Միացյալ Թագավորությունը պատրաստ է աջակցել Հայաստանում բարեփոխումների իրականացմանը
Միացյալ Թագավորության Եվրոպայի և Ամերիկաների հարցերով պետնախարար Ալան Դանքնը հայտարարել է Հայաստանում, որ իր երկիրը պատրաստակամ է խորացնել երկկողմ հարաբերությունները և օժանդակություն տրամադրել Հայաստանի կառավարությանը՝ երկրի տնտեսության առաջնահերթություններից ելնելով այն օգտագործելու համար:
«Մենք պատրաստ ենք Հայաստանն ընդգրկել «Լավ կառավարում» հիմնադրամի ծրագրերում՝ ցուցաբերելու ֆինանսական օժանդակություն՝ պետական կառավարման, արդարադատության և տնտեսական ոլորտներում բարեփոխումների իրականացման համար…
Մենք ուզում ենք երկկողմ առևտուրն ավելացնել: Նախ, մենք ցանկանում ենք աշխատել Հայաստանի կառավարության հետ, որ Հայաստանը գրավիչ լինի առևտրի համար: Ունենալով լավ բիզնես միջավայր՝ ներոդրողները կգան Հայաստան: Մենք ուզում ենք ակտիվացնել առևտրաշրջանառությունը, սակայն դրա համար երկրի բիզնես միջավայրը պետք է վստահելի և թափանցիկ լինի»,- ասել է Ալան Դանքնը:
Վարչապետ Կարեն Կարապետյանը առաջարկել է ՄԹ պետնախարարին համատեղ բիզնես ֆորումներ կազմակերպել՝ բրիտանական բիզնես հանրությանը Հայաստանում ներդրումներ կատարելու բարենպաստ մթնոլորտի վերաբերյալ ավելի լայն տեղեկացնելու համար:
«Հայաստանը պետք է դիտարկել որպես կամուրջ՝ Եվրասիական տնտեսական միության, եվրոպական շուկաներ ու Իրան դուրս գալու համար: Համոզված եմ, որ անկախ մեր երկրի մեծությունից՝ մենք կարող ենք հետաքրքիր լինել միջազգային բիզնեսի համար և շահագրգռված ենք, որպեսզի բրիտանական բիզնեսը ոչ միայն ներդրումներով, այլ նաև իր մշակույթով ընդլայնի իր ներկայությունը մեր երկրում», — ընդգծել է վարչապետը:
Մեծ Բրիտանիայի պետնախարարը անդրադարձել է նաև Լեռնային Ղարաբաղի հակամարտությանը. «Մենք ակտիվորեն աջակցում ենք ԵԱՀԿ Մինսկի խմբի ջանքերին՝ ուղղված ղարաբաղյան հակամարտության խաղաղ կարգավորմանը: Եվ երկու կողմերին խրախուսում ենք բանակցային գործընթացին ակտիվորեն ներգրավվելու հարցում: Սա կարող է տարածաշրջանում տնտեսական ահռելի առաջընթացի և կայունության հանգեցնել»,- ասել է պետնախարարը:
