanda keçiriləcək seçkilərdə şəxsən iştirak edəcəyini bildirmişdi.
Açıq mənbələrdən əldə olunan məlumata görə, 60 yaşlı Arsen Abramyan 2007-ci ilədək Ulyanovskda “Voskevan” erməni icmasına rəhbərlik edib, 2007-ci ildən isə Rusiya Erməni İttifaqının Ulyanovsk regional bölməsinin rəhbəridir.
FTX ilə erməni icması arasında “tam qarşılıqlı anlaşma” var
Özünü “FTX zabiti” kimi təqdim edən jurnalist Abramyana deyib ki, Rusiya xüsusi xidmət orqanları Ermənistana getmək istəyənlərə istənilən vaxt maliyyə dəstəyi göstərə bilər. O, dərhal belə cavab alıb: “10-15 nəfəri göndərmək lazımdır, göndərsələr, pis olmaz”. Abramyan əlavə edib ki, əlbəttə, Ermənistan pasportu olan şəxsləri nəzərdə tutur.
FTX kuratoru ilə işin nə dərəcədə səmərəli olduğu barədə suala cavab verən erməni icmasının rəhbəri bildirib:
“Biz sizin həmkarlarınızla əməkdaşlıq edirik, hər şey əladır. Artıq 24 ildir sədrlik edirəm və Allaha şükür, aramızda tam qarşılıqlı anlaşma var”.
Bundan başqa, Arsen Abramyan özünü FTX əməkdaşı kimi təqdim edən jurnalistə Ermənistanın hazırkı hökumətindən şikayət edib. O bildirib ki, Ermənistan hökumətinin nümayəndələri onlarla əməkdaşlıq etmir və Rusiya ilə müttəfiqlik münasibətlərini dəstəkləmirlər.
Rusiya xüsusi xidmət orqanlarının əməkdaşları “belə danışmırlar”
Faktların Yoxlanılması Platforması həmçinin Tula və Voronej erməni icmalarının rəhbərləri Rafik Papyan və Armen Yeqiazaryanla əlaqə saxlayıb. Onlar da öz növbələrində FTX ilə əlaqədə olduqlarını təsdiqləyiblər.
“Narahatlıq doğuran qısa söhbətin sonunda Rusiya Erməni İttifaqının Tula regional bölməsinin rəhbəri jurnalistimizə irad bildirdi: Rusiya xüsusi xidmət orqanlarının əməkdaşları ‘belə danışmırlar’.
Bu arada Rusiyanın işğalı altında olan Ukrayna Krımındakı erməni icmasının rəhbəri Georgi Akopyan seçicilərin Ermənistana göndərildiyini təsdiqləyib, lakin başqa təfərrüat açıqlamayıb”, — FIP.am nəşrinin faktçekerləri bildirirlər.
Rusiyanın Ermənistanda seçkilərə müdaxiləsi
