Հայաստանում պատվավոր կոչումներ այլևս չեն շնորհվի
Պատվավոր կոչումների վերացում ՀՀ-ում
Հայաստանում պատվավոր կոչումների շնորհումը վերացվում է։ 64 կողմ, 31 դեմ ձայների հարաբերակցությամբ Ազգային ժողովն այսօր առաջին ընթերցմամբ ընդունել է փոփոխությունների փաթեթը։ Խորհրդարանական ընդդիմությունը դեմ է քվեարկել նախագծին։
Կոչումների վերացման նախաձեռնությամբ է հանդես եկել արդարադատության նախարարությունը։ Կառույցից վստահեցնում են՝ այս որոշումը չի նշանակում, թե պետությունը դադարելու է որևէ մեկին խրախուսել իր գործունեության համար, այդ նպատակով այսուհետ կկազմակերպվեն ոլորտային մրցանակաբաշխություններ։
Ի՞նչ է ենթադրում որոշումը, իշխող թիմի և ընդդիմության կարծիքները
17 կոչումներից կպահպանվի միայն մեկը
Գործող օրենսդրության համաձայն՝ սահմանված էին 17 պատվավոր կոչումներ, այդ թվում՝ ժողովրդական արտիստի, ժողովրդական նկարչի, արվեստի վաստակավոր գործչի, մշակույթի վաստակավոր գործչի, վաստակավոր լրագրողի և այլն:
«ՀՀ պետական պարգևների և պատվավոր կոչումների մասին» օրենքում փոփոխություններ կատարելու մասին և հարակից օրենքներում փոփոխությունների փաթեթի ընդունումից հետո նման կոչումներ այլևս չեն տրվի։ Բացառություն է միայն «Վաստակավոր կոլեկտիվ» կոչումը։ Այն կպահպանվի, քանի որ անհատներին չի վերաբերում։
Նախկինում տրված կոչումները կշարունակեն գործել։
«Առաջադեմ երկրներում կոչումների ինստիտուտ առկա չէ»
Արդարադատության նախարարությունից պնդում են, առաջադեմ երկրներում կոչումների ինստիտուտներ գոյություն չունեն։ Ավելին, համարում են, որ պատվավոր կոչումները ոչ միայն ժամանակավրեպ են, այլև բացասաբար են անդրադառնում առողջ մրցակցության, բարոյահոգեբանական մթնոլորտի վրա։
Խորհրդարանում նախագիծը ներկայացրել է փոխնախարար Արմենուհի Հարությունյանը։ Նա շեշտել է՝ ժամանակն է հրաժարվել խորհրդային ժառանգություն հանդիսացող կոչումներից, քանի որ «ժողովրդականությունը» որևէ կոնկրետ չափանիշով գնահատելի չէ։
«Ակնհայտ է, որ որևէ ստեղծագործողի ժողովրդականությունը, հանրային ճանաչելիությունը, նրա կերպարի և կամ գործունեության հանրային ընկալումը չի կարող ստուգվել կամ չափվել, ոչ էլ վավերացվել կամ մերժվել պետական որևէ մարմնի կողմից»,- հայտարարել է նա։
Առաջին ընթերցումից առաջ՝ հունվարի 11-ին նախագիծը ներկայացվել էր ԱԺ պետաիրավական հարցերի հանձնաժողովի նիստում և դրական եզրակացության արժանացել։
Քննարկման ժամանակ Արդարադատության փոխնախարարը շեշտել էր՝ մասնագետների խրախուսումը պետք է հիմնված լինի «չափելի ու կոնկրետ» արդյունքների, օրինակ՝ ոլորտային մրցանակաբաշխությունների վրա։ Հարությունյանն ասել էր, որ նման մրցանակաբաշխությունների ժամանակ գնահատվում է անձի աշխատանքի արդյունքը, այլ ոչ թե նրան տրվում է «տիտղոս, որը կրում է մինչև կյանքի վերջ»։
«Գործ ունենք ավանդույթի մերժման հետ»
Հայաստանի խորհրդարանական ընդդիմության տեսակետն է։ «Հայաստան» խմբակցության պատգամավոր Լիլիթ Գալստյանը կարծում է՝ «անհարմար է այս մակարդակի օրենսդրական նախաձեռնություն բերել խորհրդարան»։
Ընդդիմադիր պատգամավորի գնահատմամբ՝ անհատի հեղինակությունն ու ազգային էլիտաները իշխանությանը պետք չեն:
«Մենք գործ ունենք հերթական անգամ եղած ավանդույթն ու ժառանգությունը մերժելու և ամեն ինչ զրոյական կետից սկսելու վարքագծի հետ»,- շեշտել է Գալստյանը։
Նույն խմբակցության պատգամավոր Գեղամ Նազարյանի համար անհասկանալի է՝ ինչ խնդիր է լուծում պետությունը այս փոփոխությամբ։ Հարցնում է՝ գուցե խնայո՞ւմ է ժողովրդական արտիստներին տրվող 40 հազար դրամները։
«Եթե սա է խնդիրը, կարելի էր ասել, որ էլ փող չենք տալու ժողովրդական արտիստներին, այդ 40 հազարը անհրաժեշտ է, օրինակ՝ հովիվների խրախուսման համար»,- նկատել է նա։
Ի պատասխան՝ արդարադատության փոխնախարար Արմենուհի Հարությունյանն ասել է, որ արդեն իսկ կոչում ունեցողները շարունակելու են ստանալ իրենց հասանելիք գումարներն ու հայտարարել՝ «այս դեպքում խնայելու գործառույթ պետությունը չի իրականացնում»։
Հետևեք մեզ — Facebook | Youtube | Telegram
Պատվավոր կոչումների վերացում ՀՀ-ում
