Վրաստանի դատախազությունը կալանավորների հետ անմարդկային վերաբերմունքի համար ձերբակալել է ևս 6 անձի

Գլխավոր դատախազության աշխատակիցները ձերբակալել են №8 ուղղիչ հաստատության նախկին աշխատակիցներին: Նրանք մեղադրվում են կալանավորների հանդեպ անմարդկային վերաբերմունքի, արժանապատվությունը նվաստացնող գործողությունների համար: Դա Մալխազ Գվինիաշվիլին է, Նուգզար Մարգիան, Զազա Խարաիշվիլին, Վախթանգ Գուգուցիձեն, Դավիթ Չիխլաձեն և Դավիթ Նոզաձեն: Իսկ խիստ ռեժիմի բաժնի նախկին պետ Օլեգ Պացացիան արդեն կալանքի տակ է քրեական հանցագործություն կատարելու մեղադրանքով:

Քննությունը փաստում է, որ ձերբակալված անձինք կալանավորներին վախեցնելու և ենթարկեցնելու համար նվաստացրել են նրանց մարդկային արժանապատվությունը և դաժան վերաբերմունք են նրանց հանդեպ ցուցաբերել՝ օգտագործելով հաշվեհարդարի ուժային մեթոդներ, հասցնելով ֆիզիկական և բառացի վիրավորանքներ: Նման եզրահանգման է եկել քննությունը՝ հարցաքննելով 600 դատապարտյալի:

«Մեղադրյալներն ապօրինի կրճատել են դատապարտյալների զբոսանքի ժամանակը, զրկել են հեռախոսազանգի և նամակագրության իրավունքից: Նրանք հնարավորություն չեն ունեցել օգտվելու բժշկական օգնությունից: Կրճատվել է նաև նրանց քնի և հանգստի ժամը: Բացի այդ, դատապարտյալներին ստիպել են գաղտնի համագործակցել ուղղիչ հաստատության ադմինիստրացիայի հետ», — հայտարարել են դատախազությունում:

Գործ է հարուցվել ՔՕ 1442-րդ հոդվածի երկրորդ մասի համաձայն: Մեղադրանքի հաստատման դեպքում ձերբակալվածները կարող են մինչև 5 տարվա ազատազրկման ենթարկվել:

Բանտարկյալների կտտանքների և նրանց հետ անմարդկային վերաբերմունքի վերաբերյալ գործ է հարուցվել այն բանից հետո, երբ 2012թ-ի սեպտեմբերին հրապարակվել են տեսագրություններ վրացական բանտերում դատապարտյալների կտտանքների մասին: Այդ փաստերի հիման վրա ձերբակալվել են ուղղիչ հաստատությունների տասնյակ աշխատակիցներ: Նրանց մի մասն արդեն լքել են կալանավայրը: