Մուխտարլիների ընտանիքը թիկնապահ կունենա, փաստաբանը միջնորդում է գործը դատախազությանը փոխանցել

Վրաստանում անհետացած ադրբեջանցի լրագրող Աֆղան Մուխտարլիի կինը՝ Լեյլա Մուստաֆաևան այցելել է Թբիլիսիի ոստիկանության առաջին բաժանմունքը: Հանդիպումը նվիրված է եղել Մուխտարլիների ընտանիքի անվտանգության հարցերին, ինչպես նաև գործի վկաներին:

Իրավապահ մարմինների որոշմամբ՝ Լեյլա Մուստաֆաևային և նրա անչափահաս երեխաներին թիկնապահ է տրամադրվելու: Նրանց նաև հնարավորություն է տրվել օգտվելու արտակարգ ահազանգից: Վրաստանում Մուխտարլիի փաստաբան Արչիլ Չոպիկաշվիլիի խոսքով՝ մոտ ժամանակներս կլուծվի նաև այդ գործով վկաների պաշտպանության հարցը:

Քննչական գերատեսչությունից դուրս գալուց հետո Մուստաֆաևան լրագրողներին հայտարարել է, որ պլանավորում է Վրաստանում մնալ, որպեսզի հնարավորություն ունենա ուշի-ուշով հետևել ամուսնու գործին: Նա նաև հայտնել է, որ վախենում է Մուխտարլիի կյանքի համար՝ ասելով, որ Ադրբեջանում նրան վտանգ է սպառնում: Մուխտարլիի վրացի փաստաբանի խոսքով՝ իր ադրբեջանցի գործընկերոջն այսօր թույլ չեն տվել հանդիպել նրա վստահորդի հետ:

Վրաստանում Մուխտարլիի փաստաբանը միջնորդում է, որ գործը դատախազություն փոխանցվի: Ընտանիքը կասկածում է, որ Մուխտարլիի առևանգման գործում ներգրավված են եղել ոստիկաններ, այդ պատճառով էլ արդարացված չի համարում, որ գործով զբաղվի ներքին գործերի նախարարությունը: Փաստաբանի խոսքով՝ այն, որ քննությունը մինչև հիմա վարում է ՆԳՆ-ն, անուղղակորեն ցույց է տալիս, որ առևանգմանը ոստիկանների կամ այլ պաշտոնատար անձանց մասնակցությունը չի դիտարկվում:

«Օրենքի համաձայն՝ եթե խոսքը գնում է ոստիկանության աշխատակցի կամ պետական ծառայողի ենթադրյալ հանցագործության մասին, այդ գործով զբաղվում է դատախազությունը: Ինչպես նաև, ելնելով գործի բարդությունից և կարևորությունից, բոլոր հիմքերը կան, որպեսզի դրա հետաքննությամբ զբաղվի դատախազությունը», — ասում է փաստաբան Չոպիկաշվիլին:

Նրա պաշտպանության տակ գտնվող Մուխտարլին հայտարարել է, որ իրեն առևանգողները քրեական ոստիկանության համազգեստով են եղել:

Լրագրող Աֆղան Մուխտարլին Վրաստան է եկել Ադրբեջանից 2014թ-ին և կեցության իրավունք ստացել: Տեղափոխվելու պատճառ են հանդիսացել Ադրբեջանի իշխանությունների կողմից հաճախակի դարձած ճնշումները: Նրա մի քանի դիմումները Մարդու իրավունքների եվրոպական դատարան դիտարկման փուլում են: Վերջին ժամանակներս նա համագործակցում էր միջազգային լրատվամիջոցների, IWPR և Meydan.tv կազմակեպությունների հետ:

Ադրբեջանցի լրագրող Աֆղան Մուխտարլին անհետացել է Թբիլիսիում 2017թ-ի մայիսի 29-ին: Ավելի ուշ պարզվել է, որ նա ադրբեջանական իրավապահ մարմինների մոտ է: Մուխտարլիի խոսքով՝ Վրաստանում նա առևանգվել է տեղական հատուկ ծառայությունների աշխատակիցների կողմից, նրա գլխին պարկ են հագցրել և փոխանցել ադրբեջանական իրավապահներին: Ադրբեջանական դատարանը Մուխտարլիին 3 ամսվա նախնական կալանքի է դատապարտել սահմանի ապօրինի հատման և մաքսանենգության համար: Մուխտարլիի խոսքով՝ նրա գրպանը 10 հազար եվրո են գցել: