16 օր անց. Հայաստանի խորհրդարանը չգնաց ռազմական դրության չեղարկմանը
«Լուսավոր Հայաստան» ընդդիմադիր խմբակցությունը խորհրդարան էր ներկայացրել «Ռազմական դրությունը վերացնելու մասին» օրենքի նախագիծ: Մի քանի ժամ պատգամավորները իրենց «կողմ» և «դեմ» փաստարկներն էին թվարկում, բայց ձայների մեծամասնությամբ նախագիծն, այնուամենայնիվ, մերժվեց:
Ընդդիմության պլաններում ռազմական դրության չեղարկումն առաջին քայլն է, որից հետո նախատեսվում է սկսել վարչապետ Նիկոլ Փաշինյանի իմպիչմենթի գործընթացը: Բանն այն է, որ ռազմական դրության պայմաններում հնարավոր չէ սկսել այս ընթացակարգը:
Ռեժիմի չեղարկումը ընդդիմությանը թույլ կտա նախաձեռնել վարչապետի պաշտոնանկության գործընթացը և առանց խոչընդոտների բողոքի ցույցեր անցկացնել:
Առայժմ դրանք արգելված են, չնայած Երևանում հանրահավաքները սկսվեցին Արցախում ռազմական գործողությունների դադարեցման մասին փաստաթղթի ստորագրումից անմիջապես հետո: Եվ բազմաթիվ բողոքի ակցիաներ արդեն տեղի են ունեցել։ Դրանց պահանջը Հայաստանի վարչապետի հրաժարականն էր՝ Ռուսաստանի և Ադրբեջանի ղեկավարների հետ եռակողմ «դավաճանական» համաձայնագրի ստորագրման պատճառով:
Ընդդիմությունը շարունակում է պահանջել Նիկոլ Փաշինյանի հրաժարականը, անհրաժեշտ է համարում ժամանակավոր կառավարության ստեղծում և արտահերթ խորհրդարանական ընտրությունների անցկացում:
- Ղարաբաղի հարցով համաձայնագիրը ոչ թե խաղաղության, այլ զինադադարի մասին է
- Հայաստանի վարչապետն ակնկալում է հայերի վերադարձ Ադրբեջանի վերահսկողության տակ անցած գյուղեր
Ինչ էին ասում պատգամավորները
Իշխող «Իմ քայլը» խմբակցության անդամ Հովհաննես Իգիթյանն ասաց, որ միջազգային գործընկերները, այդ թվում Ռուսաստանում Հայաստանի բարեկամները, կարծում են, որ այժմ Հայաստանին սպառնում է ռազմական ագրեսիա Թուրքիայի կողմից.
«Մեր բանակը պետք է պատրաստ լինի՝ իրավիճակին արագ արձագանքելու համար»:
Խորհրդարանական երկու ընդդիմադիր խմբակցությունները հանդես եկան ռազմական դրության չեղարկման օգտին, քանի որ այն հայտարարելու պատճառներն արդեն արդիական չեն:
Ընդդիմության կարծիքով՝ իշխանություններն օգտագործում են ռազմական դրությունը՝ կանխելու համար մարդկանց բողոքը վարչապետի կողմից կապիտուլյացիայի մասին հայտարարությունը ստորագրելու կապակցությամբ:
«Ինչ վերաբերում է սահմանների պաշտպանությանը, դա մշտական գործընթաց է, և այդ պատճառով մենք չպետք է մշտապես ռազմական դրության մեջ գտնվենք»,- ասել է «Լուսավոր Հայաստան» ընդդիմադիր խորհրդարանական խմբակցության պատգամավոր Անի Սամսոնյանը:
Պաշտպանության նախարարության կոչը
Ազգային ժողովում ելույթ ունեցավ նաև պաշտպանության նախարարության գլխավոր քարտուղար Արթուր Սարգսյանը: Նա հայտնեց, որ պաշտպանական գերատեսչությունը խորհուրդ չի տալիս չեղարկել ռազմական դրությունը:
Սարգսյանի խոսքով, առանց լրացուցիչ կարգավորումների՝ քննարկվող նախագծի ընդունումը խնդիրներ կստեղծի պաշտպանության և անվտանգության ոլորտում.
«Հնարավոր խնդիրներից խուսափելու համար պաշտպանության նախարարությունը մշակել է համապատասխան իրավական նորմեր և պատրաստվում է ներկայացնել բոլոր խնդիրների լուծման համապարփակ մեխանիզմներ»:
Անախորժություն քննարկման ընթացքում
Ընդդիմադիր «Բարգավաճ Հայաստան» կուսակցության պատգամավոր Միքայել Մելքումյանի հարցին, թե ինչպե՞ս պետք է բացատրի պատերազմում կրած պարտությունը իր թոռներին, իշխող «Իմ քայլը» խմբակցության ներկայացուցիչ Համազասպ Դանիելյանը կոպիտ արձագանքեց։ Դա զայրույթ առաջացրեց նիստերի դահիճում:
Անմիջապես հաջորդեց մեկ այլ տհաճ դրվագ: Ընդդիմադիր պատգամավոր Նաիրա Զոհրաբյանի այն արտահայտությանը, թե Փաշինյանը դարձել է անիմացիոն ֆիլմերի հերոս Ադրբեջանում, նույն Համազասպ Դանիելյանը պատասխանեց, որ նա էլ է ադրբեջանական մամուլի գերաստղ:
Դրանից հետո կրքերն ավելի թեժացան։ Ընդդիմության պատգամավորներին ու իշխող դաշինքի ներկայացուցիչներին հանգստացնելու համար փոխխոսնակ Ալեն Սիմոնյանը ստիպված էր կանչել անվտանգության աշխատակիցներին։
![ռազմական դրություն Հայաստանում, Լեռնային Ղարաբաղ, Նիկոլ Փաշինյան, պատերազմ Ղարաբաղում, ռազմական դրությունը վերացնելու մասին օրինագիծ, լուրեր Հայաստան,](https://jam-news.net/app/uploads/2020/11/127725330_1104218293341334_1252685026708101192_n-1024x576.png)