Թբիլիսիում կկառուցվի Trump Tower` քաղաքի ամենաբարձր շենքը
Wall Street Journal-ի (WSJ) տեղեկությունների համաձայն՝ ԱՄՆ նախագահ Դոնալդ Թրամփի բիզնես հոլդինգն ու գործընկերները պլանավորում են Վրաստանի մայրաքաղաքում կառուցել Trump Tower (Թրամփի աշտարակ), որը կդառնա քաղաքի ամենաբարձր շենքը։
«Wall Street Journal»-ը, հղում անելով նախագծին մասնակցող կողմերի ներկայացուցիչներին, հաղորդում է, որ խոսքը մոտավորապես 70 հարկանի համալիրի մասին է, որը կարող է դառնալ Թբիլիսիի ամենատեսարժան ճարտարապետական վայրերից մեկը: Երկնաքերը կներառի շքեղ բնակելի շենքեր, առևտրային տարածքներ և հյուրանոց:
Ըստ տեղեկությունների՝ նախագծողը միջազգային ճարտարապետական Gensler ընկերությունն է, որը հայտնի է իր խոշոր քաղաքային և կոմերցիոն նախագծերով:
«Wall Street Journal»-ի փոխանցմամբ՝ նախագծի շուրջ ձևավորված կոնսորցիումը ներառում է մի քանի վրացական և միջազգային զարգացման ընկերություններ: Ներգրավված է նաև Նյու Յորքում տեղակայված «Sapir» զարգացման ընկերությունը։ «Sapir»-ը «Trump Organization»-ի նախկին գործընկերն է, ինչը ցույց է տալիս, որ նախագիծը կառուցվում է տեղական և համաշխարհային բիզնես շահերի հատման կետում:
Դոնալդ Թրամփի որդու՝ Էրիկ Թրամփի խոսքով՝ Թբիլիսիի նախագծի նպատակն է տարածաշրջանում տարածել ընկերության՝ «համաշխարհային ճանաչում ունեցող գերազանցության չափանիշը»:
«Trump» ապրանքանիշը Վրաստան ներմուծելու գաղափարը ծագել է 2012 թվականին, երբ հոլդինգը ներկայացրեց Բաթումիում անշարժ գույքի նախագծեր: Շնորհանդեսին ներկա էին Վրաստանի այն ժամանակվա նախագահ Միխեիլ Սաակաշվիլին և անձամբ Դոնալդ Թրամփը:
Սակայն այդ ծրագրերն այդպես էլ իրականություն չդարձան: Թրամփի կազմակերպությունը չեղարկեց Բաթումիի նախագիծը, ինչպես նաև այլ միջազգային նախաձեռնություններ՝ որոշումը պայմանավորելով շահերի հնարավոր բախումից խուսափելու ձգտմամբ:
2017 թվականին Silk Road Group ընկերությունն ու Բիձինա Իվանիշվիլիի հիմնադրած Համատեղ ներդրումային հիմնադրամը հայտարարեցին 250 միլիոն դոլար արժողությամբ երկնաքերի ֆինանսավորման ծրագրի մասին։ Այն պետք է բացվեր Trump Tower ապրանքանիշի ներքո։ Սակայն գործընթացը դանդաղեց, իսկ նախագիծն ամբողջությամբ չիրագործվեց։
Թբիլիսիի քաղաքային խորհրդի նախկին անդամ Սաբա Բուաձեն ուշադրություն է հրավիրում այն հանգամանքի վրա, որ Trump Tower-ի կառուցման համար հատվելու է 80,000 քառակուսի մետր անտառ։
Հետևեք մեզ — Facebook | Youtube
Թբիլիսիում կկառուցվի Trump Tower
