Վրաստանում պարետային ժամ և խիստ կարանտին է սահմանվում երկրի ողջ տարածքում
Պարետային ժամ է հաստատվում Վրաստանի ողջ տարածքում մարտի 31–ից մինչև ապրիլի 21–ը։ Այս մասին հայտարարել է Վրաստանի վարչապետ Գիորգի Գախարիան մարտի 30–ին ճեպազրույցի ընթացքում։
Ժամը 21.00–ից մինչև 6.00–ն արգելված է ցանկացած տեղաշարժ՝ տրանսպորտային և հետիոտնային։
Մարտի 30–ին ժամը 17.00–ի դրությամբ Վրաստանում գրանցվել է կորոնավիրուսով վարակման 100 դեպք։ Հիվանդներից մեկը բժիշկ է։ Կարանտինի մեջ է 4,876 մարդ, ստացիոնարում ՝ 264։ 18 հիվանդ ապաքինվել է, նրանցից երկուսը երեխաներ են։
Կարանտինի ժամանակ գործելու են հետևյալ սահմանափակումները․
- Ամբողջությամբ արգելվում է հանրային տրանսպորտի՝ այդ թվում մետրոյի երթևեկությունն, ինչպես նաև միջքաղաքային տրասպորտային հաղորդակցությունը։
- Թույլատրվում է միայն մարդատար ավտոմեքենաների օգտագործում, այդ թվում՝ տաքսիների, սակայն պարտադիր պետք է կատարել պահանջը․ մեքենայի մեջ կարող է գտնվել միայն վարորդն ու երկու ուղևոր, բացառապես հետևի նստատեղին։
- Ուղևորների տրանսպորտային փոխադրումը թույլատրված է, միայն եթե նրանք ռազմավարական կարևորության օբյեկտների աշխատակիցներ են։
- Արգելվում է մեկ վայրում հավաքվել ավելի քան երեք հոգով՝ բացառությամբ խանութների և դեղատների, որտեղ աշխատում է սովորաբար 10 մարդ։ Մարդկանց միջև պարտադիր է երկու մետր հեռավորության պահպանումը։
- 70 տարեկանից բարձր մարդկանց արգելվում է տնից դուրս գալ՝ բացառությամբ մոտակա խանութ, դեղատուն, բուժհաստատություններ հարկադիր այցելության։
- Միայնակ տարեց մարդկանց պարտավոր են օգնել էկոնոմիկայի, առողջապահության նախարարությունների, տեղի մունիցիպալիտետի աշխատակիցները։
- Քաղաքում շրջելիս անհրաժեշտ է ունենալ անձը հաստատող փաստաթուղթ։
- Խստացված արտակարգ դրության և քաղաքացիների ջերմային սքրինինգի կանոնների և պայմանների կատարման վերահսկողության համար հսկիչ անցակետեր են տեղակայվում հետևյալ քաղաքներում՝ Թբիլիսի, Քութայիսի, Բաթում, Ռուսթավի, Փոթի, Զուգդիդի և Գորի։
- Վերահսկողությունն իրականացվելու է ոստիկանության և բանակի համատեղ ուժերով։
- «Վախենում ենք աշխատանքը կորցնել»․ վրացական Ախալքալաք քաղաքը COVID-19–ին սպասելիս
- Վրաստանի Մառնեուլի քաղաքը՝ համաճարակի սպասելիս։ Ի՞նչ է կատարվում քաղաքում, որը կարանտինի պատճառով փակ է (լուսանկարներ)
- Ամայացած Թբիլիսին կորոնավիրուսի համաճարակի օրերին
Պանդեմիային հակազդելու համար մարտի 21–ից Վրաստանում արտակարգ դրություն է հայտարարվել։
Մարտի 23–ից կորոնավիրուսի ներքին տարածման պատճառով Քվեմո Քարթլի շրջանում փակ են Մառնեուլի և Բոլնիսի քաղաքները։
