Ղարաբաղ. նախօրեին շփման գծում գրանցված սրացման մանրամասները
JAMnews-ը հուլիսի 4-ին հաղորդել է շփման գծում հերթական սրացման մասին:
https://jam-news.net/?p=47701&lang=hy
Այսօր ներկայացնում ենք նախօրեին տեղի ունեցած դեպքերի պարզաբանումներն ու մեկնաբանություններն, ինչպես միշտ, երկու կողմից:
Տեղեկատվություն Ադրբեջանից
Հուլիսի 5-ին Ադրբեջանի Ֆիզուլիի շրջանի Ալխանլի գյուղում հրաժեշտ են տալիս 50-ամյա Սահիբա Գուլիևային և նրա երկամյա թոռանը՝ Զահրա Գուլիևային:
Լուսանկարը՝ Գուլիևների ընտանեկան արխիվից
Ադրբեջանի ԱԳՆ-ն շատ կոշտ է արձագանքել երկու խաղաղ բնկիչների մահվանը:
«Տարեց կնոջ և նրա երկամյա թոռան մահն ու մյուս քաղաքացիական անձի վիրավորումն, ինչպես նաև քաղաքացիական օբյեկտներին վնաս հասցնելը Հայաստանի զինված ուժերի այս սադրանքի արդյունքում վանդալիզմի ակտ է և ևս մեկ անգամ հաստատում է հայկական պետության ահաբեկչական էությունը», — ասել է արտգործնախարարության մամուլի ծառայության ղեկավար Հիքմեթ Հաջիևն Azertag պետական տեղեկատվական գործակալությանը:
«Մինչ ԵԱՀԿ Մինսկի խմբի համանախագահները տարածաշրջան կատարած իրենց այցից հետո, ինչպես նաև միջազգային կազմակերպությունները կոչ են անում ստատուս քվոն փոխել առարկայական և լուրջ բանակցությունների միջոցով, Հայաստանը դիմում է գարշելի և ստոր սադրանքների, որոնք ուղղված են խաղաղ քաղաքացիների և երեխաների ոչնչացմանը», — հավելել է Հաջիևը:
Շատ ադրբեջանական լրատվամիջոցներ հրապարակել են զոհված աղջկա լուսանկարը: Սոցցանցերի էջերին վրեժի և պատերազմի անհապաղ մեկնարկի կոչեր են հնչում: Նույնպես կտրուկ քննադատվում է ԵԱՀԿ Մինսկի խմբի միջնորդների գործունեությունը:
Համընդհանուր վրդովմունքի ալիքին են միացել նաև հայտնի քաղաքական գործիչներ: Օրինակ, Ադրբեջանի առաջին նախագահ Այազ Մութալիբովը haqqin.az գործակալությանն ասել է. «Դիվանագիտական ճանապարհով միջազգային խնդիրների լուծումը լավ է, սակայն այսօր հայկական կողմը մեզ ընտրություն չի թողնում: Իսկ միջազգային հանրությունը պետք է հանի իր վարդագույն ակնոցն ու իրական իրավիճակը տեսնի: Քանի դեռ աշխարհը լռում է, սարգսյանական խունտայի հանցագործությունները դառնում են ավելի նենգ և հրեշավոր»:
Տեղեկատվություն Հայաստանից
Լեռնային Ղարաբաղի պաշտպանության նախարարությունը զանգվածային լրատվամիջոցներին տեսանյութ է տրամադրել, որում երևում է ժամանակը և ակնհայտ է դառմում, որ հայկական կողմը պատասխան կրակ է բացել:
Հուլիսի 4-ին հաղորդվում էր, որ ադրբեջանական կողմը կրակ է բացել ՏՌ-107 տիպի համազարկային հրթիռային կայանքներից ժամը 20:20-ին մոտ, հայկական կողմի պատասխանը հարվածը հասցվել է 20:31, ինչպես ասվում է Ղարաբաղի պաշտպանության նախարարության պաշտոնական հաղորդագրությունում, «հակառակորդի ձեռնարկած մի քանի կրակային գրոհներից հետո»:
Բացի այդ, Ղարաբաղի պաշտպանական գերատեսչությունն ադրբեջանցի հրամանատարների բանակցությունների ձայնագրությունն է տարածել, որը վկայում է այն մասին, որ Պաշտպանության բանակը պատասխան միջոցներ է ձեռնարկել ադրբեջանական կողմի կրակակետի ուղղությամբ:
Արցախի պաշտպանության նախարարության հաղորդագրությունում ասվում է, որ ադրբեջանական կողմը, սովորության համաձայն, իր կրակակետերը տեղակայել է բնակելի տարածքում՝ «դրանով իսկ վերածելով խաղաղ բնակչությունը կենդանի վահանի: Արցախի պաշտպանության բանակը պատասխան միջոցների է դիմել, որոնց արդյունքում ադրբեջանական կողմը վնասներ է կրել»:
Ղարաբաղի նախագահի մամուլի քարտուղար Դավիթ Բաբայանը Tert.am պարբերականին տված հարցազրույցում նշել է. «Ադրբեջանական կողմի պահվածքը որևէ նոր բան չկա, նույն ահաբեկչական, անմարդկային գործողություններ են, որոնք առողջ տրամաբանության շրջանակներում գնահատելն անհնարինն է: Ադրբեջանն օգտագործում է նաև նման զինատեսակներ, որոնց կիրառումը որևէ կերպ չի փոխում ռազմաքաղաքական հավասարակշռվածությունը տարածաշրջանում:
Պարզապես ևս մեկ անգամ ցույց է տալիս, որ Ադրբեջանն ահաբեկչական երկիր է, այսպես ասած մոլագար երկիր է: Ադրբեջանն ստացել է անհամարժեք պատասխան: Նրանք, ըստ երևույթի, ունեն կորուստներ, այն էլ բավականին շոշափելի»:
Նույն հարցազրույցում նա հայտարարել է, որ հայկական կողմի ռազմական հայեցակարգի հիմքում ընկած է ակտիվ պաշտպանությունը. «Այսինքն՝ մենք երբևէ ագրեսորի դերում հանդես չենք գալու, բայց ցանկացած ագրեսիայի դրսևորում պատժվելու է»:
Հայկական լրատվամիջոցները հաղորդում են, որ հուլիսի լույս հինգի գիշերն իրավիճակը շփման գծում համեմատաբար հանգիստ է եղել, եթե հաշվի չառնենք դիպուկահարների կրակոցները, որոնք այստեղ արդեն սովորական երևույթ են դարձել:
Միջնորդների արձագանքը
ԵԱՀԿ Մինսկի խմբի համանախագահները հայտարարություն են տարածել հուլիսի 4-ի երեկոյան Ֆիզուլիի Ալխանլու գյուղում իրավիճակի սրացման վերաբերյալ, «որի արդյունքում զոհեր կան, այդ թվում՝ քաղաքացիական բնակչության շրջանում»:
Հնչել է ռազմական գործողությունները դադարեցնելու հերթական կոչ. «Բռնությունը միայն բռնություն է ծնում և ոչինչի չի բերում: հակամարտության կարգավորման միակ պատասխանատու և մարդկային միջոցն այն է, որ կողմերը սեփական կամքով վերադառնան բանակցությունների սեղան»: Համանախագահները ցավակցություն են հայտնել նաև զոհվածների ընտանիքներին:
