Պայմանագիր Չինաստանի հետ. վրացական արտադրանքը կազատվի մաքսատուրքերից

Չինաստանն ու Վրաստանն ազատ առևտրի մասին համաձայնագիր են ստորագրել: Դա նշանակում է, որ վրացական արտադրանքի համար կբացվի 1,4 միլիարդանոց շուկան:

Վրաստանի կառավարության վարչակազմի տվյալներով՝ համաձայնագրի շրջանակում Չինաստան արտահանվող վրացական արտադրանքի 94%-ը կազատվի մաքսատուրքերից: Վրաստանը դարձել է տարածաշրջանի առաջին երկիրը, որի հետ Չինաստանն ազատ առևտրի մասին համաձայնագիր է ձևակերպել:

«Չինաստանը Վրաստանի խոշորագույն առևտրային գործընկերների հնգյակում է: Զգալիորեն աճում են գինու արտահանման ցուցանիշները (2017թ-ի հունվարին-ապրիլին աճը նախորդ տարվա համեմատ կազմել է 270%): Վրաստանի կառավարության գլխավոր խնդիրներից մեկը սպառման շուկայի դիվերսիֆիկացիան է», — ընդգծված է Վրաստանի կառավարության պաշտոնական հայտարարությունում:

Վրաստանն ազատ առևտրի մասին համաձայնագրեր է կնքել Եվրամիության, Թուրքիայի, ԱՊՀ երկրների և Եվրոպայի ազատ առևտրի ասոցիացիայի հետ:

Պաշտոնական Թբիլիսին հույս ունի, որ Չինաստանի հետ ազատ առևտրի մասին համաձայնագիրը կբարձրացնի Վրաստանի տնտեսական ներուժը: Որպես օրինակ նա բերում է այլ երկրների տնտեսությունների վիճակը, որոնք նմանատիպ համաձայնագրեր են սստորագրել Չինաստանի հետ: Օրինակ, Չիլիի արտահանումն աճել է 132%-ով, Նոր Զելանդիայինը՝ 30%-ով, Պերուինը՝ 13%-ով և այլն:

Վրաստանի-Չինաստան ուղիղ չվերթեր են իրականացվում 2016թ-ի սեպտեմբերի 23-ից շաբաթը երկու անգամ: «Մեծ մետաքսի ճանապարհ» նախագծի շրջանակում առաջին անգամ բեռնափոխադրում է իրականացվել տրանսասիական-կովկասյան երկաթուղային կազմով: Ապագայում երկաթուղային տարանցումը կկապի Ասիան Եվրոպայի հետ:

2017թ-ի հունվարին-ապրիլին Վրաստան է այցելել Չինաստանի 4541 քաղաքացի, ինչը 32%-ով գերազանցում է նախորդ տարվա ցուցանիշը: