Վրաստանն, Ադրբեջանն ու Թուրքիան ռազմական ոլորտում համագործակցության հուշագիր են ստորագրել
Ադրբեջանի, Վրաստանի և Թուրքիայի պաշտպանության նախարարներ Զաքիր Հասանովը, Լևան Իզորիան և Նուրեթին Ջանիքլին ապրիլի մեկին թուրքական Գիրեսուն քաղաքում անցկացրել են վեցերորդ եռակողմ հանդիպումը: Դրա արդյունքում նախարարները հուշագիր են ստորագրել, որն աջակցում է պաշտպանական ոլորտում երեք երկրների ավելի սերտ համագործակցությունը: Այս մասին գրում է Civil.ge-ն:
Բանակցություններից հետո տեղի ունեցած համատեղ մամուլի ասուլիսին Վրաստանի պաշտպանության նախարար Լևան Իզորիան եռակողմ համագործակցությունն օրինակելի է անվանել և նշել, որ «շրջանում ցանկացած նախագծի՝ առևտրային, թե այլ, իրականացումը մեծ մասամբ կախված է մեր համագործակցության որակից»:
Իզորիան ընդգծել է, որ անցյալ տարին ամենահաջողներից մեկն էր պաշտպանության ոլորտում համագործակցության առումով, «հատկապես՝ համատեղ զորավարժությունների անցկացման տեսանկյունից»:
Լևան Իզորիան և Նուրեթին Ջանիկլին նաև առանձին հանդիպում են անցկացրել, որին քննարկվել են երկկողմ համագործակցության և ՆԱՏՕ-ին Վրաստանի անդամակցության հարցերը, հաղորդում է Վրաստանի պաշտպանության նախարարությունը:
Այսպիսի եռակողմ ձևաչափով առաջին հանդիպումն անցկացվել է 2014թ-ի օգոստոսին ադրբեջանական Նախիջևան քաղաքում: Այն ժամանակ կողմերը պայմանավորվել են այդ հանդիպումները պարբերական դարձնել: Եռակողմ բանակցություններ են անցկացնում նաև արտգործնախարարները: Այդ ձևափափը հաստատվել է 2012թ-ին:
